الشرطه وعيوبها وكيفية المعالجه
بصراحه انا من الناس اللي بتعامل مع الشرطه بصفة دوريه وشبه يوميه وده بحكم عملي يعني اعرف عنهم كتير جدا لكن اكتشفنا انهم مهمين جدا في حياتنا مش بس في المرور والشارع لكن في تنفيذ الاحكام وحفظ الامن لان من غير الشرطه مفيش حكم هيتنفذ نهائي بالرغم طبعا من الفساد في تنفيذ الاحكام
وكمان شايف ان لازم الشرطه تاخد علشان تاخد منها ومن وجهة نظري ان الموضوع ده ممكن يتم في عدة امور
لابد من ارتفاع مستوي دخل الظباط والافراد وده سهل جدا من خلال تخفيض ميزانية الامن المركزي وتقليل العساكر وتوجيه النفقات دي الي تحسين مرتبات الظباط والافراد اللي مش من حقهم ممارسة اي عمل خارجي
تقليل عدد ساعات عمل الشرطي وزيادة الراحات لكل افراد الهيئه يعني مش منطقي الظابط يقعد في الشغل اسبوع او اكتر ما شوفش اسرته وده حله زيادة عدد الظباط والافراد
تغيير زي الشرطه وده هيساعد المواطنين والظباط علي تغير الصوره القديمه
الغاء تبعية بعض الاجهزه من الشرطه زي مباحث الاموال العامه وتعهد الي وزارات اخري وكمان مباحث التموين والاشغالات والمسطحات المائية وكمان مصلحة الجوازات والسجل المدني والمرور واقصد هنا الادارات وليس تنظيم المرور وكمان جهاز امن الدوله اللي اعتقد في ظل المجتمعات الحديثه اصبح ليس له قيمه
وبقترح كمان تغير او تحديث المناهج واسلوب الدراسه داخل كليات الشرطه
لابد من ارتفاع مجموع القبول بالكليه واعتقد لا يقل عن 90%
تغيير السياسات الامنيه والعمل الاداري داخل الاقسام وده من خلال نقل تجارب الخارج الينا عن طريق ارسال بعثات الي اوروبا او حتي دبي
احالة الرتب العليا الي التقاعد وفتح المجال امام الكفائات لتول القياده
بصراحه في حاجات كتير ممكن تتعدل لانه فعلا جهاز مهم ويستحق منا الكثير جدا