قبل الثورة تركي وبعد الثورة مصري

حقيقي أنا قبل الثورة كنت قرفان جدا من البلد ومن اللي بيحصل فيها وكنت أتمنى أي جنسية تانية وكان فيه موضوع على المنتدى هنا بيتكلم عن "تتمنى تكون جنسيتك إيه" ، وأنا من ضمن الناس الي كانت تتمنى إنها تكون غير مصرية حقيقة، لكن بصراحة بعد الثورة الواحد حس إنه مصري ولازم يفضل مصري ، والكرامة رجعت تاني. لكن بجد احنا اللي بأيدينا نصنع العزة والكرامة والوطنية واحنا اللي بأيدينا العكس. كنا بنشوف الفساد بعنينا ومش قادرين نتكلم أو كنا بندفن راسنا في الرمل زي النعام. كنا بنخاف نقول للظالم لأ، وكنا بننكسف نقول للغلط لأ، كنا للأسف بنقلد الحاجة الوحشة زي رمي الزبالة في الشارع وكسر إشارات المرور ودفع رشاوي لتيسير الأعمال وكان لسان حالنا " كل الناس بتعمل كده هي يعني جت عليا أنا". نسينا أصلنا ونسينا احنا مين ومن أجدادنا ومين رسولنا علشان كده ربنا خلانا نعيش في جهل وظلام وفساد. يا جماعة أنا كنت بعمل أخطاء من دي، لكن بجد دلوقتي أنا بحب مصر جدا وبقول بأعلى صوتي أنا آسف يا بلادي إني فكرت أغير جنسيتي وإني فكرت في تشويه صورتك بالرشاوي والزبالة، أنا من أول لحظات الثورة قررت إني أبذل كل مجهودي في رفعة وطني وتجميل صورته وإرضاء ربي. والحمد لله إني صحيت من الغيبوبة اللي النظام السابق كان معيشني فيها. الحمد لله رب العالمين