أنضف وأحسن طريق

**m7md_hany2** · 03-04-2008 02:32 AM

بما أني من الناس اللي ملهاش في الطرق أوي و الاختصارات فا فكرت أعمل الموضوع ده لسكان القاهرة و الجيزة و الماطق القريبة منها لمعرفة أحسن طريق ممكن يتاخد من حيث الزحام و لو كان في مشروع بيتعمل هناك عشان نبعد عنه و أسفلت الطريق برضه عشان نستفيد

هابتدي انا :
كنت عشان اروح مدينة نصر من الهرم بيطلع عيني كل مرة و أقف في الزحمة بتاعة كوبري أكتوبر لحد ما أكره نفسي ..... لحد ما عرفت طريق ناس كتير عارفاه أنا مكنتش منهم :d
اللي هو تطلع علي أخر الهرم و تدخل لكوبري المنيب (المعروف بالدئري بتاع ترسا ) و تنزل نزلة مدينة نصر من هناك .... الطيف نافسه جيد و سريع بس في مناطق منه مليانة تريلات و كدة .... المشكلة الوحيدة اللي في الطريقده ...هي الوصولليه .. الدخولمن نزلة المنصورية وحش جدا جدا و مكسر جدا و بيكون واقف سعات بسبب المشروع اللي حاصل هناك بتاع الكوبري الجديد بتاع المريوطية

**m7md_hany2** · 03-04-2008 02:34 AM

ويا رييت برضه لو كان في طريق مشهور بحوادثه - لا قدر الله - ناخد بالنا منه

**m7md_hany2** · 03-04-2008 12:52 PM

طب هو ليه مفيش خد قال حاجة ؟؟؟

**Ramy_Tantawi** · 03-04-2008 02:14 PM

السلا م عليكم.

انا كنت زي حضرتك كده بالظبط وكنت باقضي عمر الحقيقه عشان اوصل من الهرم -فيصل لمدينة نصر لكن الحمد لله بدأت اكتشف الطريق الدائري وهو فعلاً زي ما حضرتك بتقول كويس جدا على الاقل في الوقت برضه وبما إني اخدت الطريق ده مرات عديده الحمد لله عرفت بعض الخبايا اللي يمكن تفيد حضرتك.

1- بلاش تاخد الطريق ده من ترعة المنصوريه لئنه زحمه ومش مرصوف كويس اوي...ممكن حضرتك تاخده من المريوطيه وليك طريقين
(أ)-لو من شارع الهرم فوق المريوطيه على طول هتلاقي داخله كده هتمشي وتخلي الترعه على شمالك في هناك فندق كبير اسمه سياج اعتقد ده بيكون على يمينك والترعه على شمالك وبتوصل ان شاء الله على طول لغاية مطلع الدائري من هناك
(ب)-لو من شارع فيصل فيه نفق هناك معمول من شهور مش من زمان اوي برضه على ترعة المريوطيه بعد التوحيد والنور التاني مش القديم على طول بتدخل يمين بتلاقي نفسك نزلت نفق خللي بالك ان مفروض تاخد اول لفه وتاخد النفق الراجع مش اللي ماشي على طول يعني اتجاه شارع الهرم وده برضه عن طريق النفق هيوديك لغاية مطلع الدائري ان شاء الله بالسلامه.

اتمنى اني اكون افدت حضرتك وربنا يكفينا شر الطرق جميعا ان شاء الله .

**MMamdouh** · 03-04-2008 02:38 PM

انا لاحظت ان دايما انضف طريق هو الدائرى... طبعا من ناحية الزحام و الاختناق المرورى... قلبق لازم يبقى جامد عشان بتوع النقل و المقطورة

دايما حاول الهروب الى الدائرى لو عايز توح مشوار طويل... الطريق اطول فعلا لكن عن تجربة اسرع كتيييييير

انا مشيت من ميدان لبنان الى مدينة الرحاب فى حوالى 3 ساعات الا ربع من داخل المدينة (6 اكتوبر و باس المصير) اما من الدائرى فا القصة بتاخد بتاع ساعة واحدة

من جوة البلد المسافة حوالى 40 كيلو اما من الدائرى فا هى 55 كيلو... تخيل يفضل موتورك داير 3 ساعات الا ربع عشان يقطع 45 كيلو و خلالهم ميت دوسة دبرياج و فرامل و 50 نقلة اولانى و تانى

اما من الدائرى فا انت حاطت خامس و ماشى 90 و بتوفر بنزين و اعصاب و اسطوانة دبرياج و تيل فرامل و اهم من دة كلة... وقت

الدائرى دواء لكل داء فى المرور... للاسف انا دلوقت ساكن فى وسط البلد فا الدائرى بالنسبالى مش حل عملى فى كل الاحوال

MMamdouh