السلام عليكم
خلال الفترة اللي فاتت و خلافاتنا مع بعض الكتييييييييييييير , اللي في رأيي نتجت من ان مش كلنا بنفكر زي بعض و مش خلفيتنا واحدة و حتى مش معلوماتنا واحدة ولا مبادئنا واحدة
دول كام مبدأ انا شايف اني اتعلمتهم , او اتثبتوا عندي مع الثورة دي
1- علينا ان نعمل و نسعى و النتيجة بيد الله فقط : ماحدش فينا كان يتخيل قبل يوم 28 ان اللي حصل ده هايحصل .. و لحد امبارح الساعة خمسة و شوية ناس كتير ما كانوش متوقعين ان ربنا رايد لنا نفرح الفرحة دي كلها , ناس كتير كانوا خايفين من حاجات مش حقيقية ( كنا و مازلنا خايفين من بعض الأشياء لكن انا باتكلم عن حاجات اطلقت لتخويفنا و خلاص ) , الفتنة , و البلد اللي بتنهار , و هانبقى زي العراق , و الجيش هايفترسنا لو اتكلمنا , و هو اللي معاه الرشاشات و الصواريخ و الكلام ده
2- علينا ان نتحقق قبل أن نصدق : كلام كتير اوي اتقال و اتعملت علينا حرب شائعات رهيبة , و كل اللي صدق من غير ما يتحقق اتخدع و اتفتن, كل أجهزة الدولة اللي خطفوها اتسخرت للشيء ده , التليفزيون , الاذاعة , قادة الشرطة , حتى أئمة وزارة الأوقاف
3- انما النصر صبر ساعة : البلد كلها اتعملت درع بشري في مواجهة المتظاهرين , يا تفكوا اعتصامكم و تمشوا يا الناس دي ما هاتلاقي تاكل و هايكرهوكم و هما اللي هايموتوكم , كل الناس اللي قالوا حالنا واقف , او بالبلدي حقي برقبتي , او جاااااي يعني , فكروا في نفسهم بس , ماحدش فيهم فكر في الناس اللي كل يوم بتبقى قلقانة كده على لقمة عيشها , ماحدش فكر في انه هو شخصيا مظلوم و له حقوق و لازم يصبر عشان ياخدها و ده اضعف الايمان ؟ طبعا فيه ناس فكرت و ناس لأ , بس ده برده درس لازم نتعلمه
4- الحق أحق ان يتبع : دايما في الدنيا فيه تفكيرين , تفكير بيقول علينا ان نسعى نحو الحق , و تحقيق الحق زي ما ربنا قال بيأتي تلقائي بتحقيق المصلحة مهما كان فيه تضحيات , و التفكير التاني بيقول احنا نخلينا في مصلحتنا و ناكل عيش احسن , فضلنا في مصلحتنا وقلنا ناكل عيش , رمينا حدودنا الشرقية في فلسطين و رمينا حدودنا الجنوبية في السودان , و صورتنا بقت وحشة قدام الكل و الكل كرهنا و كنا نستحق , و حتى رغيف العيش مالقيناهوش و بقينا في كل لحظة مهددين بالمجاعة و الناس موتت بعض في طوابير العيش .... الدرس , لو هانموت بكرمتنا , احسن كتير ما نموت أذلاء , و ان اتمسكنا بكرامتنا هانطلع و ننزل بس مش هانموت , و لما أزلينا نفسنا فضلنا ننزل لحد ما كننا هانموت لولا فضل الله علينا
5- ربما قد نسامح بعد رفع الظلم لكن ليس قبله , يعني ما نبقاش كلمة تودينا و كلمة تجيبنا , الناس مستشهدين في الميدان و بيتقال عليهم مخربين و بيتشتموا , و نتعاطف مع القاتل و نقول يا جماعة خلاص بقى
6- ان كنا لن نفعل فدعونا لا نثبط من يفعلون , طب احنا مقتنعين ان مافيش فايدة و مش هانعمل حاجة , خلاص نسكت بقى و نخلينا على الحياد , مش نكسر مقاديف الناس اللي بتعمل و احنا عارفين ان غرضهم خير لينا و ليهم , ما نبقاش مرجفين و احنا مش واخدين بالنا , ما نعينش الظالم على المظلوم بصورة غير مباشرة
7- الكل قبل الواحد: يعني ما ابقاش انا مرتاح و مترستأ و متظبط و دخلي شيء و شويات اقوم اهاجم الناس اللي بيدوروا على حقهم , احنا شفنا ناس كتير نزلوا و اتبهدلوا و هما مش محتاجين حاجة خالص و دخولهم كويسة جدا , لكنهم أمنوا بالفكرة و ما عملوش زي اللي زيهم بالظبط راحوا يجاملوا ولي النعم بمهاجمة اصحاب الحق والافتراء الكاذب المفضوح السافل عليهم
8- عدم الاستماع للسلطويين و الطبقيين : بعض الناس دماغهم سلطوية , هما دماغهم كده , عندهم حاكم يعني رجله فوق راس الكل , على كتفه رتبة يبقى سيدنا و تاج راسنا و يعمل اللي هو عايزه و ابونا و امنا و انور وجدي و يعمل اللي هو عايزه لأنه عم الكل , مش في بالهم خالص ان ده مفروض موظف مهما عليت درجته , هما بالعكس بينبهروا باللي كده و بيحترموه زيادة عن اللزوم و شايفينه حاجة ما حصلتش , من الناحية التانية فيه الناس اللي دماغها طبقية , افكارهم زي اللي فاتوا بالظبط بس بيقيسوها اجتماعيا و ماديا , دول و دول دماغهم كده , براحتهم , لكن مع احترامي للأفراد , الفكر ده مش صحيح لأن البشر سواسية مهما اختلفت الوظيفة او السن أو الحساب اللي في البلنك و الطبيعي ان كلنا نعامل بعض باحترام مش واحد يحترم و التاني ما يستحقش الاحترام
لسه اكيد فيه حاجات تاني , بس ده اللي بالي دلوقت
المفضلات