الانتهازيه والأنانيه والاضرابات في هذا الوقت الصعب

**تامر.محمد** · 13-02-2011 04:17 PM

المشاركة الأصلية كتبت بواسطة dr-mohamed

اقول لحضرتك رايي بصراحة وقلته من قبل وما زلت مصمم عليه
دلوقت وقت حرج جدا لاقصي درجة في تاريخ مصر والمطلوب بعد ما خرجنا وغيرنا النظام اننا نبني بلدنا علشان تبقي افضل لو كل واحد فينا خرج وعمل مظاهرة علشان مرتبه يزيد طيب مين اللى هايشتغل ؟ طيب البلد هاتبقي احسن ازاي ؟ وخصوصا ان اللى بيتظاهر لازم يقف في مكان يعطل فيه المرور ويعطل بقية الناس عن عملها وبالتالي الدولة كلها الىل المفروض بقت بتاعتنا بتتعطل و ده بيقلل الانتاج بشكل رهيب في المقابل لو زادت مرتبات الناس كلها في ظل انخفاض الايرادات هايحصل تضخم والاسعار ترتبع جدا يبقي معملناش حاجة كنت بتقبض الف جنيه وتشتري احتياجاتك الاساسية هايزيد مرتبك يبقي 3 الاف جنيه ومش هتقدر تشتري الاحتياجات الاساسية نفسها
واه الشرطة بتصطاد في المية العكرة واي حد يتظاهر دلوقت علشان مصلحته الشخصية بيصطاد في المية العكرة
وبقول للجميع وانا اولهم نشتغل الاول ونزود الانتاج بتاعنا والبلد تقف علي حيلها ووقتها نطلب بحقوقنا
لكن نطلب حقوقنا واحنا مش بنقوم بواجباتنا فمرفوض تماما
زي طالب الامتحان بعد اسبوع وعايز يطلع رحلة يومين ويقول حقي لانى مخرجتش طول السنة طيب يا سيدي عدي الامتحانات وابقي اطلع الرحلة ومش يومين بس لا اطلع رحلة اسبوع لكن بعد الامتحانات

لو اناغلطان حضرتك صحح لي

يا دكتور محمد انا مش باناقشك بهدف غلط او صح , انا فعلا باحاول افهمك اكتر لأني اقتنعت اني مش فاهمك
الأول بصراحة كنت حاسس انك مع النظام السابق , لكن مؤخرا بدأت اراجع نفسي في النقطة دي

عايز اسألك سؤال كمان قبل ما اكمل

هل حضرتك من الناس اللي شايفين ان مصر لازم تكون كويسة و حلوة و متحضرة و متقدمة ,,,,, و مش شرط ان ده ينعكس بالخير على كل اللي فيها او على الأقل مش مشكلة لو اتأخر عليهم شوية ؟

**dr-mohamed** · 13-02-2011 04:50 PM

المشاركة الأصلية كتبت بواسطة tlrsiap

يا دكتور محمد انا مش باناقشك بهدف غلط او صح , انا فعلا باحاول افهمك اكتر لأني اقتنعت اني مش فاهمك
الأول بصراحة كنت حاسس انك مع النظام السابق , لكن مؤخرا بدأت اراجع نفسي في النقطة دي
عايز اسألك سؤال كمان قبل ما اكمل
هل حضرتك من الناس اللي شايفين ان مصر لازم تكون كويسة و حلوة و متحضرة و متقدمة ,,,,, و مش شرط ان ده ينعكس بالخير على كل اللي فيها او على الأقل مش مشكلة لو اتأخر عليهم شوية ؟

هههههههههههههههة
يا راجل يا طيب فيه حد ضد النظام السابق ويخرج كل المظاهرات ضده ومن قبل ما ناس هنا في المنتدي تتولد كمان وكل المظاهرات من 25 الى 28
مصر عمرها ما هاتبقي كويسة وحلوة ومتقدمة ومتحضرة وكلنا خارجين مظاهرات وبنعطل الطرق والمصالح علشان نزود مرتباتنا والعلاوات وناخد شقق من المحافظة
مصر هاتبقي كدة لو كل واحد فينا قام بدوره في مكان عمله
لو انتاجية العامل المصري ارتفعت من 37 دقيقة - و دي احصائيات مؤكدة ومن مصادر علمية متعددة ومتنوعة - الى نسب قريبة من المعدلات العالمية
بعدها من حقنا كلنا نطالب بحقنا ومن حقنا يبقي لينا نصيب في ثروة بلدنا
انما نخربها ونقعد على تلها ونقول لا لازم تزود مرتبي الاول وبعد كدة اشتغل يبقي البلد هاتخرب
تخيل حضرتك ان العاملين في المياه والكهرباء والاتصالات اضربوا ورفضوا العمل الا بعد زيادة مرتباتهم هاتبقي الحياة في مصر عاملة ازاي وقس على ذلك باقي الاعمال
انا مع ان كل فرد يحصل على نصيب عادل من ثروة البلد لكن بعد ما يقوم بدوره الاول
احنا مرتباتنا لم تزد من السبعينات ومن سنين بنطالب بزيادتها لكن دلوقت لا دلوقت البلد وبس

**M.Osman** · 13-02-2011 05:02 PM

للأسف مش ذنبهم

**gassarian** · 13-02-2011 06:49 PM

يا جماعة دول لسة مصرين للأن على موقفهم المعارض للثورة و يحاولون تدمير الثورة بهذه الأفعال... و يجب الحذر من هذا

الموجودين بالتحرير ينظفون الميدان و المعتصمون ينتظرون تعهداً من الجيش بالوفاء بأهداف الثورة من حالة الطوارىء و حكومة الإئتلاف و إقالة الوزارة الحالية ..... و لا نلومهم على ذلك و قد بدأوا يتمركزون في إعتصامهم في الحديقة ( لا أعلم تفاصيل المكان ) حتى لا يعطلوا مصالح الناس ....... حتى الأن الجيش أقر بشرعية المطالب و لكن لم يبدي إنضمامه للثورة....
حيادية الجيش كانت واجبة أثناء أحداث الثورة قبل تنحي الرئيس و لكن بعد التنحي كان من المفترض أن يتبناها الجيش ... حتى لا يشعر الناس أنه كان جزء من النظام الأمني لمبارك
لاحظوا أيضاً أن وجود مبارك على أغلب الظنون في شرم الشيخ يثير حفيظة الناس و يسبب فعلاً عدم الإستقرار..... و معظم الأمور سوف تستقر إذا بدأ إجراءات محاسبتته أو محاكمته ليكون عبرة للأتي من الرؤساء

هذا رأيي

**memo_p910** · 13-02-2011 07:44 PM

في مصنع اخويا ( أدكو ) للأدويه العمال اوقفوا الماكينات وطردوا مديرة قطاع بالشركه واعتدوا على الاداريين شغل بلطجه وعدم ثقافه

**dr-mohamed** · 13-02-2011 08:06 PM

المشاركة الأصلية كتبت بواسطة gassarian

يا جماعة دول لسة مصرين للأن على موقفهم المعارض للثورة و يحاولون تدمير الثورة بهذه الأفعال... و يجب الحذر من هذا

هم مين دول المعارضين للثورة وبيحاولوا يجهضوها ؟؟؟؟؟؟

الموجودين بالتحرير ينظفون الميدان و المعتصمون ينتظرون تعهداً من الجيش بالوفاء بأهداف الثورة من حالة الطوارىء و حكومة الإئتلاف و إقالة الوزارة الحالية .....
والمفروض ده يتعمل في يوم وليلة ؟؟؟

والجيش هايعمل ايه اكتر من البيان رقم 5 ؟؟؟؟؟؟؟
بلاش البعض يدفع الجيش للبيان 6

و لا نلومهم على ذلك و قد بدأوا يتمركزون في إعتصامهم في الحديقة ( لا أعلم تفاصيل المكان ) حتى لا يعطلوا مصالح الناس ....... حتى الأن الجيش أقر بشرعية المطالب و لكن لم يبدي إنضمامه للثورة....
ازاي يعني الجيش يبدي انضمامه للثورة ؟
ظباط وعساكر الجيش ينزلوا يتظاهروا هما كمان ؟

حيادية الجيش كانت واجبة أثناء أحداث الثورة قبل تنحي الرئيس و لكن بعد التنحي كان من المفترض أن يتبناها الجيش ... حتى لا يشعر الناس أنه كان جزء من النظام الأمني لمبارك

هانبدا حملة تشكيك في الجيش ولا ايه الحكاية ؟