منقول: عندما ثار الشعب على الثورة ( كيفية تعامل الرئيس مع ثورة 25 يناير)
الموضوع منقول بناء علي رغبة كاتبه لمعرفة اراء الاعضاء
عندما ثار الشعب على الثورة ( كيفية تعامل الرئيس مع ثورة 25 يناير)ء
1-التجاهل
و ده كان من أول يوم الثلاثاء 25 يناير لغاية الخميس 27 يناير و ده كان باين من التلفزيون المصرى و الجرايد القومية
2- فصل خدمة الانترنت
ده كان يوم الخميس بليل و ده كان من أغبى القرارات اللى اخدوها فى الثورة
3- العنف الشديد من الشرطة
ده طبعا كان الجمعة 28 يناير و ده اكتر يوم راح فيه شهداء -ربنا يصبر أهلهم
4- هروب الداخلية و اللجان الشعبية
طبعا ده كان اسوأ مشهد فى الثورة و مساومة الشعب ما بين الحرية و الأمن
5- الشغل و المرتبات
طبعا قفل البنوك و المصالح الحكومية لأن مفيش أمن و بالتالى مفيش مرتبات و مفيش فلوس و طبعا مساومة تانية بين الحرية و الأكل
6- الأجانب و الجواسيس
مدخلات تليفونية فى كل البرامج بتأكد أن أغلب اللى موجودين فى ميدان التحرير أجانب و مش مصريين و أن المصريين مضحوك عليهم من جواسيس مصريين و من أجانب - و الناس صدقت أن كل دول العالم اتحدت مع بعض فى ميدان التحرير ضد مصر
7- كنتاكى و اليوروهات
كانت أكتر حاجة كوميديا فى الثورة ، ال 500 ألف اللى فى ميدان التحرير بيروحوا علشان ياكلوا كنتاكى - و طبعا كل يوم كان فى بوكت مانى 100 يورو
8- التشكيك فى موقع كلنا خالد سعيد
طلع اللى عمله مش مصرى علشان قال أنه لما دخل على الانترنت أنه شبك على الانترنت و كمان كان داخل على الانترنت فى وقت ما الانترنت كان مفصول على مصر كلها
9- الأخوان المسلمين
هما اللى ورا وجود الناس لسه فى التحرير و أن شباب 25 يناير روح البيت من يوم 28 و هما اللى موجودين دلوقتى و كمان مش بيخرجوا حد من الميدان واللى بيحاول يخرج بيهددوه بالقتل
10- البيان العاطفى للرئيس يوم الثلاثاء 1 فبراير
تقريبا كل اللى سمع الخطاب فوق ال 30 سنة عيط بعد الخطاب و ناس كتيرة كمان تحت ال 30 و ده كان من أذكى الحاجات اللى عملها خلال ال 18 يوم
11- موقعة الجمال و الأحصنة
ديه بئا كانت أغبى حاجة يعملها نظام حسنى مبارك و محاولة فض الاعتصام بالقوة
12- تحذيرات التلفزيون المصرى
أى حد ليه حد فى التحرير يكلمه يقوله روح بسرعة علشان بيرموا مولوتوف من أعلى المبانى - ده كان التحذير - على اساس انهم خايفين علينا اوى
13- استمرار قفل البنوك و مفيش طبعا مرتبات
و طبعا الشعب المصرى ابتدى يثور على الثورة علشان مفيش أكل و مفيش أمن و مفيش مرتبات و كان ده أكبر ضغط على شباب الثورة
14- تعديل الدستور
طبعا ديه كانت حجة مقنعة جدا علشان الرئيس يستمر على اساس ان هو الوحيد اللى يقدر يعدل الدستور
15- الحوار
الشباب هنا كان أذكى جدا من النظام علشان لو كان حدد لنفسه قيادات كانوا عرفوا يسيطروا عليهم بطريقتهم - علشان كده سمعنا كلمة انا مش بمثل حد - أنا بمثل نفسى بس
16- امربكا و اسرائيل واقفين على الحدود
ديه كمان من الحيل الذكية جدا و كانت ملعوية الصراحة
17-التهديد بالجيش
تطبيق الأحكام العرفية و أن الجيش لو مسك الحكم هنشوف ايام سودا
18- بيان أخير من الرئيس
الصراحة مفهمتش فكرته ايه - تضييع وقت و لا محاولة يائسة منه يمكن الشعب يعيط تانى أو يوافق بتفويض نائب الرئيس
و أخيرا مكنش فاضل حاجة تانية تتعمل و كل يوم الناس بتزيد و بيزيدوا قوة و اصرار و مكنش ينفع غير التنحى
يوم تاريخى 11 فبراير 11
السؤال هنا : ايه أكتر حاجة اقتنعت بيها من حيل النظام ؟؟ ده لو اقتنعت اساسا انها حيل
يا ريت حد يقولنا فين اللجان الشعبية دلوقتى و ليه الأمن هرب و فين الأجانب و الجواسيس و فين الدستور اللى مش هينفع يتغير و ليه الجيش مطبقش الأحكام العرفية و ليه امريكا مدخلتش مصر بعد ما البلد بئيت من غير رئيس ؟؟
أخر حاجة رد على الناس اللى بتقول ايه المشكلة لو كان الرئيس كمل ال 6 شهور و مشى بطريقة أحسن من كده
المشكلة فى استحالة حساب الفساد و رئيسه موجود علشان كلها شبكة واحدة و كمان استحالة نفس النظام الفاسد يصلح نفسه فى 6 شهور بس و النهاردة بنشوف وزراء سابقين طالعين يتكلموا عن الفساد و ده استحالة كان يحصل لو الرئيس موجود - ده الجنزورى نفسه طلع يتكلم مع منى الشاذلى
§ ناس هتقول التحرير موجود لو النظام مصلحش نفسه يرجعوا تانى التحرير
طبعا ده استحالة يحصل لأن لو افترضنا أن قيادات الثورة مش هيعتقلوا و هيسبوهم يقعدوا تانى على الفيس بووك محدش هيرضى ينزل معاهم تانى و نكرر نفس التجارب اللى فاتت و نرجع للجان الشعبية و نرجع لضرب السياحة و مفيش مرتبات و مفيش شغل - أكيد محدش هيرضى يجرب تانى كل ده و نبدأ تانى من الأول و نعيد تانى ال 18 نقطة اللى فوق
هو فيه حد بعد ما يوصل للمستوى الأخير من اللعبة - اللى فيها الوحش - يرجع يبدأ تانى من المستوى الأول ؟؟؟
:)))
عموما يا رب الأيام اللى جاية أحسن علشان مصر تستحق أكتر من اللى احنا فيه ده بكتير
مصر فوق الجميع
.
