الموضوع: إنتبهوا أيها السادة ....... كيف سيتم الاستفتاء على تعديل الدستور ؟؟؟

سيبكم من الاعتصامات والحكاوي عن الفضايح والمحاكمات وكشف اسرار حاشية مبارك والفرحة والشماتة والشتيمة والتأييد والمعارضة .....
خلينا ننتبه لما هو اهم .....
طبعا لجنة تعديل الدستور شغالة دلوقت في التعديلات المقترحة
لكن الاهم ..... كيف سيتم الاستفتاء على تعديلات الدستور
...
لازم يكون فيه امرين في غاية الاهمية ناخد بالنا منهم ..... علشان مكتسبات الثورة ودم الشهداء ما تتسرقش
1- لازم يتم مناقشة التعديلات المقترحة باستفاضة في وسائل الاعلام قبل الاستفتاء.... ولازم كل عضو في اللجنة ( على حده وبدون ضغوط من الباقين ) يؤكد انه ليس لديه ملاحظات او تحفظات عليها .... وكدة يبقى جميع الاتجاهات الممثلة في اللجنة ابدت رأيها بصراحة ووضوح

2- ان يتم الاستفتاء على تعديلات كل مادة على حده ..... مش كلها مع بعض
يعني يكون ورقة الاستفتاء فيها ارقام المواد وكل مادة امامها خانتين .... موافق وغير موافق
مش يكون الاستفتاء على جملة التعديلات
لأن ممكن بسهولة تمرير تعديلات خبيثة وسط باقي التعديلات البراقة .... السم في العسل يعني
فاكرين في الاستفتاء بتاع السادات على معاهدة السلام ..... كان الاستفتاء عنها ومعاها شوية حاجات دستورية تانية جلبت بلاوي ع الدولة .... واحنا عارفين طبعا ان اكتر من 50% من الشعب المصري أمي .... يعني مش ح يفهم اللعبة الدنيئة دي
ومثال آخر هو ضياء الحق في باكستان ...... عمل الاستفتاء بتاعه بصيغة غريبة .... جمع في نفس الاستفتاء بين تطبيق الشريعة الاسلامية وبقاءه في الحكم مدى الحياه .... في جملة واحدة ..... توافق على كله او ترفض كله ...... شروه واحدة ...... وطبعا الغلابة كلهم صوتو بنعم علشان عاوزين حكم اسلامي وماحدش بص لباقي الخدعة .....
المفروض اني كمواطن اقول رأيي في كل مادة على حدة ..... مش يمكن اكون موافق على مادة ومش موافق على مادة تانية ...... مش يمكن كل المواد تكون ممتازة ورائعة ويتم دس تعديل خبيث في وسطهم يخرب الدنيا اكتر مما كانت خربانة ......
اتمنى اكون قدرت اوصل اللي عاوز أقوله
واتمنى اكتر ان اللي اقتنع بكلامي يفتح مجال لمناقشة هذه النقاط في مواقع التواصل الاجتماعي خارج المنتدى .... لازم الناس تفهم كدة قبل الاستفتاء ..... واعتقد ان الوقت محدود جدا ..... والامر خطير جدا
ده طبعا غير تعديل المادة الثانية اللي الجميع تنبه لها بما فيهم الازهر والحمد لله اصبح من شبه المستحيل تغيير محتواها بان الاسلام هو دين الدولة والمصدر الرئيسي للتشريع فيها

موضوع ممتاز و مهم جدا

طيب ايه رايك تعمل الموضوع في جروب او صفحة على الفيس بوك عشان يكون انتشاره اكبر و اسرع