الموضوع: نوارة نجم: مليونية الثلاثاء... شفيق يا راجل لازم يرحل

المشاركة الأصلية كتبت بواسطة tlrsiap

مليونية الثلاثاء حنروح ونفضل قاعدين لحد ما يحصل الآتي

شفيق يمشي، بحكومته وكل رموز الحزب الوطني

عمر سليمان يتسلم مدام الحكاية وصلت لأنه يبتدي يحرك مايكل منير وطفلة تتخطف وعايزين يعملوا لنا فتنة في البلد

زكريا عزمي يتسلم

مبارك واسرته يتقدموا للمحاكمة

دي مطالبنا، ومطالبنا لازم تبقى مسموعة بمليونية في الثلاثاء واعتصام اعتصام حتى يتحقق اللي احنا عايزينه

شفيق يدين بالولاء لمبارك

عمر سليمان مازال فاعلا وكل عملائه المعروفين انهم بيشتغلوا معاه من سنين ابتدوا يصحصحوا

زكريا عزمي متورط في فساد وما اتحاكمش

مش بس مبارك ما اتحاكمش ابنه ومراته جم وبيتصلوا بالمسئولين

وكما قال عزمي بشارة ابحث عن الانتهازيين

الانتهازيين صوتهم علي وبقوا يقولوا كلام مش لطيف، زي مثلا صابر عرب رئيس الهيئة العامة للكتاب اللي قال: انا ما امرتش بازالة صورة سوزان مبارك من على الكتب

مش حيتنصل الا اذا كان عارف انه حيتئذي

لا بقى... انا ناس ماتت جنبي

والنظام ده ما سقطش حتى لو تم اقصاء رأسه، والنظام ده فيه عداء شخصي بيني وبينه، النظام ده كره المصريين في بعض، وخلا المصريين يموتوا بعض، وشكك المصريين في بعض، وخوفهم من بعض، كل اللي عمله فينا كوم وانه يقومنا على بعض واحنا مالناش بعد ربنا غير بعض كوم تاني

انا الوحيدة انا وجيميهود اللي كنا مغفلين وقلنا قبل يوم 25 ان مش ممكن ابدا مصري يضرب رصاص على مصري ومش ممكن الشرطة المصرية حتى لو جالها امر تنفذ

بس جالها امر ونفذت، وانا ناس وقعت ميتة جنبي على الكوبري، وصلينا المغرب وطلعنا على كوبري 15 مايو واحنا رافعين ايدينا وبنقول: لا اله الا الله (مسلمين ومسيحيين كانوا رافعين ايديهم وبيقولوا لا إله إلا الله، وعلى فكرة ما يبقاش واحد مسلم اهبل يقصد يهدي النفوس يقوم قايل: يا جماعة ما تقولوش لا اله الا الله عشان المسيحيين ما يزعلوش، انت كده بتزعل المسيحيين اساسا، لانك بتتهمهم انهم مش موحدين، لا اله الا الله ما بتزعلش المسيحيين، اللي يزعلهم انك تنفيها عنهم)... وضربوا علينا قنابل ورصاص حي ورصاص مطاطي

مهما يحصل لهم عمر ما يشفي غليلي

الوضع القائم وضع مش صح ومش صحي ومش نتائج ثورة دي

رؤوس الفساد لسه موجودة

رؤوس النظام لسه موجودة

تحبوا احكي لكم عن عمر سليمان شوية؟

رجاء الاطلاع على ويكيليكس الجزء الخاص بالسفارة الامريكية بالقاهرة، ومش حتتعبوا كتير، الوثائق اللي هو فيها بتحمل اسمه في العنوان من فرط اهميته لاسرائيل وامريكا، هو ده عمر سليمان اللي كان بيجتمع مع الادميرال موين سنة 2007 وبيخطط معاه الحرب على غزة 2009 2010 وقال له احنا عايزين سحق حماس و"على حماس ان توقف صواريخها ولن نطلب منكم وقف اطلاق النار الا حين نتأكد من تدمير سلاح حماس" ده اللي متورط في تعذيب ابرياء من كل الجنسيات - بما فيهم مصريين طبعا - حتى الموت بالتعاون مع امريكا قبل ما تبعتهم جوانتانمو، ومن غير وثائق ويكيليكس، اخطف رجلك لحد سيناء ووقف اي عيل صغير وقول له: عمر سليمان، واسمع بقى وشنف اذانك... جرائم حرب

احنا عايزينه الراجل ده مدام لسه طالق علينا دلاديله وبيعمل لنا فتنة طائفية

تفجير كنيسة القديسين حيلبسها العادلي لوحده؟ لا بقى، العادلي وسليمان الاتنين متورطين فيها عشان المفروض ان الايام دي اسرائيل كانت تضرب غزة والمفروض اننا كنا حنقفل المعبر ونقدم مساعدات اكبر لاسرائيل وتفجير الكنيسة كان توطئة للمذبحة اللي حتحصل للفلسطينيين والفضيحة اللي حتحصل للمصريين، لولا ربنا عالم بينا احنا الاتنين اننا غلابة

وعايزين زكريا عزمي وعايزين جمال مبارك

وعايزين كل متورط في قتل الشهداء..

مش انا لوحدي اللي ما كنتش مصدقة ان مافيش ظابط مصري حيضرب نار على مصري، شباب كتير من اللي استشهدوا ما كانوش مصدقين، ووقفوا قدام العربيات وقدام الظباط على اساس انه مش ممكن ابدا يهون عليه يقتله... وقتله

قتله

قتله

ومنهم اتقتل قدام عيني وهو مش مصدق انه بيتقتل وعمري ما حانسى نظرة عينيها اللي كلها اندهاش وعدم تصديق وهو بيطلع في الروح

مش حتبرد ناري ابدا... مهما يتعمل فيهم مش حتبرد ناري ابدا...

يا يتعاقبوا واحد واحد يا اموت فيها، انشالله اموت لوحدي

ومعلومات جات لي اوف ذا ريكورد لما كنت في الجزيرة امبارح: الجيش والشعب ايد واحدة فعلا على فكرة، وبيتعرضوا لضغوط كتير، ومحتاجينا نساندهم باننا نلح في مطالبنا، والجيش مكروه جدا من اسرائيل وامريكا ومن دلاديلهم اللي بيحاولوا يرجعوا دلوقت، لازم يتقطع دابرهم خالص

ومبارك راس الافعى... هي دي الرؤيا بتاعتي، لما شفت التعبان وفضلت اضرب في راسه اضرب في راسه، وهو باين انه ميت بس انا كنت عارفة انه مش ميت، فضلت اضرب اضرب اضرب لحد ما اتشق نصين وماما قالت لي: خلاص... مات يا نوارة

شفتها قبل الاحداث بشوية صغيرين

لازم شفيق يمشي

ولازم كل رمز من رموز النظام يمشي ويتحاكم

ولازم كل اللي حرق قلبي وحسسني اني مغفلة اني افتكرته بني ادمي يتعاقب

لازم لازم لازم

----------------------------------

للاسف كلامها اغلبه صح

لازم مطالب الثورة كلها تتحقق

واولها محاكمة المسئول الرئيسى عن دم الشهداء

مينفعش يتساب من غير محاكمة عاجلة و سريعة

مينفعش المماطلة والمفاصلة فى دم الشهيد

المشاركة الأصلية كتبت بواسطة a.saad

بسم الله ماشاء الله
الشيخة نوارة تتنبأ

لا يا فندم ده مش تنبأ

ده اسمه فى الادب اسقاط

نوارة بتستخدم اساليب ادبية متشابكة

مهو ابن الوز عوام

طيب بقا خلاص ننزل بقا كلنا الشارع تانى يوم التلات ونوقف البلد كلها تانى عشان شفيق يمشى ولما يجى حد تانى ممكن يكون درس الثانوية العامة بتاعتة فى مدرسة مبارك الثانوية بنين نقوم عاملين مظاهرة تانية نمشية عشان كان فى مدرسة مبارك للثانوية بنبن و عادى بقى بيس يعنى ولا نقضيها أحكام عرفية عشان نعمل مظاهرة كمان نمشى قادة الجيش عشان كلهم سلمو على مبارك فى احتفلات 6 اكتوبر وحفلات تخرج الكليات الحربية
مثل صغير بس ونا مش بشبة بلدنا ببتوع برة
بس بتوع برة زى العمال مثلا فى مصنع سيارات لما بيعملو أعتصام نص العمال بيعمل اعتصام والنص التانى شغال عشان فاهم يعنى اية عجلة الانتاج وان المصنع كلة لما يقف يبقى هما أول ناس هتخسر بس دة طبعا برة وملناش دعوة بيهم احنا بتوع الديموووو قراطية