(( كبر العصفور جوة ميدانه )) بقلمي totaa

**totaa** · 14-02-2011 11:30 PM

كبر العصفور قبل أوانه

و إتمرد أهوه على سجانه

حتى الخوف ساب قضبانه

ورحل لبعيد ......

والحزن أعلن عصيانه

لما الفرح احتل مكانـــــــــــه

وملا قلوب شبانه

بحلم جديد........

جانا النيل فاتح أحضانه

سلم على أهله وخلانه

والحب زاد من فيضانه

والكل سعيد........

الله ع الورد في بستانه

لما الحر يثور في مكانه

ويقضي على الشر وطغيانه

بإرادة حديد..........

محلاه الشعب بأوطانه

بطولاته مسجلها زمانه

ولا يمكن أبدا نسيانه

يوم ثورتنا ودمك يا شهيد..

وزمان إتقال :ـ

البيت يُعرَف من عنوانه

واذا كان عنوان بيتنا ميدانه

بجيشه وثواره وحماس مالي وجدانه

تِبقي في القلب يا مصر أكيد..

وقالوها حكمة:ـ

الفرع بيقوى بأغصانه

وسيف الحر تملي لسانه

وان شاف منكر بيغير فيه ببنانه

حتى لو مات أو كان العمر منه مديد

بقلمي

totaa

**nabaster** · 15-02-2011 05:45 AM

كلمات معبره فعلا

فرحة المصريين الايام دي متتوصفش

A.Yakout

**nonetta** · 16-02-2011 12:43 AM

برافو يا توتا
انتي فين من زمان وكلامك الجميل فين
ولا انا اللي مش بادخل المنتدى كتير الفترة الاخيرة
حمد الله على سلامتك

**totaa** · 16-02-2011 10:23 PM

المشاركة الأصلية كتبت بواسطة nonetta

برافو يا توتا
انتي فين من زمان وكلامك الجميل فين
ولا انا اللي مش بادخل المنتدى كتير الفترة الاخيرة
حمد الله على سلامتك

ربنا يخليكِ نونيتا
أنا بالفعل مش بدخل كتير لأنك ملاحظة طبعا
إن اهتمامات الناس هنا بعيدة قليلا عن الشعر والخواطر
وكلما اشتقت لتواجدي بينكم نثرت بعض حرفي هنا ..
شكرا لتواجدك ورقة حرفك ...