الموضوع: من ترشح من هؤلاء ليكون رئيس مصر القادم ولماذا

المشاركة الأصلية كتبت بواسطة swimmer25

كلامك حلو جدا وديمقراطي جدا بس انا برده معترض
لان لسه مفيش انتخابات اساسا ولا فيه مرشحين عشان نعمل عليهم استطلاع..وساعتها هيكون الترشيح في مصر مش في المنتدي

وبعدين فيه احداث جارية كتير جدا والناس مستنية حاجات تانية كتير جدا مفيهاش لسه ترشح مين للرئاسة

وبعدين حضرتك متجاهل الراجل اللي قالك ان الدستور بيقول سن الترشح للرئاسة لا يقل عن 40 سنة..حضرتك قريت الدستور الاول...

لا تضيع وقتك في موضوع مالوش اي لازمة دلوقتي ولا هيقدم خطوة...علي فكرة الموضوع ده اتكرر كتير لو كنت متابع المنتدي ومعظم الناس مردتش عشان فعلا الناس اللي هنا فاهمة ان ده مش وقته

فيه موضوع مثبت علي رأس القسم فيه مواد الدستور المصري ياريت تقراه
وعلي فكرة اخوك اول مرة يقراه بعد الثورة وكنت زعلان اوي من نفسي اني اول مرة اقرا دستور بلدي...الموضوع ده هيفيدك كتير

السلام عليكم
ازيك يا باشا والله كلامك على عينى وراسى بس لهجتك حاده جدا مش عارف ليه
بص يا سيدى الفاضل انا هحاول ارد عليك بنفس اسلوبك وشوف كده كويس ولا ايه رايك انت قلت :
لسه مفيش انتخابات اساسا ولا فيه مرشحين عشان نعمل عليهم استطلاع..وساعتها هيكون الترشيح في مصر مش في المنتدي
يا سيدى الفاضل يا اخى انا ما قلتش ان اللى هننتخبه هو ده الريس وانت من حقك تعترض بس مش من حقك تقولى اعمل وما تعملش بس ممكن تكلمنى بشكل فيه نصح او توجيه من اخ لاخوة مش نقد وانفعال
انت قلت : وبعدين فيه احداث جارية كتير جدا والناس مستنية حاجات تانية كتير جدا مفيهاش لسه ترشح مين للرئاسة
مين الناس اللى انت بتتكلم عليهم دول انت ما ينفعش تتكلم غير عن نفسك فقط وانا كمان ما ينفعش اتكلم غير عن نفسى فقط الا اذا كنت رئيس حزب او شركه ممكن ساعتها تتكلم عن حزبك او شركتك لكن عن الناس ما اظنش
انت قلت : لا تضيع وقتك في موضوع مالوش اي لازمة دلوقتي ولا هيقدم خطوة...علي فكرة الموضوع ده اتكرر كتير لو كنت متابع المنتدي ومعظم الناس مردتش عشان فعلا الناس اللي هنا فاهمة ان ده مش وقته
ده رايك ورايك فوق راسى بس انا مش مقتنع بيه وللمرة الثانيه بتتكلم باسم الناس وده مش صح اتكلم عن نفسك فقط
انت قلت :وبعدين حضرتك متجاهل الراجل اللي قالك ان الدستور بيقول سن الترشح للرئاسة لا يقل عن 40 سنة..حضرتك قريت الدستور الاول...
الدستور اللى حضرتك بتقول عليه انا لا ادعى علمى الكامل بيه بس انا من كام يوم بصيت عليه بصه سريعه والدستور ده هو اللى فى لجنه من عشرة اشخاص بيعملوة من جديد يعنى الدستور اللى حضرتك بتقول عليه فى بنود هتتغير وانا اسف انى ممكن يكون شرط السن ما اعرفوش بس مش معنى انى ما اعرفش كده انى تجاهلت الراجل انا مش ممكن اتجاهل اى حد لانى بحترم الصغير قبل الكبير وكمان شرط السن ده مين قال لك انه هيفضل زى ما هو وحتى لو فضل ما يعملش فرق خالص لان كل اللى احنا بنعمله دلوقتى تثقيفى لو ما كانش ليك يبقى ليا انا وادينى عرفت منك شويه معلومات لو ما كنتش كتبت الموضوع ده واتناقشنا فيه ما كنتش هعرفها فبرجاء بلاش موضوع تضييع الوقت ده ولو حضرتك شايف ان الموضوع مضيعه للوقت خلا ص حافظ عاى وقتك اللى انا متاكد انه ثمين جدا وانا باعتذر لك انى دخلتك الموضوع بالعافيه

ايه رايك بقى فى طريقه الرد دى كويسه
عموما انا بس كنت بحاول احاورك باسلوبك بس انا ما كنتش احب انى اتعرض للنقد بدون وجه حق بالطريقه الجامده دى وبانفعال زى ما حضرتك واضح من كلامك
انا دلوقتى عشان نفصل فى المووع ونعرف الناس مهتمه ولا لا هسيب الموضوع ومش هدخل انهارده عليه خالص ومش هشارك اى مشاركه فيه ومش هرد على حد فيه هسيب الناس تكلم بعضها وبكرة ان شاء الله لو لاقينا انا وانت ان الموضوع مشاركاته زادت يبقى الناس مهتمه ولو ما فيش حد دخل يبقى اكون اسف لانى ضيعت وقتك
اخر وضع للاستطلاع وقت كتابتى لهذه المشاركه
مشاهده 195
مشاركات 24
مشاركه فى الاستطلاع 30

شكرا