بذمتكم مش كلنا مبارك...سلبيات فينا و لازم تتغير
السلام عليكم ورحمة الله وبركاته
أخوانى الأعزاء فى منتدانا الجميل تحية طيبة و بعد
فى سلوكيات كتير سلبية الواحد من زمان بيشوفها فى مصر و نفسه يغيرها و جت الفرصة إن الواحد يتكلم فيها دلوقتى بما ان اليومين دول فى ناس كتير نفسها تغيير نفسها و تغيير مصرنا الحبيبة
أول حاجة نفسى اتكلم عنها هى التطبيل و التهليل
طول عمرنا بنحب نهلل و نطبل و على رأي المثل يا فرعون مين فرعنك...ملقتش حد يقولى لأ
التطبيل لو ركزت هتلاقى فى كل مكان يعنى مثلا اول ما جه مبارك طبلناله و هيصناله و لما كان اصغر سنن و ماسك البلد كويس كان كله بيخاف و يطبله طول النهار و أنا فاكر لحد دلوقتى من حوالى 7 او 8 سنيين و أنا اصغر شوية كانت مذيعة فى التليفزيون نازلة بتتكلم مع الناس فى الشارع فقبلت واحد بتاع عربية موز فقلتله أية اخبار الدنيا معاك قالها كله تمام و الريس مش مخلينا محتاجيين اى حاجة و ربنا يخلينا ليك يا ريس يا مهننا يا مدلعنا :E_braces[1]:
سيبك من الريس لما مسك حبيب العادلى وزارة الدخلية قعدنا نطبله و الجرايد تطبل ده الحبيب ده العادل هو ده اللى هيدلعنا و فعلا الراجل متأخرش و هشتكنا احلى هشتكة
لما جه نظيف طبلنا و هيصنا و هو ده اللى هينظف الوزارة و هيجيب الديب من ديله و الراجل فعلا متأخرش و جاب الديب و تواه عنده و الله اعلم هو فين
و دلوقتى ثورة 25 يناير و شبابها كمية تطبيل و ناس كانت بتسب و تلعن فى التحرير طلعوا فى الأخر كان بيضحوا بنفسهم علشان الثورة تنجح و كان الشمعة اللى احترقت لتنير الطريق :8954[1]:
و طبعا التطبيل الجامد ده هيعمل فى شباب 25 زى ما طول عمرنا بنعمل الأفساد و كل واحد دلوقتى هيفتكر نفسة جيفارا و تبتدى تسمع كلام عجيب ان لازم شاب لم يتخطى ال 30 يكون فى الحكومة و حاجات عجيبة جدا
كفاية تطبيل
تانى حاجة نفسى اتكلم فيها العاطفة الزايدة اوى بتاعتنا
شعبنا عاطفى جدااااااا لدرجة العبط...معلش ما انا منكم بردوا
أغلبية الناس متفقة على ان مبارك كان لازم يمشى و كفاية عليه اوى كده بس الفكرة كانت يمشى فورا و لا بعد 6 شهور
المهم الريس طلع قال الخطاب التانى بتاعه و كان ملئ بالصعبانيات و فجأة الناس كلها تقولك قعدنا نعيط و زعلنا اوى و فجأة بردو بقوا عاوزينه يعد لحد ما يموت ههههه ...دا اية الحلاوة اللى احنا فيها دى:213-1107231241[1]:لولا حركة الجمال اللى عملها شوية ناس لا يقال عنهم غير مخ بسلة كان زمان شعبية مبارك ضربت تانى و مش بعيد كان كمل
جه وائل غنيم مع منى الشاذلى و الراجل كانت أعصابه بيظة و عيط و أذا بالشعب يثور تانى و أشد من الأول على مبارك و المفسدين يعنى
لدرجة ان فى ناس عاوزة ترشحه للرئاسة
من الأخر احنا شعب دمعة تجيبة و دمعة تودية
لازم نفكر بعقلانية أكتر و نسيب العواطف فى الحاجات المصيرية دى
ثالثا الجهل و عدم الأدراك لأى حاجة و الأنانية
الحكاية دى تشوفها فين... تشوفها دلوقتى متمثلة فى الأضرابات و الأعتصامات
حاجة غريبة جدا الناس كلها المفروض فاهمة اننا بنمر بظروف زى الزفت من الناحية الأمنية و الأقتصادية
كمية ناس بتطالب بزيادة مرتبات و بمشاكل فئوية و البلد وقفة تماما و كل واحد همه مصلحته الشخصية فقط
و اللى يفرس اكتر ان فى ناس كتير رايحة تقدم ورقها فى الشغل دلوقتى و بيقولك فرصة نلحق وظيفة
يا جدعان شركات كتير بتسرح عمال و الحالة مش مستقرة خالص و اللى شغالين بيتسرحوا منيين سعدتك هتلاقى شغل ؟؟؟؟؟؟؟؟؟؟؟؟؟؟؟؟؟؟؟؟؟؟:8954[1]:
الشعب كله بلا استثناء باصص لمصر على انها الكيكة و فرصة نلحق ناخد منها حتة قبل ما تخلص و طبعا فى اللى باصص على حتة كبيرة و فى أغلبية الشعب الفقير فى الفلوس و فى حاجات تانية كتير مش وقتها
الواسطة و المحسوبية
بذمتك و شرفك لو ليك واحد قريبك أو صاحبك ماسك منصب مش هتروحله علشان يسهلك تاخد مثلا شقق من الدولة حتى لو انت ظروفك كويسة و عندك شقة هتقول اهو للعيال و البحر يحب الزيادة... أنا راضى ضميرك
لو أنت نفسك مسئول بذمتك مش هتساعد قريبك و صحابك أنهم ياخدوا وظايف مش من حقهم؟؟؟
بذمتك بردو لو جه وزير و حط قرار ان فى التعيينات الجديدة مفييش 2 قرايب هيشتغلوا فى نفس المصلحة أو الهيئة قرابتهم اقل من الدرجة الرابعة..مش هتلاقى هجوم شديد عليه من كل الناس صغيرهم قبل كبيرهم.. و أنا راضى ضميرك
طبعا الكلام ده إلا من رحم ربى
يعنى كلنا بنعمل زى ما مبارك كان بيعمل
السلبية و الأهمال و اللامبالاه و الفساد و الأستغلال و الفهلوة و كثرة الشكوى و الأنانية بردوا
أبسط حاجة المواطن اللى راكب عربيته و ماشى فى الشارع عمال يرمى فى زبالة من العربية
الممرض اللى شغال فى مستشفى حكومى و بيسرق الأدوية المدعومة للغلابة و يبيعها لحسابة و لقريبه و لما تيجى الناس تعبانة يقلهم مفيش
الدكتور اللى لما يكون واحد قريبه داخل المستشفى الحكومى يقلبهاله خاصة و منتها العناية و النظافة و لما يجى الغلبان يدخل يقرفه و يطلعوا عينه
سواق التاكسى اللى لازم لما تيجى تحاسبه يعد يشحت منك و يطلب زيادة مع انك تبقى متفق معاه من الأول
سواق الميكروباص اللى لما تكون الدنيا بتمطر او المواصلات قليلة يزود عليك حساب
عدم أحترام اى قوانيين زى قانون المرور انزل الشوارع الايام دى علشان مفيش امين الشرطة- اللى أنتوا قرفينه طول النهار أنه فاسد و مرتشى و احنا اللى فاسدين-ناس بالهبل ماشية عكس السير محدش بيقف فى الأشارات اللى مفيهاش كاميرا و لو الشرطة العسكرية هى اللى بتنظم الدنيا تلاقى الناس بتمشى حتى لو العسكرى قلها تقف
المواطن اللى عامل مخالفة مرور و لما الأمين يقوله عليك مثلا 150 جنية مخالفة سرعة يقوم مدى للأمين 50 جنية رشوة و يفتكر نفسه فهلوى و جاب الديب من ديله
أحنا اللى أفسدنا رجال الشرطة بالرشاوى و المحايلة و أذلال نفسنا ليهم علشان ميخدوش حق الدولة و تلاقى الواحد يبقى عامل بلاوى و لما يخدوه مخالفة ينزل يبوس ايد الظابط و يتمسح فيه علشان يلغيها او يقللهاله
المصريين بقوا مكروهيين برة مصر لأن المصرى بقى معروف ان مفيش اى حاجة بتعجبه و دايما عاوز زيادة و مش بيتقن عمله ده غير أننا و بلا فخر لما بنخرج برة مصر بنحارب بعض و كأننا اعداء مش من بلد واحدة و ده متمثل فى معظم المصريين ما عدا الصعايدة اللى لسة بيتجمعوا مع بعض برة خصوصا الفئات الغلبانة انما المبسوطيين بيضربوا فى بعض
الأراضى الزراعية اللى كلها بقت مبانى خصوصا اليومين بتوع الثورة دول:flag1:
الأراضى اللى تم وضع اليد عليها و الشقق اللى هجم عليها البلطجية !
مبارك مش هو الفساد...مبارك انعكاس لفساد الناس
كله بيحاكم مبارك دلوقتى و يشتم فيه هو و شلة الحرامية اللى كانوا معاه بس لو كل واحد فكر بعقل هتلاقى ان من مبارك لأصغر موظف -لكناس الزبالة- 99% منهم فاسديين و محدش يقولى أعذار لأن لو كده ربنا مكنش حاسبنا على أفعالنا مفيش حاجة أسمها مرتبى قليل اصل ان مظلوم أصل...ألخ
ﭧ ﭨ ﭷ ﭸ ﭹ ﭺ ﭻ ﭽ ﮛ ﮜ ﮝ ﮞ ﮟ ﮠ ﮡ ﮢ ﮣ ﮤ ﮥ ﮦ ﮧ ﮨ ﮩ ﮪ ﮫ ﮬ ﮭ ﮮ ﮯ ﮰﮱ ﯓ ﯔ ﯕ ﯖ ﯗ ﯘ ﯙ ﯚ ﯛﭼ
البقرة 273
ﭧ ﭨ ﭷ ﭸ ﭹ ﭺ ﭻ ﭽ ﯮ ﯯ ﯰ ﯱ ﯲ ﯳ ﯴ ﯵ ﯶ ﯷ ﭼالقيامة: ١٤ - ١٥
كلنا كنا مبارك و كلنا كنا احمد عز
أخر حاجة الناس نسييت ان الأرزاق بيد الله و كله فاكر ان مبارك هو اللى كان سارقهم علشان كده كانوا فقراء و أن بدام مبارك مشى هنلاقى الفلوس نازلة علينا من السماء من غير ما نتعب و لا نجتهد فى شغلنا
لازم الفترة الجاية ناخد بالنا ان المفسديين الصغيرين اللى بينخروا زى السوس فى مجتمعنا لسة موجوديين و ان مش شوية الشعارات الرنانة اللى اتقالت فى الثورة و بعدها هتخلى المفسد يبقى مصلح و اننا لازم نفضل فى حالة أستنفار دائمة و لو أى رئيس جديد جه منطبلوش و لازم نبقى جاهزيين لأى لعب أو أستهبال منه او فساد نقلبها 25 يناير تانى و تالت و رابع لأننا لو رجعنا سلبيين و تطينا تانى هنفضل ناخد على قفانا طول عمرنا
أعتذر عن التطويل و عن أى اخطاء املائية
و ربنا يهدينا كلنا لما يحبه و يرضاه و ينصر الأسلام و يعز المسلميين و يساعدنا على النهوض بمصرنا الحبيبة