تفضل تعيش في مدينه ولا في قريه قريبه من مدينه؟

**shaddadfalcon1** · 12-02-2011 12:10 PM

كنت عايز اعرف اراء الناس ايه
هل تفضل انك تعيش في مدينه زي القاهره او الأسكندريه
ولا تعيش في قريه قريبه منهم؟

انا بسال لاني محتار جدا
انا دلوقتي شغال في الأسكندريه في سموحه وماجر شقه في سيدي بشر قبلي وبصراحه مش عاجباني خالص وفقدت الامل اني اشتري شقه في مكان نضيف في الاسكندريه

وانا اساسا اهلي من كفرالدوار وعايشين في قريه وفيها مساوء طبعا زي عدم التعليم والجهل والحسد والطرق الوحشه لكن طبعا ناس محترمه ووقت الزنقه تلاقيها جنبك ومتربي معاهم وتحس بالفرحه في وسطهم

من القريه لحد شغلي حوالي 32 كيلو وطريقي علي الزراعي يعني ممكن اخدهم في ربع ساعه لحد الشغل

مش عارف دلوقتي افضل صابر لما حوش تمن شقه ولا اشتري قيراط ارض في البلد اللي جنبي اللي علي الطريق الرئيسي لان قريتي بعيده شويه
البلد التانيه دي برده انا اعرف ناس كتييره فيها وكل الناس هناك عارفاني لانها في الطريق وكده كده الفلاحين كلهم عارفين بعض من اصغير واحد لاكبر واحد

القيراط ده هيكلفتي حوالي من 80 الي 100 الف وعلي اقساط كمان وساعتها هيبقي عندي بيت علي مساحة 175 متر بتاعي لوحدي واعمل فيه اللي انا عايزه (جراج - محلات - مخازن ) الحاجات دي لوحدها ممكن تجيب تمن الأرض

ميزة المكان ده اني هبقي مستقل بذاتي وفي نفس الوقت قريب من اهلي وممكن ييجو ليا في اي وقت ماشيين كمان (من ساعة مانقلت الأسكندريه مفيش حد من اهلي جالي عشان المشوار والمواصلات)

لكن مش عارف ليه ببقي متردد ونفسي ولادي يتربو في احسن مكان في الدنيا

ارجوكم تحطو نفسكم مكاني وتقولولي رايكم ايه

معلش اانا كل شويه اعمل موضوع حوالين الحوار ده بس ان شاء الله يكون اخر واحد

**زينة الله** · 12-02-2011 01:31 PM

المشاركة الأصلية كتبت بواسطة shaddadfalcon1

اشتري قيراط ارض في البلد اللي جنبي اللي علي الطريق الرئيسي لان قريتي بعيده شويه
البلد التانيه دي برده انا اعرف ناس كتييره فيها وكل الناس هناك عارفاني لانها في الطريق وكده كده الفلاحين كلهم عارفين بعض من اصغير واحد لاكبر واحد

القيراط ده هيكلفتي حوالي من 80 الي 100 الف وعلي اقساط كمان وساعتها هيبقي عندي بيت علي مساحة 175 متر بتاعي لوحدي واعمل فيه اللي انا عايزه (جراج - محلات - مخازن ) الحاجات دي لوحدها ممكن تجيب تمن الأرض

ميزة المكان ده اني هبقي مستقل بذاتي وفي نفس الوقت قريب من اهلي وممكن ييجو ليا في اي وقت ماشيين كمان (من ساعة مانقلت الأسكندريه مفيش حد من اهلي جالي عشان المشوار والمواصلات)

لكن مش عارف ليه ببقي متردد ونفسي ولادي يتربو في احسن مكان في الدنيا

ارجوكم تحطو نفسكم مكاني وتقولولي رايكم ايه

معلش اانا كل شويه اعمل موضوع حوالين الحوار ده بس ان شاء الله يكون اخر واحد

هو دا الحل السليم من وجهة نظرى و بعدين يا باشا ما أنت متربى هناك و زى الفل أهه وحش أنت ؟؟

صحيح المدن فيها رفاهية أكتر لكن الريف له أخلاقة الجميلة و المحافظة و فيه ونس الاهل والمودة والرحمة

و على فكرة أولاد الريفين أشطر و أذكى من أولاد المدن كنسبة من الأعداد

كدا أنت حتكبر الفلوس اللى معاك و لما تحوش من فلوس الايجار اللى كنت بتدفعها مبلغ محترم ممكن تبيع البيت

و تكمل و تشترى فى مكان أحسن

أنا عن نفسى أتمنى أعيش فى قرية قريبة من أى مدينة كبيرة و أبنى هناك براحتى و يبقى عندى جنينة صغيرة مزورعة

و عشة فراخ و أرانب و إن أمكن كمان جاموسة عشان أشرب لبن من غير بودرة سيراميك ههههههههههههه

هو فى زى خير الريف

**shaddadfalcon1** · 12-02-2011 01:36 PM

متشكر جدا يااخت زينه الله

انا والله ميال قوي للموضوع ده بس عارفه لما تبقي نفسك في حاجه ومتردده ونفسك في كذا راي عشان تشوفي يااما تقدمي علي الحاجه او تصرفي نظر عنها خالص؟

بانتظار باقي الأراء

**زينة الله** · 12-02-2011 01:52 PM

شوف يا هيثم لازم تحزم أمرك لأن التردد بالصورة دى هيخسرك كتير و كثرة الحسابات تميت الهمم

كل واحد ربنا كتب له رزقه و هيشوفه و ما حدش يعرف الغيب

اتكل على الله و خد خطوة تنفيذية فى الاتجاه اللى ترتاح له أكتر و ظبط نفسك فى أى عقار

و مش حتخسر صدقنى لأن العقارات و الأراضى مهما حصلت سوقها وأسعارها فى تزايد و قيمة الفلوس بتقل

**shaddadfalcon1** · 12-02-2011 04:19 PM

بجد متشكر جدا يااخت زينه
جزاكي الله كل خير

**mostafabakry** · 12-02-2011 04:34 PM

حاليا فيه تجمعات سكنبه بتكون خارج زحام المدن و لكنها متصله بالمدينة

انا معاك ان القرية هدوء و امان بس مفيش خدمات خالص و تحس بالكلام دا لما يبقي عندك اطفال لا مدارس كويسة و لا اماكن ترفيهية زي النوادي و الحدائق
القري حبسة بمعني الكلمة ارها زيارة لمدة اسبوع في المناسبات

انا رايي انك تحاول تشوف اقرب ما يكون للمدينة عشان تبقي قريب منها و في نفس الوقت بعيد عن الزحمة و الخنقة

**shaddadfalcon1** · 12-02-2011 06:09 PM

المشاركة الأصلية كتبت بواسطة mostafabakry

مفيش خدمات خالص و تحس بالكلام دا لما يبقي عندك اطفال لا مدارس كويسة و لا اماكن ترفيهية زي النوادي و الحدائق
ا

دي اكتر حاجه خنقاني
انا لو النت فصل وانا في البلد ببقي زي المجنون واليوم بيبقي سنه

بس لما يبقي في حاجات كتيير عايز اعملها مش بحس باي وقت

**a7madramadan** · 12-02-2011 06:20 PM

إنت لو تضمن نسبيا السكة من بيتك لمكان شغلك على اعتبار ان شغلك يومي في سموحة .... وطبعا الموضوع ده نسبي لإن ممكن السكة وسط البلد تتقفل لسبب أو لآخر الموضوع حسبة وقت ومسافة البيت لداخل الإسكندرية .... لو الموضوع نص ساعة بالكتير قوي من البيت لحد جوة اسكندرية توكل على الله .... و أساسا انت شكلك هتاخد على الوضع قوام وبيتهيقلي الموضوع هييجي براحة البال ليك ان شاء الله ولما ربنا يسهللك الحال تبيع البيت بالأرض وتجيب شقة محترمة في انضف حتة في اسكندرية جوة البلد

وما تنساش ان في نوع من الزحف السكاني بمرور الوقت الي هيخلي مكان القرية أقرب للمناطق السكنية تدريجيا وده بيدي قيمة زيادة للموقع الي فيه القرية

**shaddadfalcon1** · 12-02-2011 07:55 PM

المشاركة الأصلية كتبت بواسطة thediesel

إنت لو تضمن نسبيا السكة من بيتك لمكان شغلك على اعتبار ان شغلك يومي في سموحة .... وطبعا الموضوع ده نسبي لإن ممكن السكة وسط البلد تتقفل لسبب أو لآخر الموضوع حسبة وقت ومسافة البيت لداخل الإسكندرية .... لو الموضوع نص ساعة بالكتير قوي من البيت لحد جوة اسكندرية توكل على الله .... و أساسا انت شكلك هتاخد على الوضع قوام وبيتهيقلي الموضوع هييجي براحة البال ليك ان شاء الله ولما ربنا يسهللك الحال تبيع البيت بالأرض وتجيب شقة محترمة في انضف حتة في اسكندرية جوة البلد

وما تنساش ان في نوع من الزحف السكاني بمرور الوقت الي هيخلي مكان القرية أقرب للمناطق السكنية تدريجيا وده بيدي قيمة زيادة للموقع الي فيه القرية

الحمد لله السكه بنسبة 99% سالكه الا اذا كان في حادثه علي الزراعي ومش بتطول
ان كان علي الوقت الللازم عشان اروح الشغل فده يعتمد علي سرعتي مش علي الطريق وساعات باخدها في ربع ساعه ولو مشي علي مهلي قوي باخد 35 دقيقه او ساعه الا تلت بالكتيير

ان كان علي التاقلم فانا متاقلم بالفعل لاني عايش في المكان ولسه ناقل الاسكندريه من اقل من سنه وبصراحه مش مستريح لان مليش حد هناك وكده كده كل اسبوه بروح البلد يوم الخميس واروجع السبت بالليل يعني يعتبر 3 ايام في البلد كل اسبوع يعني شحططه وبهدله كل اسبوع

**mostafabakry** · 12-02-2011 08:06 PM

يبقي خلاص توكل علي الله و اسكن في البلد و انت معاك عربيتك يعني في اي وقت تقدر تروح المدينة

انا شايف انك مرتاح اكتر للبلد و دي اهم ما في الموضوع " الراحة النفسية "

بس انت مجبتش سيرة بخصوص رأي الطرف الأخر " الزوجة" لأنها مهمة جدا و بيتوقف عليها القرار بنسية 50%