واحد مبسوط و بيضحك

النهاردة و انا راكبة التاكسي كان فيه جنبنا واحد شكله بسيط اوي.. راكب عجلة و بيزمر نغمة كلاكس الفرح.. الكل بص له.. لقيناه بيضحك و شكله مبسوط و لما لقانا كلنا بنبص له باستغرب.. لقيناه بابتسامة عريضة بيزمر بنفس الطريقة بمنتهى الانشكاح.. ساعتها فعلا و بلا استثناء واحد الناس بأت تبص له و تبتسم.. الراجل البسيط ده قدر يرسم البسمة على شفاه ناس زهقانة من الزحمة و عايزين يوصلوا شغلهم و خلاص.. ساعتها انا جه في بالي اكتر من خاطرة..

• هو ليه اللي ماشي في الشارع شكله مبسوط بأه شكله غريب و مستغرب علينا كلنا؟
• يا ترى ايه اللي باسط راجل زي ده اوي كده؟ راكب عجلة و الدنيا زحمة و الكورنيش واقف و الناس مش طايقة نفسها؟.. مع ان شكله بسيط اوي و على أد حاله.
• يا ترى ايه اللي حس بيه الراجل ده لما لقانا كلنا بنبتسم على ضحكته و سعادته؟
• هو احنا ليه بقينا متجهمين كده و ماحدش بيهزر مع حد الا كان يعرفه؟
• من زمان ماشفتش حد مبسوط اوي كده
• ابتسامة الراجل ده مش قادرة تتمحي من ذاكرتي لحد دلوقتي
• ممكن الراجل ده يكون مجنون؟؟
• هازعل اوي لو طلع مجنون :o
  

و الله يا أخت علا انا بشوف ناس من النوعية دى كتير
و اطن ان لم اكد اجزم ان سبب انبساطهم ده حاجة واحدة

القناعة

و الرضا بأى شئ
و حاجة تانيه


تكبير الدماغ من الدنيا

لما الانسان بيكون رقيق الحال .. بيبقي اكبر مشاكله في الدنيا انه يعيش نفسه و اهله اليوم بيومه .. فقط .. و اذا لم يستطع ذلك اسودت الدنيا في وجهه..
و اذا استطاع ذلك .. و رزقه الله بقوت يومه .. و من عليه بيومين تلاته كمان ..ينشرح صدره .. و تتسع ابتسامته .. و يظن انه لا يوجد في الدنيا اكثر منه فرحا و انبساطا ...
الراجل ده مش مجنون يا علا .. او هكذا اعتقد
ده راجل بسيط ربنا اكرمه بخبر حلو او لسه قابض او حيتجوز او بنته حتتجوز .. علشان كده الدنيا مش سايعاه..
اما بالنسبة لينا ..
احنا اللي كترنا الهموم علي نفسنا .. ربنا يعيشنا فيها علي خير .. و يخرجنا منها علي خير :)

مش يمكن العجلة كانت بايظة و النهارده قدر يصلحها و رايح بيها مشوار كان بيروحه مشى ؟؟؟؟

القناعة جميلة
و الله جميلة قوي

بواب العمارة اللي جنبي كنت مرة واقف معاه و باسأله عن اخباره و نفسه يعمل ايه في الدنيا (من باب الدردشة لحد ما عربيتي تتنشف)
تخيلوا قاللي ايه !!!!!!!!!!!!!!
- ياسالاااااام يا باشا لو ابيع العجلة الهندي دي , و اشتري بقه حته كده صيني , اصل العجلة الصيني دي ركوبه ركوبة يعني .. بس نفسي تكون جديدة ...و ربنا كريم ادي بلم فلوسها و كله على الله .

بصراحة ... حسيت ان انا حيوان مش انسان و مؤمن
و لحد النهاردة دايما بخلى الموقف قدام عيني

اقتباس:

---

المشاركة الأصلية كتبت بواسطة OlaOsman

• ممكن الراجل ده يكون مجنون؟؟
• هازعل اوي لو طلع مجنون :o

---

وليه مايكونش هو الوحيد اللي عاقل في الناس دي كلها ... علي الاقل فهم اللي الناس مش قادره تفهمه .. ان الدنيا ما تستاهلش التكشير


" تبسمك في وجه أخيك صدقة " صدق رسول الله عليه الصلاة والسلام

اعتقد ان الموقف ده لو كان من 10 سنوات او اكتر كان الموقف حيكون على العكس تماما.
الهم ملا الناس.
ربنا يزيح الهم و الغم عننا جميعا

اقتباس:

---

المشاركة الأصلية كتبت بواسطة OlaOsman

راكب عجلة و بيزمر نغمة كلاكس الفرح

---

يبقى أكيد حد من أهله هايتجوز وهو فرحان جدا علشان كده

اقتباس:

---

المشاركة الأصلية كتبت بواسطة OlaOsman

• هو ليه اللي ماشي في الشارع شكله مبسوط بأه شكله غريب و مستغرب علينا كلنا؟

---

لأن ببساطه شديده الشارع المصري والعمل في مصر والحياه اليوميه في مصر برده خلت أي شخص عاقل متحفز جدا إنه يتخانق مع دبان وشه

اقتباس:

---

المشاركة الأصلية كتبت بواسطة OlaOsman

• يا ترى ايه اللي باسط راجل زي ده اوي كده؟ راكب عجلة و الدنيا زحمة و الكورنيش واقف و الناس مش طايقة نفسها؟.. مع ان شكله بسيط اوي و على أد حاله.

---

زي ما قلت قبل كده إن ممكن حد من أهله هايتجوز وهو مبسوط كمان هو راكب عجله وده حاجه مهمه جدا تخلي أي واحد في الدنيا مبسوط ..... لييييه
علشان أولا مش هايتخانق مع حد ولا حد هايزنق عليه ويكسر الطريق قدامه وثانيا لو اتخنق من الشارع ممكن يطلع على الرصيف ويفلفص من الزحمه بسرعه:)

اقتباس:

---

المشاركة الأصلية كتبت بواسطة OlaOsman

• يا ترى ايه اللي حس بيه الراجل ده لما لقانا كلنا بنبتسم على ضحكته و سعادته؟

---

هو حس انه احسن من الناس اللي ركبه عربيات اشكال وألوان ومش عارفه توصل أشغلها بسرعه زيه

اقتباس:

---

المشاركة الأصلية كتبت بواسطة OlaOsman

• هو احنا ليه بقينا متجهمين كده و ماحدش بيهزر مع حد الا كان يعرفه؟

---

أولا مافيش حد بيهزر مع حد في الزمن ده ولو عمل كده يبقى نادرا جدا أنه يكون يقصد الهزار
ثانيا ده الإحساس الطبيعي للحاجه السقعه:)

اقتباس:

---

المشاركة الأصلية كتبت بواسطة OlaOsman

• من زمان ماشفتش حد مبسوط اوي كده

---

وللأسف مش هاتشوفي مدام كل يوم الدنيا بيسوء حالها :(

اقتباس:

---

المشاركة الأصلية كتبت بواسطة OlaOsman

• ابتسامة الراجل ده مش قادرة تتمحي من ذاكرتي لحد دلوقتي

---

لأنها ببساطه ممكن تكون اول مره ليكي تشوفي إبتسامه طلعه من القلب ديركت من مواطن مصري المولد

اقتباس:

---

المشاركة الأصلية كتبت بواسطة OlaOsman

• ممكن الراجل ده يكون مجنون؟؟

---

إحتمال وليه لأ . في الزمن ده العاقل بقى مجنون طبيعي ومش محتاج لا سرايا صفرا ولا خضرا لأنه ببساطه في سراية مصر الكبرى

اقتباس:

---

المشاركة الأصلية كتبت بواسطة OlaOsman

• هازعل اوي لو طلع مجنون :o

---

مش محتاجه زعل ولا حاجه علشان زي ما قولت

نحن في سراية مصر الكبرى

اللهم لك الحمد والشكر على نعمائك التى انعمت بها عليا

القناعة ثم القناعة ثم القناعة

يا علا الراجل ده انا عارفه ... ده كان نجح فى انه ياخد عيش بجنييييييييييييه ونص بحالهم وماوقفش فى الطابور غير 3 ايام بس ....

فالراجل طاير من الفرحه طبعاً وسعيد وكان طالع يتصور جنب العيش ويبعت صورته لاهله علشان هايعملولوا تمثال ويطلقوا اسمه على الحاره السد اللى فى آخر البلد !!

ربنا يفرح الناس كلها

اقتباس:

---

المشاركة الأصلية كتبت بواسطة Ahmed Samy

مش يمكن العجلة كانت بايظة و النهارده قدر يصلحها و رايح بيها مشوار كان بيروحه مشى ؟؟؟؟

القناعة جميلة
و الله جميلة قوي

بواب العمارة اللي جنبي كنت مرة واقف معاه و باسأله عن اخباره و نفسه يعمل ايه في الدنيا (من باب الدردشة لحد ما عربيتي تتنشف)
تخيلوا قاللي ايه !!!!!!!!!!!!!!
- ياسالاااااام يا باشا لو ابيع العجلة الهندي دي , و اشتري بقه حته كده صيني , اصل العجلة الصيني دي ركوبه ركوبة يعني .. بس نفسي تكون جديدة ...و ربنا كريم ادي بلم فلوسها و كله على الله .

بصراحة ... حسيت ان انا حيوان مش انسان و مؤمن
و لحد النهاردة دايما بخلى الموقف قدام عيني

---

على قولك انا مره بدردش مع عسكري السنه اللي اتت على القهوة بياخده 400 جنيه مرتب و كان بيدور على شقه ايجار تكون ب 200 جنيه و قاللي ان 200 جنيه الفاضلين من المرتب يعيشوا ملك
طبعا هو قال الكلمه دي من هنا بحسن نيه
و انا من جوايا كنت بتحرق و من ساعتها اتعظت في حوار الفلوس ده
و لو في 10 جنيه في جيبي بفتكره و احمد ربنا
** على فكره الراجل ده متجوز و فاتح بيت

تعرفي يا علا , و آسف إني بقول علا بدون ألقاب , وده لأني بعتبر كل الأعضاء أخوة لي ,
أحيانا بكون في الشارع او في العربية و بفتكر حاجة تضحكنى و شوية آخد بالي ان الناس ممكن تبص عليا و تستغرب أو تقول ايه المجنون ده ,
يمكن ناس تقول إن ده بسبب رتم الحياة و المشاكل و الزحمة و إرتفاع الاسعار و الخناقات في الشغل و البيت بقى بيخلي الناس كلها مكشرة عن أنيابها , و بالتالي اللي بيضحك بقى هو الغريب و الشاذ عن القاعدة الشاذة :( :( :(
طيب يبقى السؤال هل هي دي الأسباب الحقيقة للحالة اللي وصلنالها ,
أنا رأي إن السبب هو ضعف الإيمان في قلوبنا ,
فلو عندنا إيمان قوي يبقى الدنيا مش هتكون أكبر همنا , و هيكون عندنا من القناعة اللي هزيد راحة البال و بالتالي هتلاقينا نضحك من القلب .
:rolleyes: :rolleyes: :rolleyes: :rolleyes: :rolleyes: :rolleyes: :rolleyes:

انا من 4 ايام بالزبط .. قعدت ييجي ربع ساعة بتكلم مع واحد من اللي بيمسحوا العربيات في الجراج .. حسيت انه بجد دماغ و عارف ايه اللي يستاهل و ميستاهلش و مبسوط .. طلعت بالعربية و انا فوق كوبري 15 مايو اتخانقت مع واحد راكب بي ام دابيو الفئة السابعة و اقل ما اقول عليه انه حيوان

بجد الناس مش بالفلوس اللي معاها .. بالعكس يمكن الشغل و الفلوس و العربيات هي اللي بتخلي الناس تتخلي عن راحة بالها

اللي يضايق ان الناس البسيطة دي تستحق حياة احسن من كدة بجد

انا شايف انه شيء عادي جدا
احيانا الواحد من كتر الخنقة اللى بيكون فيها يفتكر موقف او حاجة حصلت معاه ويقعد يضحك عليها جامد ويلفت انتباه الناس ليه
وعلى فكرة الحكاية دي حصلتلي قبل كده بسبب المحروسة هون هون (عربيتي)
مرة قبضت من الشغل Over Time (اضافي يعني) ومروح من الشغل بالعربية وعند منزل ميدان لبنان من الدائري المقص اليمين اتكسر والعربية لفت في الشارع لحد ما وقفت جنب الرصيف
والناس ركنت وافتكروا اني خبطت العربية وانا نزلت واقعدت اضحك وسقف بأيدي وابص على العربية واضحك
فواحد قاللى ايه يا عم انت مبسوط عشان العربية باظت ولا ايه
قلت له لا خالص
بس هيا تقريبا حست اني معايا قرشين زيادة فقالت لازم ينوبني من الحب جانب
والحمد لله تكاليف التصليح بتاعها غير قطرها لحد البيت كانوا بالظبط قد الاضافي والحمد لله
بذمتكم مش موقف يضحك

رامي (ابو احمد)

اكيد الراجل دة عايش في عالم تاني. بس دة يعتبر رضا من ربنا علية لانة قدر يطلع من عنق الزجاجة ولو للحظة عشان يشعر انة لسة عايش. انتي طبعا عارفة المثل اللي بيقول هم يبكي وهم يضحك. فالراجل دة قال انا النهاردة هاعيش مع الهم اللي يضحك....

الراجل ده ربنا اكرمه براحه البال
وما ادراك ما راحة البال
يعنى معندهوش حاجة يفكر فيها (يعنى مرتبه بياكل بيه وخلاص على كده)
مش بيفكر فى قسط الشقة
او قسط العربيه
او المرتب هيزيد ولا لا
ولا ولا ولا ولا...........
ربنا يكرمه

أنا أول ما قرأت الموضوع قلت حيطلع مجنون في آخر الموضوع :)

حضرت موقف غريب غني جدا و بيتكلم مع والدي و بيقوله
أنا طالع البيت امبارح و الاقي البواب بياكل جبنه قريش مع مراته و عياله بعيش ناشف و بيضحكوا، علي ايه مش عارف
و بنبرة واضح منها الحقد!!
أدفع نص فلوسي و أضحك الضحكة دي

سبحان الله.. كل واحد فعلا بيشوف الموضوع من منظور مختلف.. انما معظمنا يتفق على الرضا و القناعة.. اللهم ارزقنا اياهم يا رب :)