انا نفسى افهم ليه عندنا تجارة العربيات فيها نصب وتضليل وتكتيم زى ماتكون تجارة مخدرات حاجة غريبة فعلا وده لمصلحة مين ده المفروض فى ظل الاقتصاد الهباب اللى بتمر بيه البلد انهم يطلعوا كل اللى عندهم ويبيعوا ولو بهامش ربح قليل
النهاردة انا روحت المصرية للسيارات وحسيت ان كلام الناس عنهم صح انهم شركة وحشة - تحس انهم هليهلية كده وملخبطين وكدابين - انا مكلمهم امبارح فرع طنطا قالولى ان ال gl موجودة بكل الوانها ولما روحت النهاردة عشان اشوفها واركبها واخد قرار نهائى لقيتهم بيقولوا مفيش عربيات واقفة فى العرض (ولا عربية بريليانس من أى موديل) وعملوا فيلم قالوا استنى اما نشوف الجرد على الكمبيوتر وشوية حركات كده وبردو قالو لأ مفيش خالص بس يعنى لو حبيت تخلص احجزها وهنجبهالك من اى معرض!!
قولتلو ياعم انا بكل صراحة جاد فى الشراء بس مركبتهاش شوفتها بس من برة عاوز اركبها واشوف صالونها ظروفه ايه عشان انا طويل هشوف هبقى مرتاح فيها ولا ايه قاللى لأ دى مية مية واسعة وتجنن ومشكورا قالى انا ممكن اجيبلك صور صالونها من عالنت هههههههه قولتلو والله كتر خيرك انا درستها عالنت بس انا جاى ادفع 75 الف جنيه من المنطقى انى اركب العربية الاول وأطمن ليها مية فى المية مش هرمى فلوسى فى الأرض ازاى يعنى اجى اخلص فى عربية مركبتهاش مرة واحدة حتى قالى ممكن تشوف اى حد من صحابك جيرانك تكون معاه العربية وتجربها قولتلو اه والنبى معاك حق هى بنها عندنا كلها فيها عربيتين او تلاتة اقف انا عالكورنيش بقى استنى اى واحدة منهم تعدى اوقفها اقولهم والنبى اخد لفة عشان اجربها لاحسن عجبانى
شركة غريبة ومش هم وبس كل المعارض نصابين وحرامية بس يا ناس دول الافات بتتدفع مش اى حاجة يعنى مش موبايل دى عربية
الغريب انهم ذوق فى المعاملة!!!