احنا مش استثناء عن بقية دول العالم...مش معقول هنكون الدولة الوحيدة اللي مش نافع يكون فيها جهاز شرطة و هاتستخدم الجيش بداله...
و علي فكرة الجيش ناس محترمة جدا بس مش شغلتهم انهم يقفوا وسط المدنيين و الوضع لو طول شوية هاتحصل مشاكل كتير
يعني في ناس معجبة جدا بأدب الجيش مع الشعب و ازاي لما الناس بتطلع فوق المدرعة الجندي مش بيعملعم حاجة...أنا شفت بعيني فوانيس مدرعة اتكسرت و الناس عمالة تطلع عشان تتصور عليها و الجندي لا حول له ولا قوة مش عارف يعمل ايه...هو مدرب ان يتعامل مع نوعين من البشر النوع الأول هو العسكريين من افراد الجيش و دول بتحكم قواعد التعامل معهم قوانين صارمة و اوامر واضحة و النوع التاني هو العدو و ده التعامل معاه بالسلاح و الشعب بتاعنا مش من النوعيين دول لا هو عدو ينفع معاه سلاح ولا هو عسكري محكوم بقواعد و اوامر و بالتالي بتلاقي الجنود و الظباط لا حول و لا قوة و مش عارفين حتي يحافظوا علي دباباتهم و معدتهم من العبث
الشرطة لازم يكون عندها شيء من الحزم لانها بتتعامل مع مجربين و بلطجية و حثالة البشر...تخيل الفترة اللي جاية لما يتقبض علي تاجر مخدرات ولا بلطجي كبير ايه رد فعل اهل المنطقة بتاعته؟ هايطلعوا يولعوا في القسم و يقولوا مظلوم و الشرطة بتعذبه و مش بعيد تلاقي ناس عاملة مظاهرة و طالعة علي ميدان التحرير...مش معني كده اطلاق يد الشرطة كم كان يحدث في الماضي...لكن يكون في توازن و الحكاية دي مش صعبة و حلها سهل قوي...ظابط الشرطة زمان كان بيستمد قوته من قانون الطوارئ يعني يقبض علي اي حد و يرميه ورا الشمس و مالوش ديه و كمان الفساد...لو اشتكيت ظابط زمايله يغطوا عليه...و حكاية انهم كانوا بياخدوا جزأ من ضبطيات المخدرات و يشيلوها في الاقسام لزوم الاستخدام الشخصي و كمان عشان تبقي جاهزة لتلفيق التهمة لاي واحد مضايق الباشا الظابط...يعني مفيش اي نوع من الرقابة عليهم
المفروض الظابط يستمد هيبته من كونه منفذ للقانون مش لمجرد انه ظابط و لابس نضارة شمس و مكشر
يعني انا يبقي عندي رهبة من الظابط عشان هو اللي ممكن يسحب رخصي لو تعديت السرعة و استحاله ياخد فلوس و بالتالي اخاف منه لو انا فعلا باخالف القانون...و في اي حته في العالم بيكون فيه احترام و شوية رهبة من رجال الشرطة لكن مش رعب و خوف
الكلام ده ممكن يتحل بشوية اصلاحات مش بالغاء الداخلية و نزول الجيش للشارع
انا شايف ان ممكن لو اتعملت الاصلاحات دي تظهر نتيجة كويسة في ظرف شهور قليلة
------------------------
1- تغيير القيادات المعروف عنها الفساد
2- انشاء جهاز رقابي صارم علي جهاز الشرطة و يكون تابع للوزير مباشرة و لو صلاحيات نافذه للتفتيش المفاجيء لاي قسم
3- فحص جميع الشكاوي المقدمة ضد رجال الشرطة تشديد العقوبات علي من يثبت خطأه
4- رفع مرتبات الضباط و الامناء مع تخفيض رواتب القيادات و ذلك لتقليص الفجوة الرهيبة في المرتبات
5- عقوبات صارمة لمن يثبت قبوله رشوة من الظباط و الامناء
6- تسهيل اجراءات الترخيص و اتباع اساليب متطورة و علمية لفرض النظام علي الجميع و توفير وقت المواطنين دون الحاجة لدفع رشاوي
7- القضاء علي الفوضي المرورية بتطبيق عقوبات صارمة علي المخالفين مع منع الرشاوي
8- تغير لون الزي الرسمي لافراد الشرطة الي الكحلي او الزيتي و تثبيته صيف و شتاء للقضاء علي الصورة السيئة الراسخة في اذهان المواطنين لظابط الشرطة ابو بدله سوده و نضارة سوده
---------------------
انا رأي الشخصي ان الثلاثة نقط الاخيرة لها اولوية في التنفيذ لانها هاتجيب نتيجة سريعة لان مش كلنا بندخل اقسام و عارفين جهاز الشرطة من جوه عامل ازاي لكن كلنا بنروح نرخص و نطلع بطاقات من القسم و كلنا بنعاني من حاله المرور السيئة حتي اللي ما عندوش عربية و بالتالي لو حصل تغيير جوهري في الحاجات دي الناس هاتثق ان الشرطة اتغيرت و بالنسبة للزي فدي حاجة نفسية مش اكتر لو نفع تتنفذ يبقي كويس لو هاتكلف كتير يبقي بلاش
اخر حاجة...هل التغيير من جانب افراد الشرطة بس و احنا مالناش دعوة؟!
أنا شايف ان الناس العادية (المواطنين الشرفاء علي رأي الجيش) لازم يتعاونوا مع الشرطة...يعني مثلا من ظابط الشرطة اللي عنده الجرأة النهاردة انه يوقف عربية مخالفة! عشان السواق ينزل يزعق معاه و يلم الناس عليه و ممكن الظابط يضرب في وسط الشارع و ده طبعا حاجة مش كويسة
المفروض لما ظابط يوقفني و يسأل علي رخصي مثلا اقله اتفضل يا حضرة الظابط مش ابصله باستهزاء و تحدي
و من الاخر المفروض اللي يحكم العلاقة بيني و بين الظابط حاجة واحدة....القانون
المفضلات