الموضوع: طلعت الرخصه من غير ولا مليم رشوه انا فرحان جدا

بسم الله الرحمن الرحيم

السلام عليكم ورحمة الله وبركاتة

الحمد لله طلعت رخصة اليوم ولسه جى من المرور والحمد لله طلعتها من غير ولا قرش رشوة ولا مليم احمر مخروم من بتاع الملك فاروق حتى والمفاجأة بقى الكبيره بم بم بم تس مكنش فى امتحان كمبيوتر ولا اشارات ولا الهوا

الحكاية بختصار رحت الصبح اشتريت ناموذج ب 18 جنيه ودخلت على الشباك ختمت ورحت لأختبار القيادة قالى معاك عربية قلت لهم لا قال لى ادفع 15 ونص رسم استعمال عربية 128 معفنه وزباله وكل القمامة الى فى الحياة واساسا انتا مش بترفع من رجلك من على الدبرياج لانه يا دوب بترفع رجلك جوا الجزمه تمشى ولو رفعت الجزمه نفسها تبطل ولازم تخرق الدواسة من كتر الضغط علشان تجيب الغيار المهم طلعت ادام وبطلت منى لما طلعت دورهالى والظباط قال لى كمل اطلع طلعت اطلع تانى طلعت برده لحد ما وقفت قال لى ارجع ورا بقى واركن طبعا انا اساسا بسوق لورا احسن من قدام الحمد لله رجعت كويس وركنت ختملى الورق ورحت على الخزنه دفعت 50 جنيه وطلعت الرخصة زى الفل ولا امتحان اشارات ولا الهوا انا على فكره انا مرور بين السريات مدفعتش ولا سحتوت ابيض مع انى والله كنت مرتب انى ادفع لحد 500 جنيه بس بصراحه بعد 25 يناير قلت لنفسى عيب عليك واتغير واقف ضد الرشوة صليت ركعتين قضاء حاجه ومراتى دعتلى ودى أهم حاجة ههههههه وقلت الدعاء "اللهم اكفنيهم بما شئت وكيف شئت" وزى الفل ، وربنا جبلى الرخصة بالحلال .

نصيحه لكل الشباب جربو الحلال

يا اببن المحظوووووووووووووظه

ولاً: ألف مبروك الرخصة
ثانياً: أحييك إنك مادفعتش رشوة وياريت كلنا نبطل دفع الرشاوى، ممكن فى الأول الأمور تتعطل شوية لكن لما الموظفين يلاقو كل الناس مش بتدفع رشوة ومصممة تاخد حقها بالطريق الصح غصب عنهم هايعملوا شغلهم مظبوط

الحمد لله والشكر لله

مبروك ياباشا
بس خلي بالك انت كده تقريبا ممتحنتش

منا حسيت بكده برده بس الحمد لله منغير وسطه والله هو ربنا سهلها كده

ضد الرشوة ضد الفساد مصر الجميله