رجاء المساعدة فى تنظيف الردياتير من الصدا

الردياتير عندى غرقان صدا هل ممكن احط اى حاجة جواة زى خل او مزيل صدا الردياتير جديد اعمل اية وممكن اروح عند مين يعملهولى

دلونى اللة يباركلكم

بص حضرتك انا معايا اكسيل زى حضرتك وكان الريداتير عندى برضه سىء

جبت مية موبيل خضرا من البنزينة ب 58 جنيه ومتسترخصش عشان انا جربت من اللى ب 25 جنيه وندمت جداااااا وغيرتها فورا

ورحت للميكانيكى بتاعى فى شبرا وفكلى الخراطيم ونزل كل الصدا وشال قربة المية ونضفها كويس اووى ونضف الدنيا كلها وحط المية الموبيل وخففها بالمية المقطرة واوعى تحط مية من الحنفية ابدااااااا والا ولا كانك عملت حاجة - مية مقطرة من البمزينة ب 2.5 الزجاجة واشترى كام واحده فى العربية وخليهم معاك وابقى زود منهم كل ماتحتاج

والمصنعية اللى خادها 20 جنيه على كل ده والعربية بجد بعد كده اختلفت تماما

واى استفسار انا فالخدمة

متشكر جدا يا besho
انا كنت حاطط من المية بتاعت موبيل دية فى عربيتى القديمة مياة جميلة جدا طبعا
بس المشكلة انى مش عاوز احط المية دية الالما اغسل الردياتير من اصدا الى فية الاول ويبقى كويس وبعدين ابقى احط المية

هى المية المقطرة دية مية نار وهل العملية دية عندالميكانيكى ولا بتاع الردياتير

العفو استاذى العزيز

حضرتك طبعا هتغسله الاول عند الميكانيكى بتاعك او اى بنزينه وانا سمعت هنا انا بنزينة اول عباس ممتازة وبرضه بنزينات وطنية بتاعت الجيش ممتازة بس بصراحة مجربتهاش

والمية المقطرة دى مية خالية من الاملاح غير اللى حضرتك قلت عليها اللى هى حمض الكبريتيك ودى بتاعت البطاريات بس احذر وانت جاى تشتريها من البنزينة واقرا ان مكتوب عليها مياه مقطرة لحسن الازازتين شبه بعض جدااا عشان انا مريت بالموقف ده والحمدلله لحقت نفسى قبل ما انزلها فى الريداتير

والعملية دى كلها ممكن يعملها ميكانيكى بس اهم حاجة يكون عنده ضمير عشان ميكسلش فتنضيف حاجة يا اما فى البنزينة زى ماشرحت لحضرتك