أنا عاوز أبلغ عن مصيبة هاتؤدي لكارثة فالمستقبل أبلغ ميييين؟؟؟

**Xander2010_Evo** · 14-02-2011 03:53 AM

بسم الله الرحمن الرحيم
السلام عليكم ورحمة الله وبركاته يا رجالة
بالمختصر المفيد فاكرين لما قال عمرو أديب مش فاكر فالحلقة الكام المهم قبل تنحي الرئيس
عن الناس إلي فالصعيد والفلاحين إللي إستغلوا فترة الهيصة
وشغالين في حكاية وضع اليد ع الأراضي والبناء علي الأراضي الزراعية
أنا كنت فاكرو بيهزر كالعادة
لكن بشوف بعيني الأيام دي حاجة غريبة جدآآآآ
إستغلالآ لفرصة الفوضي الأيام دي
الناس دلوقتي في حالة بناء وزيادة أدوار للبيوت بطرقة فظييييييييعة جدآآآآ
الإبراج إللي بعد ما إتبنت من سنتين مثلآ جاي يزود دور أو إتنين
البيت إللي مبني من 10 سنين مثلآ في وسط الحواري والمناطق الشعبية هوووب إبني يامعلم
بلا تراخيص بلا قرف
الناس دي مش حاسين إنها هاتيجي في يوم علي دماغهم
حوادث إنهيارات البيوت والعمارات هاتبقي كتيرة جدآآآ كوارث ياجماعة
لما برج مثلآ إرتفاعه 12 دور يقع يانهااااااري
أو بيت في حتة شعبية مثلآ وجنبه بيوت كتيررررة جدآآآآآ لازقة فيه
كللللللللله هايقع
أعمل إيييييييه أنا مش عارف أبلغ مين أساسآ ولا أقول إيه ولا أعرف منين الناس دي معاهم تراخيص ولا لأ علشان منظلمش حد
لا في شرطة ولا أي حد فايق أساسآ للناس دي منهم لله
أرجوكم لو حد شايف نفس المشكلة دي في منطقته يا جماعة مايسكتش
مصر فعلآ هاتنهار لو فضلت ع الحال ده
الساكت عن الحق شيطان أخرس
اللهم قد بلغت ..اللهم فإشهد

**heshamzaky** · 14-02-2011 03:56 AM

ما تقلقش يا باشا . أحمد شفيق تحدث فى هذة النقطة دى تحديدا الخاصة بموضوع الاراضى الزراعة و وعد أنة لن يتهاون . الراجل دة مش بيهزر و أعتقد حا يتم هدم الكلام دة و قال أن حتى التكلفة حا تكون على الى عمل كدة يعنى ممكن يحملة تكاليف نقل الردش الى أتهد كمان

**S H @ F T** · 14-02-2011 03:59 AM

لحكومة تعلن عن خط ساخن للإبلاغ عن حالات الفساد المالي والإداري يا ريت كلنا نبقى إيجابيين وبروح 25 يناير نكسر حاجز الخوف ونبلغ عن أي حالة نعرفها: 16117 .. لأن دي فلوس الشعب

**نور القمر** · 14-02-2011 04:03 AM

لسه كانوا جايبينها على النيل الفضائية وبيصوروا في بعض المناطق
متقلقش ان شاء الله الحكومة مصحصحة
ومن السلبيات اللي شوفتها النهاردة في شارع الهرم اللي اول مرة انزله من احداث 28 يناير
التكاتك اللي ملت شارع الهرم ولا كمان في منتهى السعادة بالفوضى اللي عاملينا
ومشهد تاني مكنتش مصدقة عينيا لما شوفته
بياعين الخضار والجبنة بوع الفيوم فارشين على رصيف البنك المركزي وعاملين الرصيف سويقة !!!!!!!!!!!!!!!

**dr-mohamed** · 14-02-2011 04:03 AM

زي ما قال اخونا هشام بيه الفريق احمد شفيق هدد بعنف انه هايروقهم
وفيه رقم الجيش عمله للمخالفات اللى زي دي مش فاكره بصراحة لو عند حد يا ريت يكتبه
وكل واحد فينا يشوف مخالفة زي دي يبلغ عنها فورا
دي بلدنا كلنا
ومن النهاردة مش هانسمح لحد يخربها
الناس اللى ماتت واصيبت معملتش كدة علشان ناس تانية تبني وتعلى
علشان البلد كلها تعلى وتعلى

**dr-mohamed** · 14-02-2011 04:07 AM

نور القمر ما انا قلت عن التكاتك دي من يوم 29 ومحدش صدقني وقالوا انت بتشوه صورة الثورة

**nevozaky** · 14-02-2011 04:09 AM

زى ما الزملاء كانوا بيتكلموا ان الفريق احمد شفيق كان بيقول انه هيتصرف بمنتهى القوة مع اللى بيبنى فى الاراضى الزراعية .بس حضرتك بتقول انهم بيعلوا البناء .والعقارات فعلا مش ناقصة كوارث .بس هوه كل كلامه على الاراضى الزراعية

**nevozaky** · 14-02-2011 04:12 AM

طيب فى اكتر من واحد اتكلموا فى قناة اون تى فى وبيستغيثوا ان فى ناس بتدخل ومعاها سنج ومطاوى وتستولى على بعض الشقق الفاضية .وبيستولوا على عمارات بالكامل .

**heshamzaky** · 14-02-2011 04:16 AM

المشاركة الأصلية كتبت بواسطة dr-mohamed

نور القمر ما انا قلت عن التكاتك دي من يوم 29 ومحدش صدقني وقالوا انت بتشوه صورة الثورة

دكتور محمد أزيك يا باشا . بص الى أنا حاسة أن الراجل دة حا يظبط المرور صح الصح لآنة لمح لحاجة زى كدة بس بصورة مستترة ز بص النهاردة فى روكسى شوفت مشهد غريب شوية ظباط المرور و كام امين واقفين مالهومش اى لزمة تخيل لقيت بعدها عساكر من الشرطة العسكرية حوالى 20 فرد بدأم فى الانتشار فى الميدان و معاهم البطاريات بتاعت الاشارة و بدئو فى تنظيم المرور و حتى الميكروبصات الى واقفة صف تانى مشوها . الامر الايجابى أن كل قائدى السيارات تعاونو و أحترمو الاشارات لما عساكر الشرطة العسكرية نظمو المرور و المشهد دة شوفتة برضو أمام المحكمة فى شارع عبد العزيز فهمى مصر الجديدة برضو