الموضوع: نوارة نجم تكتب: إلى حبيب الملايين: المجلس الاعلى للقوات المسلحة

بعد التحية والاشواق واالمحبة العميقة والعواطف الجياشة والشكر والعرفان
عايزين منكم كام حاجة كده، وبرضه انا حافتح التعليقات عشان اللي نفسه في حاجة يقولها لكم
اولا: والنبي الرائد احمد شومان، احنا في مرحلة ثورة، ارجوكم احنا طالبين تكريمه، مش عقوبته، مش استهانة بقوانين القوات المسلحة اللي كلنا بنحترمها، بس ده ظرف استثنائي لا ينطبق عليها القوانين العادية
نرجوكم الا توقعوا به اي عقوبة واذا كان صعب تكرموه، ما تعاقبوهوش واحنا حنكرمه تكريم شعبي بمعرفتنا
ثانيا: والنبي المعتقلين السياسيين قاعدين في السجن ليه؟ دول حتى عبء عليكم، طلعوهم بقى
ثالثا: هو انتوا مش فضيتوا الميدان؟ خلاص بقى، لازمته ايه قانون الطوارئ
رابعا: عمر سليمان ايه اللي حيتقلد منصب رفيع؟ لا والنبي، لا انتوا بتحبوه ولا احنا بنحبه، هو اتكتب علينا؟ طب بصوا، طب لو ضروري ادوله منصب يبقى ركنة كده، اقصد منصب رفيع قوي بحيث ما يبقاش له اي دور، احنا مش بنثق فيه، واسرائيل وامريكا بيحبوه، وبيكرهوكوا زي ما انتوا راسيين وزي ما اتكتب في ويكيليكس، مش كويس يبقى فاعل، مش كويس لا عليكم ولا علينا
ولو انه لازم يتحاكم على تعذيب الناس وقتل الفلسطينيين وبدو سيناء، بس اذا كان اصفر قوي، يبقى يتحط في منصب ما يعملش فيه حاجة
خامسا: يا تشيلوا شفيق يا راجل ده، يا تعلموه يتكلم مع الشعب ازاي، ده بيقول على المخلوع "الرئيس"، لا يتعلم يكلمنا ازاي احنا ما نحبش حد يكلمنا بالطريقة دي
سادسا: بالنسبة للجنة اللي بتعدل الدستور الحالي، احنا عايزينكم تطلبوا منهم انهم ينزعوا من رئيس الجمهورية صلاحياته اثناء التعديل المؤقت ده، بحيث ان التعديل الدائم اللي حنعمله بعد كده يبقى في سلطة المجالس التشريعية المنتخبة انتخابات نزيهة من قبل الشعب
سابعا: اي خدمة؟ اي مساعدة؟ عينيا، اللي انتوا محتاجينه منا في التنظيم والادارة وكده، احنا معاكم
ثامنا: احنا عايزين نجمد املاك واموال مبارك ونظامه
تاسعا: حطوا مبارك تحت التحفظ وقولوا لنا انكم عملتوا كده عشان نطمن
عاشرا: خليكم معايا على التليفون، اللي يتصل بيا خمس مرات ورا بعض اقطعوا عنه الخط
حداشرا: ساعدونا نطهر جيوب الفساد في مؤسسات الدولة
اتناشرا: انا باحبكم قوي... وكلنا بنحبكم قوي
تلتاشرا: بصوا على التعليقات عشان يمكن اكون نسيت حاجة اي حد الشباب يفتكرها
---------
اه نسيت.. تبرعات ميت مليار ده ايه؟ لالالالالالا مافيش الكلام ده، طبعا انا مش حاقولكم، بس مافيش حد حيلم تبرعات ميت مليار لاي حد، احنا لنا فلوس وحترجع ان شاء الله، ومافيش حد حيلم تبرعات... احنا ناقصين استرزاق؟ احنا بس ربنا يوفقنا ونعرف نجيب فلوسنا