مبارك مكنش الفاسد الوحيد فى البلد
كان ليه 85 مليون شريك
انا كنت منهم
لماد دفعت فلوس عشان أنجح فى إمتحان المرور
و لما إديت العسكرى فلوس عشان يخلص و رقى الأول
و كنت شريك لما قلت لغيرى يعمل كدا
كنت شريك لما غشيت فى الإمتحان
كنت شريك لما ذاكرت عشان أنجح بس مش عشان أبقى عارف حاجة

و فى شركاء تانين كتير زى
الدكتور فى الكلية الى بيحط أى منهج و خلاص
الدكتور الى بيصحح أى حاجة و يسقط و خلاص ناس فى مادة عشان يشتروا الكتاب السنة الى جاية
الدكتور الى بكل بجاحة يقولك عايز 3 جنية دهب عشان تنجحوا فى المشروع
الدكتور الى بينجح الناس بمجرد إنهم إشتروا الكتاب
الدكتور الى بيجيب الإمتحان بالنص من الأمثلة عشان نحفظها و ننجح و هو ينجز فى التصحيح
و الدكتور الى ما يشرحش فى المحاضرة و يجيب إمتحان ما يتحلش و ما تعرفش بيصحح إزاى
شريك تانى لمبارك
الطبيب الى فى المستشفى الحكومى
الى بيهمل علاج المرضى لمجرد إن فلوسهم مش كتير يا أخى حرام عليك دا أنت أكتر مهنة إنسانية
الطبيب الى و هو فى كلية طب بيفبرك الحالات عشان يعدى إمتحانات العملى
الطبيب الى بيرفض يعالج مريض لمجرد إنه مش قادر و مش عاوز يوجع دماغه
الطبيب الى عاوز يحول الحالات على العيادة بتاعته عشان يبقى الفلوس كلها ليه
شريك أخر
ظابط الشرطة الى بيقف ساكت على الغلط لمجرد إن التانى ظابط زيه
ظابط الشرطة الى بيجى على الغلبان و يسيب الظالم عشان ليه ضهر
و أظن كلنا عارفين كدا
شريك كمان
الى بيرمى عياله فى الإشارة يشحتوا عشان هو مش عايز يشتغل
شريك كمان
المهندس الى بياخد رشاوى عشان ما يتكلمش على رصف الطريق الغلط
المهندس الى بياخد رشوة عشان يمشى الرصيف بعيد عن الكشك الى مبنى مخالف
شريك أخر
مدرس فى مدرسة ما بيشرحش كويس يدخل ياخد الغياب و خلاص و كلمتين على السبورة و خلاص
مدرس تانى ما بيديش لحد أعمال السنة غير لما يكون بياخد معاه درس
أظن هنا بيترسخ الفساد فى الإنسان لما يلاقى المدرس الى هو القدوة بيعمل كدا

شريك أخر
عمال المساجد الى بيدفعوا رشاوى عشان ينجحوا

شريك أخر
ناظر مدرسة أو دكتور فى جامعة بيستخدم ورق الإجابة الفاضى كا ورق فاضى و بيوزع منه و بيديه لإبنه عشان يذاكر فيه
بس مش هو لوحده بردوا الى طلب منه الورق بردوا شريك معاه

شريك أخر
ممثل مشهور شارك فى تمثيل فيلم هابط على رأى تهامى باشا فيه لحمة و خلاص
ممثل كل أدواره سكر و عربدة نقل الفكرة دى للشباب و بيحاولو يقلدوه

شريك أخر
الموظف
الى ما بيأديش شغله غير لما تديله ما يسمى بالحلاوة
و فراش المدرسة الى ما بيدكش النتيجة غير لما تديله حلاوة نجاحك حتى لو انت ساقط
مع إنه مش من حقه و كمان هو بياخد مرتب عشان كدا

شريك كمان
عسكرى المرور
الى طول النهار عمال يكتب مخالفات لمين ما تعرفش عشان يملى الدفتر و خلاص

كفاية كدا عشان انا تعبت من كتر الفساد

بس فى ملاحظة إن كتير من الى فاتوا دول بعد زوال النظام بيستفحلوا فى فسادهم دلوقتى و مستغلين الفرصة
كان اللى بيعمله معاهم نظام مبارك حلال فيهم جدا و محدش يقدر يقول غير كدا