الموضوع: الثوره المجنونه يوم الجمعه 18 فبراير2011حد يفهمنى

النهارده يوم غريب جدا مش فاهم ايه اللى بيحصل فى البلد

اليوم بداء مع صلاه الجمعه بموقف غريب جدا

انا متعود اصلى فى مسجد صغير فى البلد بجوار بيت والدى

اكتشفت انهم مزودين ميكروفون جديد بعيد عن الجامع علشان الصوت يوصل لاماكن اكتر حتى للناس فى البيوت

بدأت الخطبه بالحديث عن اللى بيحصل فى البلد وشويه وقلبت بان مصدر موثوق لخطيب الجامع راجع حزين من ميدان التحرير علشان شاف هناك امريكان وروس بيوزعوا فلوس على الناس

وبعدين قلبت الخطبه بالتحذير من دور ايران البلد الشيعيه اللى بتشتم امهات المسلمين
وبيعتبرونا كفار وهى اللى مسخنه الاخوان علشان يعملوا كده علشان نعمل دوله اسلاميه
طبعا موافقين على الدوله الاسلاميه بس دى هتبقى دوله شيعيه
وبأن ايران عاوزه تمتلك النووى وعاوزانا نساعدها علشان تضرب اسرائيل
وكمان هتضرب السعوديه وتحتل العراق وهتخليهم دول شيعيه واحنا دلوقتى بنساعدهم على كده

خلصت الخطبه وطبعا انا عذرت شيخ الجامع لانه من الواضح انه بيعمل كده بتعليمات من امن الدوله اللى بس مضايقنى ان فيه ناس كتير ممكن تقتنع بكلام شيخ الجامع لانه الناس فاهمه ان ايران وامريكا والاخوان دول عفاريت نفسهم ياكلوا البلد


خرجت من الجامع معدى على شركه بترول فى البلد لقيت مظاهرات وناس بتصرخ عاوزين حقوقنا (الشركه مبنيه فى البلد اواخر الستينات )
نزلت اسأل فيه ايه يا جماعه (كلهم جيرانى ومن بلدى) قالوا لى عاوزين حقوقنا اللى البترول نهبها
ايه هى يا جماعه اول مره اعرف ان البترول سرقنا ؟
يعينونا فى البترول ده مبنى على ارض بلدنا (قريتنا) ودى كانت اراضى زراعيه وكانت خير للبلد
طب يا رجاله هما هيعينوا الناس دول ازاى يردوا منعرفش يرفدوا الناس اللى من محافظات تانيه ويعينونا (كأن الناس اللى شغاله يهود)
طب لو منفعش برده يبقى يشيلوا البترول ده من هنا ويودوه اى حته تانيه

طبعا كنت هتجنن من الكلام لحد ما عرفت الموضوع
عضو مجلس الشعب السابق (المجلس اللى اتحل) وبعده ب 20 متر واحد حزب وطنى كان ناوى يترشح بس الحزب ضحك عليه وواحد تبع حزب معارض

كلهم بيقولوا للناس عيب كده هاتوا الطلبات واحنا هنتناقش مع الناس وهنعينكم
وكل واحد بيحاول يفرض سيطرته ويظهر فى وسط الناس علشان الانتخابات قربت(من المؤكد انهم السبب فى تجمع الناس من الاساس)

طبعا موضوع مستفز لاقصى درجه واغلب الناس اللى واقفه مش فاهمه حاجه غير الجوع والفقر وانهم هيتعينوا لما يعملوا كده وكل واحد هيقبض بالدولار
وهيحرروا بلدنا من اهالى المنوفيه اللى محتلين الوظايف فى البترول:b4_384:

الحمد لله مشيت طبعا لانى عارف ان الكلام مفيش منه فايده خصوصا انى راجل عندى عربيه انما هما بيركبوا التكاتك خفت يهدروا دمى ويطردونى من البلد

نزلت طنطا الوضع مختلف تماما

شباب زى الورد كلهم لابسين كمامات وماسكين مقشات
مش بيكنسوا البلد دول بيحكتوا التراب من الرصيف
وشباب بعدهم بتغسله
وشباب بعدهم بتدهنه
وشباب بتدهن الجدران اللى مكتوب عليها يسقط مبارك
وشباب بتدهن الجدران اللى مش مكتوب عليها حاجه بس شكلها وحش
شباب وبنات واضح انهم من مستوى معقول
عرفت منهم مهندس وصيدلى
وشفت فى ملابسهم انهم مش محتاجين اكتر من احساسهم بانهم بيحبوا البلد ونفسهم تبقى مصر احسن مكان

طبعا مش هعلق على الموضوع انا بس حبيت احط قدامكم الصوره كامله وانتوا تحكموا وتقولوا لى رأيكم

المشاركة الأصلية كتبت بواسطة wesam_salom

انا مبتكلمش على فرق التعليم او الاخلاص

انا بتكلم عن ازاى الناس دى مخها اتغسل لدرجه انها معتبره انه حق مشروع
وان الشركه طالما فى بلدنا تبقى حقنا واى حد من محافظه تانيه يروح بلدهم
وازاى ناس بدأت تستغل الظروف علشان تقدر تظهر
ونفس الفكره قدروا يستغلوا جهل وحاجه البعض ووصلوهم لدرجه انهم يطلبوا اللى مش من حقهم



هى دى المشكله
الناس مقتنعه انها فعلا لها حق
وان منطق القوه هو اللى ماشى
مين اللى زرع فى دماغهم الكلام ده
ومين المستفيد
والاهم
انا بينى وبين الشركه 100 متر
عاوز ابقى رئيس مجلس الاداره والا الصبح هقفل لهم البوابه

يا فندم اللى زرع فى دماغهم ان منطق القوه هو اللى ماشى و انهم يطلبوا اللى مش من حقهم النظام السابق و لسه موجود

ما هى دى الثقافة السائدة فى المجتمع بالفعل ... أمال إحنا اتسرقنا و اتنهبت ثروات البلد و انتشر الفساد أزاى ؟

هو حضرتك إحنا كنا ماشين بالعدل و القسطاس و فجأة الناس أتغيرت !!

لو فى قلة فاهمة و واعية زى الشباب اللى حضرتك أتكلمت عنهم و اللى كانوا شرارة الثورة و التغيير الباقى لسه

صعب إنك تغير ثقافة الناس بين يوم و ليلة