اولا قبل ما تقرا الرساله

ارفع راسك فوق انت مصرى

اول مرة احس ان البلد دى بلدى اول مرة امشى وانا مش خايف احسن ادوس على غطى زجاجه حاجه ساقعه و عسكرى ياخدنى القسم والبس قضيه مخدرات او سلاح اول مرة اروح من اى طريق يودينا بيتنا مش بس من الطريق اللى ما فيهوش كمين اول مرة من ساعه ما ابتديت اتفرج على حاجه غير توم وجيرى ابتدى اتفرج على التليفزيون المصرى اول مرة من 30 سنه رئيس جديد اول مرة اتكلم عن اقتصاد البلد واهتم بيه اول مرة افكر ايه القرارات اللى المفروض تتاخد عشان الوضع يتحسن والاقى فعلا بعض ما فكرت فيه بيحصل اول مرة ..................
من الاخر قد تكون الاحداث الاخيرة هى الفرصه الوحيده التى اتيحت لنا لكى ننفض التراب ونخرج من قبورنا لنبدا معا مسيرة الاصلاح والاصلاح ده يعنى مش انك تنتقد الاخرين او انك تبحث فى الماضى عن الحراميه واللصوص لالالا
الاصلاح يعنى انك تصلح من نفسك يعنى انك تعرف نفسك كل واحد يمسك ورقه وقلم ويبتدى يكتب عيوبه وسلبياته وياخد عهد على نفسه انه مش هيكررها مش هيرجعلها هيبتدى من جديد
انا عن نفسى مش هقولكم على عيوبى طبعا بس كدة كدة هتفهموا انا عارفكم انا هعمل الاتى
مش هدفع رشوه ابدا
مش هشوف حاجه غلط واسكت عليه (بس ده مش معناه انى همشى اتخانق مع الناس لا معناه بالحسنى وبالاقناع)
مش هعمل حاجه غلط
هبدا اسمع كويس للراى الاخر (مشكلتنا اننا دايما فاهمين ان راينا هو اللى صح)
هتعلم وهقرا على الاقل كتاب كل شهر
ههتم بولادى وهديهم وقت اكتر وهكلمهم بطريقه سهله عن حقوقهم وازاى يحافظوا عليه (مش هقولهم ما تتكلموش فى السياسه - اوعوا تتكلموا مع سواق التاكسى - اوعوا تتكلموا فى الميكروباص)
مش هشترى حاجه ازيد من سعرها
لو وقفت فى اى طابور مش هتزاحم وهلتزم بمكانى
مش هخرج من باب الدخول فى المترو
مش هبص على البنات ولا هعاكسهم
هساعد اى حد محتاج مش هخاف اساعد حد ليطلع نصاب (مفروض يكون فى شويه فراسه)
لو فى حرامى سرق حد والناس بتجرى وراه هجرى معاهم مش هسيبه
المطلوب مننا كلنا نحافظ على المكاسب اللى كسبناها كل يوم بيعدى واحنا مستنيين النتائج بتاعه الثورة واحنا قاعدين ادام التليفزيون احنا بنرجع لورا مطلوب من كل واحد يكتب ايه اللى ممكن يعمله عشان ينجح الثورة دى ويرفع شان بلدنا ونرجع نقول
ارفع راسك فوق انت مصرى

http://dc200.4shared.com/img/vztbEJh...484234/fix.jpg