قال رسول الله صلى الله عليه و سلم "كفى بالمرء كذبا ان يحدث بكل ما سمع" ..... صحيح مسلم
1- متزوج من امريكية : و دي تهمة و لا عيبة و لا مؤاخذة ؟؟؟؟؟؟
2- عضو الماسونية : ايه الدليل ؟ لقوا الكارنيه في جيبه؟
3- الاسورة : الله يخرب بيت الاسورة و سنينها
دي اسورة اسمها livestrong
livestrong wristband - wikipedia, the free encyclopedia
عاملاها مؤسسة lance armstrong
lance armstrong - wikipedia, the free encyclopedia
و ده رياضي شهير اصيب بسرطان الخصيتين اللي انتشر و وصل للمخ و و الرئتين و شفي بارادة الله بعدها
و دي لجمع التبرعات لصالح ضحايا السرطان و لابحاث علاج السرطان
و منتشرة جدا في مصر و برة مصر عشان كده طبيعي و عادي يعني اننا نشوف robert gibbs كمان لابسها !!!!!!!!!!
4- ترجمة جووجل مش هو اللي بيترجمها بايديه يا جدعان
و جرب تخش تترجم "moz" هيترجمهالك غادة عادل !!! اه و الله
جووجل بيعتمد على الترجمة الاحصائية للنصوص الموجودة على صفحات الانترنت + التصحيحات اللي بيبعتها المستخدمين ...... يعني لو ناس كتير دخلت و عملت submit لترجمة غلط هيترجمها بعد كده غلط
و الله العظيم انا بعينيا دول شفت جووجل بيترجم get well soon إلى عم احمد البواب و الله !!!!!!!! بس اتصلحت دلوقتي
و بعدين وائل بتاع تسويق مش ترجمان يا جدعان
5- التيشيرت ده جيوردانو ....... عادي خالص مش عشان عليه اسد يبقى ماسوني
و بعدين البيجو برضه عليها نفس الاسد تقريبا يبقى ملاك العربيات البيجو ماسونيين بقى !!!!!!!!
و بعدين نشغل عقلنا
هو لو يعني نفترض جدلا ان ده شعار الماسونية هو و الاسورة
هو متآمر و اهبل يعني عشان يلبسهم !!!!!!!!!!!!
فكروا قبل ما تبعتوا أي حاجة ارجوكم
6- موضوع صفحة الفيس بوك
و اللي عامل الصورة دي فعلا حاقد جدا على وائل
متضايق من الاتي
أ - بيعرف انجليزي؟ لا يا شيخ ؟؟؟؟؟ مين في بلدك ما بيعرفش انجليزي و كام واحد في بلدك ما بيعرفش انجليزي كويس؟ و كام شركة في بلدك - مش هاقول لك جووجل و لا هاقول لك في الامارات - هتشغل واحد الا لو كان بيعرف انجليزي كويس ؟؟؟؟؟؟؟؟؟؟
ب- ايه علاقة انه معجب ببيل جيتس و ستيف جوبز و وارين بافيت بالوطنية ؟؟؟؟؟؟ دي مش شخصيات سياسية أصلا و دي شخصيات ناجحة عمليا جدا و وارين و بيل تبرعوا باغلب ثرواتهم اصلا للخير !!!!!!!!
ج - الجامعة الامريكية : بجد بجد بجد يعني الحقد بيخر من اللي عامل الصورة دي ...... مالها الجامعة الامريكية ؟؟؟؟؟؟ ده لا مؤاخذة اي صايع راح حضر هناك حصتين في كورس بيتمنظر بيها ........ و نص البلد نفسها تدرس فيها و تتخرج منها أصلا ...... و اي اب معاه فلوس وابنه جايب مجموع كويس بيبقى عايز يدخل ابنه فيها ...... ايه علاقة دي بالوطنية ؟؟؟؟؟؟؟
د - قافل الخصوصية و قافل ال add : هو حر في بروفايله يا أخي و ياما ناس عاملة كده ..... انت ايه اللي مضايقك أوي كده ؟؟؟؟؟ و ده راجل دلوقتي معروف و خلق الله عايزين يضيفوه و هو اكيد عنده صور عائلية و معلومات شخصية مخليها للحبايب بس ......
هـ - بيحب البرادعي : هو حر في اراؤه .... هو غصب حد عليها ؟ خش على صفحة البرادعي هتلاقي عشرات الالاف من المصريين معجبين بيه ...... وائل بقى اللي كخ
خلي بالك كل اللي مكتوب ده اصلا بيفترض ان دي فعلا صفحة وائل غنيم عالفيس بوك مش متفبركة هي كمان !!!!
بجد بجد بجد انا زهقت ....... لازم الناس تشغل مخها شوية ....... يا جدعان احنا داخلين على انتخابات لتعديل الدستور و انتخابات برلمانية و رئاسية مصيرية يعني لازم نشغل مخنا عشان مش اي حد يقول لنا اي كلام ناكله و نصدقه