الموضوع: انفراد حديث صحفى خاص وحصرى مع اتو ايجيبت لنايل موتورز

انفراد حديث صحفي خاص لنايل موتورز عن نيسان والقاشقاى

مع استمرار الانتشار الكبير والمميز لسيارات نيسان باختلاف انواعها وفئاتها
قمنا من أجل أعضاء نايل موتورز باجراء حديث صحفى خاص وحصرى مع اوتو ايجيبت احدى أكبر الموزعين المعتمدين لشركة نيسان
من اجل التعرف على كل ما هو جديد ومميز مما تقدمه شركة نيسان وسنركز فى بداية حديثنا على نيسان قشقاى احدث ما تقدمه نيسان وابرز ما قدمته فى معرض فورميلا الاهرام
مرورا بنيسان تيدا ووصولا للصنى شديدة الانتشار

هذا الحديث هو الاول من نوعه على كافة المواقع الالكترونية وينفرد به نايل موتورز لما نتمتع به من ثقة متبادلة بيننا وبين اوتو ايجيبت

قبل ان نبدا حديثنا نتقدم بكل الشكر لكل فريق العمل باوتو ايجيبت ممن يقومون بخدمة كل العملاء على اكمل وجه

*فى البداية موقع نايل موتورز وقسم نيسان بيرحب بالاستاذ عادل سعيد مدير فرع مدينة نصر فى اتو ايجبت احدى كبرى الموزعين المعتمدين لسيارات شركة نيسان اليابانية ...وكان ليها تواجد مميز فى تسويق طرازات نيسان بمعرض الفورميلا الاهرام 2011 فى جناح نيسان




اهلا وسهلا بيك وبموقع نايل موتورز وبكل وبكل اعضائه الكرام


*اسمحلى حضرتك اطرح عليك بعض الاستفسارات نيابة عن اعضاء نايل موتورز المهتمين بسيارات نيسان والجديد الذى تقدمه نيسان دائما


اكتر شىء يهمنا الرد على استفسارات كل عملاء نيسان وطبعا استفسارات الاعضاء المحترمين بالموقع


*مبروك تألق نيسان فى معرض الفورميلا ووجود مميز لجناح نيسان هذا العام


الحمد لله ودايما بنحاول نبذل اقصى مجهود لكى نصل الى افضل مظهر ممكن يرضى العملاء ومكانتنا عندهم خصوصا فى المعارض الكبيرة وكان من ضمنها معرض الفورميلا الاهرام

*شوفنا القاشقاى فى معرض اتوماك قبل كدا ليه منزلتش بعد المعرض على طول ؟


كان الغرض فى وقت ظهورها اثناء معرض اتوماك هو معرفة مدى تقبل العملاء لشكل السيارة الجديدة حيث انها تمثل ثورة فى عالم السيارات وبناء عليه تم عمل خط انتاج خاص بمصر فى مصنع نيسان بانجلترا


*متى يبدأ حجز العربية ؟ والاستلام بيكون خلال قد ايه؟


الحجز بدا بالفعل وتم حجز السيارات الواردة الينا بالكامل خلال شهرى ابريل ومايو



*ايه سبب التأخير فى التسليم ؟


لان ابتدا انتاج المصنع للسيارة لصالح شركة نيسان مصر تقريبا من 1-1-2011 ومن ضمن اسباب التاخير ايضا الشحن والتخليص الجمركى لان السيارة بتم استيرادها من انجلترا والمسافة كبيرة من شهرين الى تلاتة


*ليه السيارة منزلتش بفتيس اوتوماتيك ؟


خط الانتاج للسيارة ال1600 فى انجلترا بينزل مانيول فقط

والسيارة وزنها 1392 وزن ثقيل على فتيس اتوماتيك تروس , وباذن الله فى القريب يوجد تجارب على تصنيع ماتور 1600سى سى بفتيس اتوماتيك cvt يعطى قوة وعزم هائل متوافق مع وزن السيارة


*بخصوص فتحة السقف البانوراما هل زجاجها مقوى ولا ضعيف ؟


قوى جدا وتقريبا يمثل اضعاف قوة البريبريز الامامى للسيارة


*بخصوص الجنط ال17 والعفشة ياريت بعض التوضيح ؟


الجنط مقاسه 17 فعلا ولكن لا يوجد منه اى تاثر على العفشة لان كاوتش السيارة فيه سمك كافى لامتصاص الصدامات الخاصة بالطرق المصرية حيث ان مقاس الكاوتش , 215 / 60
وسمك الكاوتش حوالى 13 سم من الكاوتش لغاية الجنط فبالتالى مش حتحس باى مشكلة منه فى مسائلة العفشة


*ليه القشقاى منزلش منها 2000سى سى ؟


لان اى جمارك سيارة 2000 سى سى تمثل حوالى 150% من تمن السيارة وبالتالى سعر السيارة حيكون مبالغ فيه جدا


*هل تعتبر القاشقاى بما انها بتتقفل فى انجلترا تعامل مع الجمارك على اساس انها من العربيات الاوربية وبالتالى ممكن نلاقى فى تحفيض فى موضوع الجمارك ؟


بالظبط كدا , حيث ان السيارة يابانية , ولكن بلد المنشا انجلترا (اوروبا) وسيسرى التخفيض الجمركى عليها مثل السيارات الاوروبية


*نخرج بقا من القاشقاى وندخل فى حبيبة الشعب , الصنى اليابانى المصرى , العربية الحمد لله عليها اقبال ممتاز وانتشار فى السوق المصرى , تعلقيك ايه ؟


السيارة ناجحة ومنتشرة وذلك لانها تتطابق مع احتياجات المستهلك المصرى ولان السيارة تمثل قيمة اكبر بكثير مما يدفعه العميل , واكبر دليل على ذلك انتشارها


*برغم الانتشار اللى بتحققه الصنى لكن هناك بعض الشكاوى ,اهمهم موضوع الاستهلاك , وموضوع التقفيل المصرى فى ناس بتشتكى منه فايه رأيك ؟


بشكل دائم شركة نيسان دائما ما تستطلع اراء عملائها بصفة مستمرة ودائمة التطوير فى السيارة
ابتداء من موديلات 2008 وماتم فيها من تغير المساعد وموديل 2010 واضافة عوامل الامان فى فرامل السيارة abs واضافة الفوج لايت فى جميع موديلات صنى وموديل 2011 اضافة اوكسجين سنسور لحل مشكلة استهلاك الوقود واضافة كاتيجرى جديد سوبر صالون هاى لاين بزجاج ملون

وكل ما سبق تم بناءا على طلب واستجابة لرغبات العملاء

وبخصوص التقفيل المصرى فلن نجد مصنع يجيد تقفيل السيارة فى مصر مثل مصنع نيسان اليابان حيث ملكية المصنع واداراته ترجع لنيسان اليابان


*بخصوص العربية الصنى الهاى لاين هل ممكن نلاقى اضافات تانية ممكن تنزل على السيارة فى المستقبل غير الفاميه , وخصوصا مكدبش عليك الناس فعلا كانوا مستنين شوية اضافات زيادة , مثل المالتى فنكشن وفتحة سقف


نحن فى تطور مستمر بناء على رغبات العملاء وفى حالة تطابق رغبات العملاء مع المالتى فنكشن وفتحة السقف من الاكيد كما عودتنا نيسان سيتم تلبية هذه الطلبات



*الصنى 2012 اللى نزلت فى الصين وشوفنا صور عنها فى موقع النايل موتورز وفى مواقع كثيرة على الانترنت , حتنزل مصر امتى ؟


من المتوقع مش اقل من سنتين على الاقل ومن الصعب توقع اى شى فى السوق المصرى


*رايك فى التيدا المكسيكى الموديلات الجديدة والفرق بينها وبين اليابانى الموديلات القديمة


مفيش اى فرق فى الجودة بين الاتنين لان الاتنين فى النهاية بيخرجوا تنحت مظلة نيسان
وبالعكس التيدا المكسيكى زادات بوسائل الامان فى السيارة فى كل الفئات ,الخاصة بالحماية من السرقات وعوامال الامان الخاصة امان الراكب والسائق
مثلا اول فئة بقت فى التيدا المكسيكى فيها اتنين ايرباجز , والتيدا الموديلات القدمية كانت بتنزل اول فئة بايرجز واحد للسائق
واول فئة ايضا فيها فوجات ومكنش موجود فى الموديلات القيدمة وايضا بعض الاوبشانات الاخرى المختلفة

*بالنسبة لاتو ايجيبت ايه السر فى خلطة الحب اللى بتوجدوها مع العميل سواء قبل الشراء او حتى بعد البيع ؟


بالنسبة لما تمثله قيمة العميل بالنسبة الى الشركة والالتزام والمصدقية مع العميل هو سر النجاح ونتيجته هو حصول الشركة على اعلى شهادة تقييم من خلال العملاء من شركة نيسان
للعام التانى على التوالى وذلك نتاج مجهود رهيب تم بذله مع العملاء باخلاص وتفانى فى العمل
ونتمنى دائما المحافظة على ما وصلنا اليه

*هل من المتوقع وجود تعاون بين اتو يجبت احد انجح موزعى نيسان المعتمدة وبين موقع نايل موتورز واعضائه ؟

اكيد لان موقع نايل موتورز من افضل مواقع السيارت واشهرها ويشرفنا التعاون معكم وباذن الله قريبا جدا



*ياترى متابعين موقع نايل واخبار قسم نيسان ؟

اكيد ومتابعين تقارير الاعضاء عن سيارات نيسان وموضوعاتكم المميزة واستفسارات الاعضاء فى قسم نيسان عن سيارات نيسان
وايضا لان موقع نايل موتورز من المواقع المحترمة واللى ليها شهرة كبيرة فى تخصص مجال السيارات

فاكيد بنتابعكم

*حنشوف امتى لاتو ايجيبت مراكز خدمة لنيسان خصوصا انكم ناحجين جدا بشهادة كل العملاء من ناحية البيع ؟


فى اقرب وقت , ويتم التحضير بالفعل حاليا لافضل واكبر مركز خدمة سيارات لنيسان فى مصر واكيد الصيانة فى مركزنا سوف تكون بنفس جودة عملية البيع , وانتظرونا قريبا خلال السهور القادمة بصرح عملاق لايقل عن اى مركز خدمة موجود خارج مصر
ووانتظروا ايضا عروض ومفاجاءت لاعضاء النايل موتورز باذن الله

وفى النهاية
يعجز لسانى عن شكر حضرتك لسعة صدرك و تلبية دعوتنا للحديث الشيق والجميل اللى طرحنا فيه اسئلة واسفسارات هامة تهم معظم ومحبى وعشاق سيارات نيسان
وايضا الحصريات والمفاجاءات لموقعنا بخصوص باذن الله اافتتاح مركزكم مركز الصيانة فى الشهور القريبة
وبتمنالكم من قلوبنا النجاح والتميز كالعادة ,
وتقبل منى ومن موقع نايل موتورز و اسرة اعضاء قسم نيسان بالموقع خالص التحية والشكر والتقدير

قام باجراء الحوار لنايل موتورز

احمد مصطفى
ahmed.tv
المنسق العام لقسم نيسان