نهب حضاّنة المرور فى الاسكندرية وسيتى سنتر 28 يناير شاهد عيان
ثورة الجياع حصلت فعلا وشفتها بعينى فى يوم 28 يناير جمعة الغضب بعد ما الشرطة انسحبت والشهداء والاحرار سقطوا ودفعوا ضريبة الدم لهذا الوطن اللى للاسف بعض ابناءه ما عندهمش دم ماذا فعل بعض سكان العشوائيات القريبة من كارفور اسكندرية شئ لايصدقه عقل ولا يتوافق مع اى دين او شرع
الساعة 6 مساءا تقريبا وبعد انسحاب الشرطة بدأ الفزع العظيم
جحافل من الجياع بتجرى على كارفور من نادى الصيد والحضرة الجديدة الصبحية والدريسة وعزبة الرحمة وعزبة الجمهورية والتيرو وغيط العنب وغيرها الناس دى عملت عمايل فى المحلات اللى فى السيتى سنتر كلها مش بس كارفور ناس كانت بتجرى بعربيات اليد بتاع التسوق داخل كارفور ومليانة فراخ مجمدة وجمبرى ورز ومكرونة ولحوم وكل اللى يقدروا عليه وواحد كان بيجرى بفخدة بقرى كاملة وزنها قريب من وزنه
انا ساكن قريب من المكان وشوفت العجب وناس تانية واعية دخلت محلات الملابس والدهب والساعات والنظارات
والاغرب ان بعض البائعين نهبوا محلاتهم اللى بياكلوا فيها عيش وهربوا والسلع المنهوبة معروضة دلوقتى للبيع باسعار بخثة من الماكياج والعطور لحد المجوهرات وده عن تجربة شخصية لناس عرضت عليا الشراء وربنا يعافينا من الحرام
المنظر الاشد ايلاما للنفس وهو انى كنت مروح البيت بالعربية الساعة 8 مساءا يوم الغضب وعند مزلقان محرم بك القريب من المرور والحضانة بتاعة العربيات لقيت مئات الموتوسيكلات والتكاتك والسيارت المسروقة فى مشهد عبثى طبعا مش دايرة لكن كل مجموعة بتزق عربية او توكتوك ومش عارفين ان الحاجات دى بتاع مواطن غلبان اتصادرت منه مركبته من ظابط ظالم واتحطت فى حضانة امر بانشاءها محافظ ظالم وبدا مسلسل التخريب وظهر اسوء ما فينا اللى مش قادر يزق العربية وتعب بقى يكسر وياخد اللى يقدر عليه حتى الكاوتش
وشر البلية ما يضحك واحد بيجرى بتوك توك داير ومش عارف يسوق قام اتخبط منه سابه ورجع يجيب واحد سليم غيره
وبعد الموضوع ده بعدة ايام ونزول الجيش قامت اللجنة الشعبية اللى فى المنطقة بمساعدة الجمعية الخيرية للحى بالاعلان فى ميكروفون المسجد عن اعطاء فرصة للناس اللى اخدت حاجة من الحضانة بتاعة المرور سهوا .....!!!!!!!! هههههههههههه ترجعها وعفاالله عما سلف وبالفعل تم تجميع عشرات المركبات من كل نوع فى شارع واسع ومن هذه المركبات للعجب عربيات اليد بتاعة كارفور بس فاضية ؟؟ طبعا
وبعد عشرين يوم من يوم الغضب لسه التكاتك والموتسيكلات وبعض السيارات مركونة فى مكان واسع قريب من محطة محرم بك ولكن بدون لوحات معدنية ولا اى شئ يدل على اصحابها
الناس يومها جات لها حالة هيسترية و جنون مؤقت ادى الى تشويه جمال الثورة النقية وزاد الرعب فى قلوب الابرياء والاطفال ومنهم ابنى ربنا يرحمنا برحمته الواسعة ويهدى قومى فانهم لا يعلمون