الموضوع: المرور المصرى الجديد .. ! هل من مغير معنا ؟؟

السلام عليكم ورحمة الله

اولا وقبل اى حاجه خلونا نفتكر مع بعض ثورتنا الجميله ونفرح بالى عملناه والى التاريخ المصرى بل والعالمى كمان هايذكره دوما على مر العصور .




ومع فرحتنا دى بردو خلونا نتذكر شهدائنا الى سقطوا امام عينينا
ويلا مع بعض نقرا الفاتحه على روحهم ...









ودلوقتى نبدأ مع بعض موضوع بسيط وسهل جدا بس عدم الالتزام بيه بيسبب مشاكل صعبه ومابتتحلش ..
وهى مشكلة قواعد سير عربياتنا فى الشوارع .
انا عارف ان فيه تلت طبقات دلوقتى هايقرو الموضوع .. طبقه عارفه وبطبق ودى نادره جدا
وطبقه عارفه ومش بطبق والله اعلم بسر عدم التطبيق اذا كان كسل او ماشابه
وطبقه مش عارفه اساسا ودى اخطر طبقه لانهم للأسف بيبقو اكيد اتعلمو على ايدين ناس معندهمش ضمير زى مدارسنا الجميله بتاعت تعليم القياده ...

وبالمناسبه فيه موقف حصل مره مع قريبة واحد صحبى .. كانت راحه مدرسه فولانيه لتعليم القياده وطلعت مع مدرس فى عربيه . تخيلو ماذا كان اول درس لها ؟؟؟؟
( بصى يامدام ؟ حضرتك تسيبك من المرايتين الى فى الجنب دول وسيبك من مراية الصالون دى .. انتى اهم حاجه تركزى فيها وانتى ماشيه كبوت عربيتك !!!!!!!!!!!!!!!!!!!!!!!!!!!!!!!!! )
طب بذمتكو دى منظر مدرسه ؟ ده منظر مدرس بيعلم اجيال هاتنزل تسوق فى الشوارع بين الناس ؟؟؟






المهم نرجع لموضوعنا وهو قواعد مروريه يجب ان تتبع .. والى اهمهم طبعا الحاره المروريه

خلونا الاول نعرف ايه فايدتها .. فايدتها اننا بنخلق شارع منظم مهندم كل واحد ماشى ومطمن على عربيته






مش ينشغل بخوفه عليها ان حد يحوكها من هنا ولا من هنا بسبب اختراق عدد من الصفوف الزائده عن قدرة الطريق بين العربيات وبين الصفوف لخلق حارات مروريه شخصيه خاصه بيهم !







وفى نفس الوقت ليها معادله حسابيه عن طريق السرعه والكميه بمعنى :

تخيل كده لما طريق بعرض اربع حارات ماشيه بسرعة 60 او 70 كيلو متر فى الساعه داخله على مفترق طرق او اشاره
بحيث انهم مثلا يبقو اربعين عربيه ..
وفى نفس الوقت تخيل لما يبقى نفس الطريق ولكن بعرض خمس ست حارات افتراضيه من الناس وعلى سرعة 80 90 كيلو متر فى الساعه وداخله على نفس مفترق الطرق هايبقى عدد السيارات كام ؟؟؟!!

معنى كده ان الحاره المروريه الى بنستهين بيها دى داخله من ضمن اسباب الزحام المصرى فى المرور !

جميل يبقى كده نقدر نقول اننا لازم نلتزم بالحاره والسرعه عشان اولا نخلى منظر بلدنا منظم وحضارى وثانيا نعمل على تخفيف الزحام بالمعادله الى شرحناها دلوقتى .



ثانيا .. اصحاب السيارات الى نفسهم يخلعوا دراع الاشاره بتاعهم من الطابلوه ... تخيل كده لما تبقى انت الى ماشى وقودامك واحد من غير اشاره فجأه ضرب فرامل عشان ياخد ملف .. هاتعمل انت فيه ايه ؟؟ اكيد هاتفتح الازاز وتسمعه مالذ وطاب ! ( او زى جورج عزمى : ياخى يلعن ابو دى تفاحه :) )


ده نفس الاحساس الى حضرتك بتوصلهولنا بعدم استعمال اشارتك .. انت لما بتستعملها بتعرف الى وراك انى هاهدى وبتعرفو انى هالف وبتعرفو انك لازم تاخد يمينى او شمال وتبعد عنى .. وبتعرفو انه يبدأ ياخد بالى فى مرايتو عشان يتأكد ان مفيش حد وراه قبل مايعديك ... تخيل كل ده بتعرفو من حركة الدراع دى .. طب ليه بتكسل .. ليه بتستهين بيها ؟؟




يبقى كده اقدر اقول تانى اننا لازم نركز عالموضوع ده ياشباب صدقونى دى اهم من انك ازاى تحرك العربيه اصلا من مكانها !


ثالثا بقه ودى الاهم لانها شامله النقطتين الى فوق : بجانب التزامنا بالحاره والسرعه والاشاره لازم ندمجهم مع بعض ونلتزم بنوعية الحارات الى ماشيين فيها .. من ناحية السرعه واستعمال الاشاره لدخول ملف .. حجم السياره .. الحاره الى ماشيين فيها .... بمعنى

كلنا عارفين ان البطئ يلزم اليمين وبنشوفها فى كل مكان .. ده ان دل بيدل على ان ليه حكمه بردو ..
دلوقتى احنا كسائقين كراسينا كلها عالشمال .. معنى كده انى لما اجى اعدى من جنب عربيه قودامى لازم اعدى من شمالها عشان اقدر اشوف قبل ماعدى فيه مين قودامى .. صح ؟؟؟ مش هاقدر اشوف يمينه وانا قاعد علاشمال .. بعكس الحال فى بريطانيا مثلا السواق عليمين فابالتالى حارة التعديه او pass lane بتبقى فى اقصى اليمين عشان يقدر يشوف بعينو مين الى قودامو قبل مايخش ....
من هنا جات فكرة الالتزام بالسرعه البطيئه خالص فى اقصى اليمين عشان الى هايبقى اسرع منه يقدر يعدى من شماله بكل سهوله وامان بعد مايكون كشف بعينه الطريق ..

وطبعا ماننساش ان التنقل بين الحارات ده لازم يتم بإشاره عشان تعرف الى جاى وراك انه يهديلك بدل ماتلاقيه كبس عليك ومعلقلك الكلكس زى مابنشوف كتير فى الشوارع .
وماننساش بردو ان بجانب حارات الطريق المعروفه فى السير فيه دايما قبل اى ملف حاره خاصه بالملف .. يعنى بيديلك فرصه انك تهدى براحتك عشان ماتضايقش الحاره الشمال الخاصه بالطريق الى هى مفترض انها اسرع حاره ...
فأرجو بردو نلتفت ليها ومانستهنش بيها والى يقولك ياعم انا اشضمنى الاقى حجر الاقى مسمار خلينى بره فى الامان واجى عند الملف والف
ياجماعه اكتر من مره حصل حوادث قودامى بالطريقه دى .. الى الناس مستهينه بيها
واحد ماشى بسرعته والى قودامو ماشى فى الحاره الشمال وجنبو حارة يوتيرن
وفجأه راح مهدى ولافف على واسع من بره وراح الى وراه لابس فيه وش علطول .. !






نيجى لااخر نقطه ... الى دايما بتغيظنى !
حضرتك دلوقتى معاك عربيتك وفيها لمبات شبوره ورا وقودام .. هل حضرتك شايف انها شياكه للعربيه ؟ هل حضرتك شايف انها مظهر من مظاهر التفاخر بالسياره ؟؟




الشبوره دى مجرد لمبه ولكن معموله بإنعكاسات اعلى شويه عشان تقدر تشوفها وسط الضباب .. فتخيل بقه كمية الانعكاسات دى الى بتبان فى وسط الضباب حضرتك بتوريهالنا بليل ... ليه ؟؟؟؟؟
وبالاخص الشبوره الى ورا والى مشهوره بيها جدا الاسبرانزا الكبيره !!!!!!
دايما الاقى بتوع الاسبرانزا الكبيره منورين الشبوره الى ورا وعامييييين بيها الى وراهم .. ياجماعه دى مش وقتها
كل حاجه وليها وقتها ماتأذوش الناس بالحاجات دى ..




اسف عالاطاله ولكن كنت حابب نتناقش فى موضوعات زى دى من زمان ولكن مجتليش الفرصه بس حسيت دلوقتى ان اليومين دى اجمل فرصه .. لانها فرصه تغيييير بلد بأكملها بأخلاقها بسماتها بكل حاجه حلوه فيها كانت مدفونه ....

شكرا ليكم وبإنتظار تعليقاتكم الى اكيد هاتفيد اكتر وكلنا هانستفيد وانا اولكم




السلام عليكم ورحمة الله


محمد سمير

هههههههههههههههههه منا فاهم انك بتهزر

وانا مقتنع زيك تمام ان كل الحاجات دى بتحصل من الميكروباصات اولا ثم التاكسى ثم بعض الملاكى


بس انا متفائل ان شاء الله اننا عالاقل نلاقى تغيير ملموس فى المرور كمان بعد ماغيرنا البلد كلها