المشاركة الأصلية كتبت بواسطة amir
احب اوضح الاول حاجه عن نفسي يمكن ناس كتير هنا مش تعرفها
انا المنتدي هنا تاني منتدي اسجل فيه للتفاعل مع الاخرين و اول منتدي افرح لما تيجي منه ليا ايميلات مشاركات جديده و مجريش الغي الاشتراك منه
تابعت بذوره الاولي لحبي للسيارات و متابعتي بغرض الشراء و التبديل ايام كونتاكت كارز
و مع ان الفتره دي كانت فتره جيش علي ما اتذكر الا ان قرار انضمامي كعضو في نايل موتورز اتئخر شويه لأني كنت بخير نفسي بين حاجتين
هل افضل متابع في صمت من بعيد لبعيد دون الانخراط في التفاعل و التعرف علي اناس جدد بما يتطلبه ده من مجهود و اخلاص و تفاني في خدمه الناس
ولا اشترك و التزم و احتسب منفعه الناس اجر عند ربنا لأن بطبيعتي بحب جدا اكون من هؤلاء الرجال الذين حبب الله اليهم الخير
و كان الاختيار محسوم لما سجلت و لأول مره بأسمي في منتدي عام, و تابعت بهدوء لجميع الدروس و الشروح علشان اقدر افيد باقي الاعضاء و اساعد في حل مشاكلهم
و لما توافرت عندي معرفه اساسيه صحيحه من خلال عمالقه بجد مش بس كلام, لقيت نفسي بيكون عندي اجابات موثوق منها و قادر ارد بيها علي اسئله اعضاء محتارين و اساعدهم انطلقت في الموضوع ده و حاولت ازود من منفعتي للاعضاء قدر الامكان سواء لما سعيت مع شركه 3m و محاولتي استخدام كافه مهاراتي في الاتصال اني اجيب احسن العروض الممكنه و فعلا كانت ارخص بكتير من ال vcool اللي كان المنتج الوحيد المتاح و بسعر مرتفع جدا
المهم يومها حسيت ان كل واحد استمتع بالمنتج ده من خلال المنتدي و كل عامل بياخد بقشيش او مرتب من مكان عمله و كل اسره هيكون قدامها طبق اكل و اكون انا سبب و لو ضئيل في المسار ده
و لما لقيت مردود ده جوايا و زيادته لاحترامي و تقديري لذاتي اندمجت اكتر و اكتر و بقي المنتدي و ناسه عندي زي الاهل و الاصدقاء و لقيت اني اقدر اتناقش معاهم كمان في اي شيء و كل شيء تقريبا و فعلا استفدت كتير جدا جدا
لغايه ما ابتديت اخد بالي ان المنتدي مش بقي زي الاول او علي الاقل و بكل صراحه قبل ما المنتدي يقع و قبل موضوع تفجيرات الكنيسه و بالذات فتره لما عضو مسيحي عمل موضوع بيشرح فيه احتفالات راس السنه عند المسيحين
حسيت ان البيت مش بقي ضامم العيله و الاهل حسيت بجد ان جدران البيت اللي كانت بتحميه انهارت و بقي الاهل و الاصحاب مختلطين بكل غث و سمين و علي جزر متباعده و كأنهم اعداء مش اهل بيت
حاولت الوقوف مع الحق, و ليس من منطلق ديني قد يختلف ابناء الديانات الواحده في تعريف مفهومه لكن من منطلق انساني صعب اختلاف ابناء الجنس البشري عليه
كلنا يأكل و يشرب و ينام و يمرض و في النهايه كلنا نموت, كلنا واحد ولا اختلاف يذكر بين البشر
و لقيت وقتها ان ابدائي رأي اراه صوابا اما رأي يراه غيري خطأ كانت نتيجته مش المناقشه و الجدال المبني علي اسس سليمه
لقيت ان قوانين المكان بقت بتستخدم لتصفيه خلافات شخصيه , و مهما ان اتقال اني اوفر في النقطه دي الا ان صعب ان توجد العديد من المصادفات و بتوقيت في منتهي الغرابه و كل الاسباب الاخري ما ظهر و ما بطن , صعب توافر كل ده و حد يقول اني احساس زائف بالاضهاد
و لولا احداث تعاقبت في منتهي الخطوره علي بيتنا الكبير لكنت اتكلمت و فندت و رديت علي كل شيء
و في نفس الفتره الحرجه لاحظت نفس الانقسام بين اعضاء المنتدي و في امر في منتهي الخطوره دي مش عربيه ولا شقه دي بلدنا
و كمان زاد الموقف سوء اني لقيت عدد ضخم من المواضيع التي تغلق و قبل كده ليا تجارب سيئه مع ايقافات لست مقتنعا الا بواحد فقط منها, و في نفس الوقت اللي ليا من الافعال و المواقف ما يمكن ان يجعل اي شخص علي معرفه بمعدني و اصلي و اخلاقي
و علي اساس كل ده و لحبي فعلا في ناس كتير هنا منهم معرفش عنه الا الاسم المسجل فقط و مع ذلك حسيت اني اعرفهم من زمن طوييييييييل
و فعلا الاحساس ده جوايا لناس معينين كل ما كنت اشوف بس اسمهم انط اقري مشاركتهم لأني عارف ان كلامهم بحر مليان بالدرر
بجد انا فعلا حزين اني مش هقدر استمر في المنتدي علي سابق عهدي, مش كل شويه الاقي تهمه ما موجهه ليا و مش علشان قتلت او سرقت علشان بقول رأي نابع من احكام و فلسفه انسانيه بحته؟!!
و من غير محاوله للتوضيح او الدفاع عن النفس الاقي نفسي و امام اكتر من 80 الف عضو بأهان سواء بكلمه او ايحاء او حتي حكم جائر ولا يمكنني الاعتراض و كل ما اعترض يتم التهرب من مواجهتي مره بحجج في منتهي الضحاله زي مره اتقالي ان كلامي مش مفهوم , و ده كان تعليق علي شرح لموقفي لما مره كنت موقوف و شايف انه ظلم ده غير محاولات مستميته لاصطياد الاخطاء اثناء التحدث خصوصا و بالذات مع لجان فض المنازعات او المشرفين او او اي من له سلطه اداريه في المنتدي
ضيف علي ده سريه المشرفين و مع انهم شخصياتهم سريه لينا الا انهم عارفين بعض؟!!
طب بالذمه مدام هما عارفين بعض و بيقعدو يتكلمو في ساحه خفيه عن باقي الاعضاء و لما المنتدي وقع مره كلام كتير اتقال ان محتويات الكلام في الغرفه دي كانت لا تخلو من استهزاء و سخريه من شكاوي و تظلمات الاعضاء بالذمه ده كلام برضو؟
و افرض انا علي خلاف مع مشرف و انا مش عارف قام مشرف تاني عايز يوجب مع الاول يقوم يصطاد الاخطاء و يتربص ليك هفوه علي قواعد المنتدي و قوام يرزعك ايقاف
مش ده نوع من انواع الارهاب برضو؟
و للاسباب دي انا سايب المنتدي اجتماعيا تماما قدر ما استطعت و هتجه للنقاش و الجدال بالتي هي احسن مع مجتمع الفيس بوك حيث لا حجر علي رأي ولا ايقاف في نقاش و اثبات وجهات نظر قد تكون كثيرا من الاحيان وجهات نظر صحيحه لنفس الشيء
و اكيد لو المشاركه دي فضلت ظاهره لباقي الاعضاء علشان و لنفس رغبه صاحبها في نشرهها علي العام مش الخاص, لو فضلت المشاركه دي لحد ما الموضوع يقدم و يطويه النسيان هتأكد ان في ودان بتسمع و عقول بتعي الكلام و اهدافه
و لو اخدت ايقاف من تاني فمش هتفرق كتير اديني حاولت تسديد ما تبقي علي من دين ناحيه مكان اعتزيت بيه و بمعرفه ناسه اللي بقم ليا في فتره من الفترات اسره تانيه كبيره
شكرا يا نايل موتورز و جزيل الشكر و التقدير و العرفان و من اعماق القلب لكل اخ ليا هنا حتي لو مكناش نعرف بعض شكلا ولا اسما حتي
بس اوقات القلوب و الارواح بتتلاقي و تنجذب و ده اللي كان