بعد الثورة...برجاء القراءة

السلام عليكم ورحمة الله وبركاته

أسعد الله صباحكم جميعا النهاردة أول يوم بعد تنحي الرئيس السابق محمد حسني مبارك عن رئاسة جمهورية مصر العربية

أنا اتكلمت في موضوع سابق في نفس الموضوع الي هاتكلم فيه دالوقتي ولولا أهميته البالغة ما كنتش اعدت كتابته وصياغته ليلائم الظروف الحالية الي إحنا كلنا فيها

بلدنا الحبيبة تحررت من نظام فاسد بكل المقاييس ..... ممكن تكون دي الكلمة الي عمالين نعيد ونزيد ونحتفل بيها

بس للأسف احنا لسه ما اتحررناش من النظام لإن كلمة نظام دي أعمق من مجرد الرموز الكبيرة بتاعتها

الخلاص من النظام الفاسد هيكون بتغيير سلوكياتنا كلنا

لازم نتغير ونكون كلنا ايجابيين بكل معنى الكلمة

ماينفعش نشوف الغلط ونسكت لازم نتعلموا نقولو لأ ونعملوا بيها

ما ينفعش نتستر على ظالم او فاسد او مخرب من أكبر مسؤول لأصغر نشال فالشارع وموزع مخدرات ومانبلغش عنه فورا

ما ينفعش نخلصوا اي اوراق في أي منظومة حكومية او خاصة برشوة و محسوبية...

ما ينفعش نسألوا (يا فلان انت تعرف حد شغال في المرور علشان يخلصلي ورق كذا وكذا) ولا حتى نستعين بأي حد من معارفنا علشان نقضوا على الرشاوي والبيروقراطية الفاشلة الي احنا بنعاني منها طول السنين الي فاتت

لازم كلنا نطلعوا بطاقات انتخابية .... ونشاركوا في كل الانتخابات ..... لازم احنا الي نختار .... صوتنا هوه حقنا

دي مجرد أمثلة وحياتنا اليومية فيها أكتر وأكتر و كل الي عاوز يضيف يتفضل

وأخيرا ودموعي بتنزل من عيني : بأقولكم كلكم تحية

تحية واجبة في حق كل الشهداء تغمدهم الله في رحمته والمصابين من إخواتنا الشرفاء الي بدمهم حرروا بلدنا
تحية واجبة في حق كل الشباب الشريف المحترم الي وقف مع اخواته في كل الميادين والشوارع بشجاعة علشان يطلع صوته قدام العالم كله رغم كل الضغوط الي مارسها النظام السابق
تحية واجبة في حق كل من لم يستطع النزول خوفا من النظام الفاسد وأقوله من النهاردة انت حر
تحية أخيرة لينا كلنا شعب مصر العظيم و بأقول بأعلى صوت احنا الي هنكملوا المشوار واحنا هنخلوا مصر اعظم بلد في الوطن العربي وفي العالم أجمع

وأسعد الله صباحكم والسلام عليكم ورحمة الله وبركاته