الموضوع: فرأيي الحل ده ينفع المؤيدين والمعارضين والمشككين واللي مالهمش فيها كمان

احنا دلوقتي مقسومين 3 احزاب على الاقل
1- المؤيدين اللي هم مش مع الثورة أو معاها بس شايفين إنها عملت اللي عليها لحد دلوقتي
2- المعارضين اللي شايفين النظام ده فاشل ودي لسة اذيال النظام والناس دول بيشتغلونا وهم لسة مسكين البلد
3- المتشككين : اللي هم فالنص شوية والي همة مش معارضين بس مش مستريحين للي بيحصل وحسين إن فيه حاجة غلط ولا مؤيدين بس فنفس الوقت برده شايفين إن البلد لازم تمشي عشان تقف على رجلها

المهم أنا الحل ده فكرت فيه لما لقيت الدنيا بقت كلها إشاعات وتشكيك فكله وكان فاضلي شوية وأشك في إن أنا نفسي عميل للمريخ وإن عربيتي أصلا هي ترانسفورمر

المهم عشان البلد تمشي المفروض ميبقاش فيه مظاهرات ووقف حال و كده المؤيدين هيتبسطوا
وعشان المعارضين ومتشككين يتبسطوا برده لازم يشوفوا واقع ملموس من الاسلحة مش من التعديلات اللي مش هتبقى ملموسة دلوقتي

وفي الحالتين لازم نتفق أولا إن لازم يكون فيه واحد الناس كلها تلتف حواليه عشان هو ده اللي يقود البلد أو على القال هو اللي يبقى فالصورة اليومين دول

وكل واحد من الاحزاب ال 3 عنده بدل الواحد 2-3 ومفيش ولا واحد هيوافق عالتاني ده غير إن الحزب دي ممكن من جواها تختلف عالممثل ليها

طب تعالوا نشوف الراجل اللي فالصورة دلوقتي اللي هو احمد شفيق اللي هو برده عميل النظام وقريب مبارك وكل الكلام اللي طلع عالراجل بحق أو بدون

لو خدنا الراجل ده وتلفينا كلنا حواليه دلوقتي وساعدنا في مسيرة الاصلاح اللي هو قال عليها والله وحده اعلم بنواياه والضغوط اللي عليه


هيبتدي يشتغل دي أول حاجة وال أكيد إنه عارف إنه هيبقى متراقب إن كل الناس فـالطبيعي إنه هيبقى كويس عالاقل فالفترة اللي جاية دي وكده احنا كسبنا راجل شغال كويس وعالطريق الصح
ادي واحدة
2-الراجل ده لو لقى إن فعلا الشعب كله مؤيده وإن كل الناس حواليه مش هيخاف من معارضة الناس اللي لسة عندهم سلطات جامدة شوية اللي هم لسة متحاكموش
3-هيخاف قوي عالغلطة عشان ساعتها هيخسر الكل
4-هياخد ثقة في نفسه جامدة جدا ويقدر بيها يواجه اللي هو مش قادر عليهم دلوقتي ويحاسبهم ودي امتداد للنقطة التانية

فالحالة دي هيكون شغله كله من اجل مصر -ولا بلاش الكلمة دي عشان تاريخها اسود معانا -
المهم يعني إنه هيمشي فطريق الاصلاح اللي احنا عايزينه وشوية قصقصة ريش للفاسدين

ياجماعة البينت كلها إن بدل مانجيب واحد من المعارضة ويمسك خليه واحد من أي حتة هو اللي ماسك ويعمل اللي احنا عايزينه مش هتفرق بقى اسكندراني ولا صعيدي بس عشان يعمل كده لازم نبقى حواليه نراقبو ونمنعه من الغلط ونرشدو عالطريق اللي كلنا عايزينه اللي هو فالاخر مصلحة بلدنا اللي هي مصلحتنا كلنا

حد فِهِم حاجة ولا أنا برغي وخلاص
الله أيسامحك يا سيف الإسلام إنت والقذافي بواظتولنا دماغنا بخطبكو