عرض للطباعة
1- ازاي اعرف ان الكاربرتير عندي سليم ومش محتاجه العربيه كاربراتير جديد وكيفيه المحافظه علي الكاربراتير عموما وما هو سعر الكاربراتير الجديد ؟
2- هل تركيب الجنوط بياثر علي اداء العربيه ؟
3- هل تركيب شكمان التربو( الديفل) في السياره يؤدي الي تحسين الاداء ام يؤدي الي اهلاك الماتور وصوت علي الفاضي ؟
4- ازاي اعرف ان المساعدين الامامين محتاجين تغير في 128؟
5- افضل وسيله للمحافظه علي الردياتير واحط مياه عاديه ولا خضراء ولا مقطره ؟
6- هل ينفع احط شويه جاز مخلوطين مع المياه في الردياتير للمحافظه عليه ؟
ال 128 بتعمل حوالي 200 كيلو في ال 20 لتر جوه البلد و حوالي 280 علي الطريق دا طبعا مش استهلاكها اللي مفروض بس خد عند بقي حاله الموتو اكيد مهما كان اتعمل له عمره او اتنين او حتي لو استيراد الموتور دا اشتغل كام سنه؟؟!!!!!
بتبقي مداخل الموتور وسعت و الموتور اهلك الي حد ما ف لو بتعمل زي ما انا بقول كده تبقي معقوله جدا كمان
2. الجنوط بالنسبه لل 128 مش حلو لما تركب عليها جنوظ عريضه اولا بيخلي شكل العربيه وحش و ثانيا بياثر علي عفشه العربيه جدا و بيبقي ناشف جدا و اي مطب بيسمع في شاسه العربيه و اساسا شاسيهات ال 128 ضعيفه ف من رايس لو حتركب طقم جنوط دور علي طقم جنوط ال 128 الابارث (بيسموه مروحه) هو شكل جنط ال 132 2000 كده بس مقاسه 13 بوصه مش 14 و عرضه 4.5 مش 5 كمان فبيبقي مناسب لل128 اوي و شكله بيكون جميل جدا خصوصا لو العربيه موديل سبعينات (عاده او معدل بس مش اكصدامات نيكل )
3.بالنسبه للديفل طبعا كل اللي بيركب دا اي كلام و بيعمل صوت علي الفاضي لو عاوز ديفل بجد اللي بيعلي من اداء العربيه و في نفس الوقت بيديك اداء كويس يبقي من نوع نضيف و بيتركب من اول الشكمان من عند الواصله لحد اخر علبه ورا و اذكر اني سالت عليه في معرض فورمولا 98 كان للعربيه الاونو ب 700 جنيه فما بالك دلوقتي لو لقيته يبقي عامل كام !!!
4.بالنسبه للمساعدين عموما في اي عربيه لما المساعدين بتبوظ بتلاقي علامات معينه يعني حتلاقي وش العربيه او ضهرها ارتفع عن الارض (حسب بوع المساعد اللي بايظ) و حتلاقي اي واحد بيجي في وشك بينزعج من النور الواطي بتاعك و غير كده حتسمع صوت في المطبات طالع من المساعد نفسه و ممكن تعمل انت تجربه بنفسك و هيا انك تيجي علي كل جنب في العربيه و تتك عليها اذا كانت العربيه بتطلع و تنزل سهله يبقي المساعد بايظ انما لو تقيله يبقي المساعد سليم مع طبعا ملاحظه اي اصوات موجوده.
5.افضل وسيله يا الميه الخضرا يا اما في حل تاني انا جربته و دا جميل جدا في ميه بس مش فاكر اسمها ايه كده بتتباع عند بتوع قطع غيار النقل و المقطوره و كانت غاليه كان السنتي متر بيتباع ب 10 جنيه سنه 2000!!!دي بقي بتحطها مع ميه بيضه عادي و بعدين هيا بتخش في الموتور و تعمل طبقه زي الشمع كده بتحافظ علي وش السلندر و المناطق اللي ببتاكل من الميه بتاعتنا اللي بنشربها دي ههههه!!
6.و الله انا كان عندي 125 و كنت بحط نقطتين جاز علشان اخلي الريداتير نضيف و انا سمعت انه بيحافظ عليه بس لا يفتي و قيصر في المدينه اسأل الباشمهندس سبعاوي اكيد ادري منه و السلام عليك
بالنسبة للكاربراتير اعراض بوظانه بتكون كالتالى:اقتباس:
- ازاي اعرف ان الكاربرتير عندي سليم ومش محتاجه العربيه كاربراتير جديد وكيفيه المحافظه علي الكاربراتير عموما وما هو سعر الكاربراتير الجديد ؟
1- سرعة استهلاك البوجيهات وظهور طبقة سوداء عليها بعد فترة بسيطة من استعمالها
2-صعوبة دوران السيارة صباحا
3-نتش يحدث فى السيارة فى اول مشوار دواسة البنزين(يعنى لما يكون الواحد بيهدى فى مطب صناعى مثلا وساعة ما ييجى يزود نلاقى السيارة مش بتطلع بنعومة لكن بتفضل ساكتة ساكتة مع تزويد البنزبن ومرة واحدة تنتش وبعدين تروح طالعة)
4- استهلاك البنزين يكون مرتفع
6-دخنة سوداء اللون تظه من الشكمان مع الضغط على البنزين
الكاربراتير المستعمل يكون فى حدود 250 جنيه، والجديد فى حدود 600 جنيه
اما الحفاظ على الكربراتير فيكون باستعمال بنزين من محطات موثوق بها وكذلك تغيير فلتر البنزين فى مواعيد مناسبة، واخيرا استعمال سائل تنظيف الكاربراتير الذى يوضع على البنزين(غذا كان مالكش فى الميكانيكا) او النوع الإسبراى(لو عندك بعض المعلومات فى الميكانيكا) مرة كل 20 الف كيلومتر او كل سنة ايهما اقرب
بالنسبة لل128 ممنوع نهائيا تركيب جنوط ذات مقاسات مختلفة عن مقاس جنط العربية الأصلى، او ذات نقطة ارتكاز مختلفة(يعنى طالع لبرة) حتى لو كانت من نفس مقاس جنط العربيةاقتباس:
هل تركيب الجنوط بياثر علي اداء العربيه ؟
لو عايز تركب لها جنوط سبور يبقى لازم يكون لها نفس مقاس ونقطة ارتكاز الجنط الأصلى، وبالفعل فإن الجنوط المروحة(الابارث) هى حل ظريف وآمن لل128 حيث انها من انتاج فيات نفسها
اكبر مقاس كوتش يسمع به لل 128 هو المقاس 165-13
فيما عدا ذلك فاخونا حازم خضر قد اجاب إجابة وافيه عن اسئلتك فى ما يخص المساعدين ومياه التبريد
فقط احب اضيف ان ال128 روحها فى مساعدينها وبالذات الامامية، إهمال تغييرهم =قصف عمر المقصات والكبالن والركب والسوست وعلبة الديريكسيون والميزان وكل العفشة الامامية، إوعى تطنش مساعدين ال128 الامامية
انت فنان يا أستاذ سبعاوي