الموضوع: ايه ده !! حد يعرف ايه الشئ ده ؟

بسم الله الرحمن الرحيم

اولا السلام عليكم ورحمة الله وبركاته

ثانيا
تحية طيبة لكل اخواني في المنتدى
ثالثا
انا عملت الموضوع ده كنوع من انواع الخروج عن المألوف والتغيير لأنه الإجتماعي بقاله يومين شكله يوجع القلب الحزين الواحد قبل كده كان يبقى قاعد في قسمه ولما يخلص كل حاجة يجي على الإجتماعي يقعد يسهر يدخله دلوقتي كله تصريحات وقال وقيل وحصل وفصل تخلي الواحد يحزن على الحال اللي احنها فيه ..

المهم انا بقى من الشخصيات اللي بتطالب انه احنا نخرج شوية عن المألوف لأنه ده ها يساعد الإنسان على الإبتكار والتغيير وبيدفع مسيرة وعجلة التنمية اللي مش لاقينها لحد دلوقتي وكل يوم بنتفرج عىل المصايب اللي بتتحدق علينا (كان فلم ايه اللي ممدوج عبد العليم بيقول غطيني وصوتي يا زينب ) !!!!!!!!!!!!!!!!!!!!!!!!!!!!!!!!!!!!!!!! اعذروني على التنقل السئ بين المواضيع ده ناتج للتشتت اللي انا ما زلت حاسس بيه بعد اللي حصلي ..
الكلام ده حصل قبل احداث 25 يناير ولكن انا كنت منتظر اني اعرض عليكم الموضوع عشان تتحسروا زي :D ونعيش الوهم سوا .. اللي حصل كالتالي انا كنت مسافر برة مصر في الفترة اللي فاتت دي على طول في بلد اوروبي وفي يوم زملائي في الرحلة قالوا ما تيجي ننزل نشوف التوكيلات بتاعت العربيات فأنا وافقت ولكن بشرط اننا نتفرج على حاجات متكنش موجودة عندنا يعني عربيات مش ها اعرف اتفرج عليها تاني في مصر فجت بالصدفة البحتة اننا لقينا توكيل مرسيدس ...
فزميلي وائل قالي بينا نتفرج عليه
فأنا قولتلوا اخبطك بي ايه يعني سايبين المرسيدس في مصر نيجي نتفرج عليها هنا قالي يا ... افهم هوة المرسيدس اللي هنا زي اللي هناك ( في هذه اللحظة تماما ايقنت اني غلطت من اساسوا اني خرجت مع الكائن ده وسافرت كمان معاه ) فقولتلوا وايه بقى يا سيدي الفرق .. !! قالي يابو السيد افهم احنا اللي بيجلنا من مرسيدس ده فرز تالت يا معلم انما هنا فرز اول يا كنج !!!!!!!!!!!!!!!!!!!!!!!!!!!!!!!!!! انا سكت ومرديتش لأني مش ها آخد عناء الرد !! فرز اول وتالت هوة احنا بنشتري سيراميك !!!!!!!!!!!!!!!!!!!!!!!!!! اتفضل يا حج و وخلينا وراك ..
فالمعرض الحقيقة كان اكتر من روعة وتحفة ..

وكان كالتالي

قسم الـ C-class
قسم الـ E-class
قسم الـ S-class
وقسم الـ تعديلات بواسيطة AMG

وكانت اسعار كلها يعني تعتر مخسوف بيها الأرض بالنسبة للي عندنا في مصر :D يعني بتمن فيلا محترمة عندنا تجيب الـ S-class كمان AMG يعني ها تدلع نفسك آخر دلع وطبعا الحج وليد معتقش اللي خلفوا اي عربية كلو مكتوب عليها برجاء عدم اللمس (بلغة البلد) وده مفيــــــــــــش (الطبع المصري غلاب ) يفتح في كلو ويركب ويبصم على كلو العربيات يا جدعان متلمعة والله زي المرايات !!!!!!!! لحد ما وصلنا لقسم الـ super cars !!!!!
فبيقولي تعالا ..
انا دخلت توقعت اني ها الاقي عربيات من بتاعتنا .. بتاعت البني آدمين ..
دخلت كالتالي
لقيت عربية C-class C200 متعدلة تعديل غريب غالبا مكتوب عليها لشركة سباقات اوروبية .. ودي عادي سعرها يزيد عن الـ C200 العادية بفرق حوالي 20 الف يورو !! اي نعم مبلغ ولكن تستاهل ..
بعد كده دخلت لقيت ماكلارين ...
لحد ما ببص من بعيد وحسيت اني مرة واحدة رجلي مش بتتحرك !!!!!!!!!!!!!!!!!!!!!!!!!!
اعصابي شلت!!!!!!!!!!!!!!!
وائلللللللللللل انا اتشيلت !!!!! عنيا بس اللي بتتحرك وجسمي لأ !!!!!!!!!!!!!!!!!!!!!
مفيش اي رد فعل !!!
اتمسمرت في مكاني !!! وشوفت الشئ ده ..








!!!!!!!!!!!!!!!!!!!!!!!!!!!!!!!!!!!!!!!!!!!!!!!!!! !!!!!!!!!!!!!!!!!!!!!!!!!!!!!!!!!!!!!!!!!!!!!!!!!! !!!!!!!!!!!!!!
انا فضلت والله العظيم ما يزيد عن الـ 32 دقيقة كاملة واقف في مكاني مش بتحرك ومدعي اني غير مهتم وكأن شيئا لم يكن !!! حتى الورقة اللي فيها المواصفات مفكرتش ابص عليها عشان غالبا ها اطب ساكت !!!!!!!!!!!!!!!!!!!!!!!!!!!!! ايه ده !!!!!!!!! وليه كده !! دخلت على موقع مرسيدس والف الف الف ملقتش اي حاجة تمت للصاروخ الطربيدي ده بصلة نهائيا !!!!!!!!
انا بدأت اتحرك والف حوالين العربية لحد ما ببص عليها من ورا ملقتش اي فئة مدوة عليها ولا اي حاجة نهائيا !!! فلما بتكلم مع الراجل انها من جوة التصميم بتاعها تحفة ولكن مافيش كاسيت مش عيب بردوا :D :D الراجل قالي يا سيدي الفاضل ... واقتبس من كلامه " شركة مرسيدس لم تضع فيها مشغلا للإسطوانات ولا اي وسيلة من وسائل الترفيه السمعية لأن هدير محركها هوة احلى نغمة ستسمعها في حياتك " !!!!!!! والراجل بصراحة مكدبش !!!!! بعد شوية بتكلم معاه قالي انه الـ dash board الحتة الكاربون فايبر اللي حوالين الفتيس دي بس تساوي بعملتنا حنا اكتر من 70 الف جنيه مصري :D حسيت انه الراجل ده فاهني غلط !! ده احتمال يكون مش فاهمني اصلا ... وانه الدركسيون بتاعها مصنوع من جلد ثعبان واحد قطعة واحدة يعني ده تعبان واحد كامل .. (مفروض انه دي ميزة ) .......... وصحيت على صوت المسؤول وهوة بيزعق في وائل على اللي بيعمله ابص على وائل الاقيه بيعمل ايه :D :D
واقف عند الكوتش الأمامي يمين وبيدوس على العربية جامد الراجل المسؤول بيقولوا انتا عدين الشريط ازاي يا استاذ كده ممنوع !!! انتا ممنوع اصلا تلمس العربية !!! انا بسئلوا بقولوا يا وائل انتا بتعمل ايه يا حبيبي قالي بجرب السوست والمساعدين بتوعها لحسن شكلها عفشتها مش قد كده !!!!!!!!!!!!!!!!!!!!!!!!!!!!!!!!!!!!!!!!!!!!!!!!!! !!!!!!!!!!! كان نفسي دلوقتي حالا اقطع تذكرة وارجع مصر اترمي تحت رجلين الحج اقولوا سامحني يابا !! حقك عليا !!! انا اللي غلطان !!!!!!!!!!!!!
في النهاية بعد ساعتين مباحثات وانا عمال افترج على العربية المسؤول قالي انه ممكن يعمل حركة تشجيع ويخليني اركبها لأنه شاف قد ايه انا مهتم بيها وكمان خلاني ادورها واسمع صوتها ..

الحج وائل والراجل بيقولوا ابوس ايدك انزل وده مفيش طبعا ..
وفوجئت اصلا انه العربية دي ملهاش مفتاح !!!!!!!!!!!!!!! ولا سمارت كي حتى !!!! همة 3 زرار بتدوس عليهم اون الا وهم
OIL inject
Fuel inject
وحاجة ثالثة كده كمان وبعدين تدوس على الـ start engine ويارتني ما دوست !!!!!!!!!! او ما دورت الأر بي ام بتاعها نط لخد 3.5 !!!!!!!!!!!!!وفجأة الراجل بيديني خوذة البسها !!!! احط الخوذة :D الاقي فيها سماعات داخلية جوة الخوذة ( تكنولوجيا يا عالــــــــــــــــــــــ ــــــــــــم) وسمعت الآتي .
Fuel system checked
gear box checked
lighting system checked
breaking system checked
engine running checked
وفي الآخر كتب على الشاشة Enjoy your life journey (Mercedes)
الراجل بيقول ودي بصراحة انا مش بالعها انه فيها نظام اخراج هوائي هطير على السمع بمعنى العربية دي لو الأر بي ام بتاعها وصل لـ 8 فده خطر على سمع الإنسان وعلى الزجاج المحيط عشان كده لاحظوا العربية مفيش فيها قطعة زجاج واحدة .. على فكرة الأر بي ام بتاعها كان لحد 10 تقريبا والله ما فاكر بس كان حاجة مش طبيعية بجملة اللي احنا فيه .. !!

بس والله العظيم والله العظيم والله العظيم انا نزلت من العربية وقفت جمبها ومعرفتش اعمل ايه رحت معيط !!!!!!!!!!!!!!!!!!! دي عربية تغدي من جنبها لو شفتها في الشارع متعملش اي حاجة غيب انك تيجي جنبها وتقعد تعيط !!!!!!!!!!!!!!!!! لأنه اي رد فعل تاني ها يكون رد فهل غير مسؤول ....... طبعا فتحلنا الكبوت نتفرج على المحرك (مش بقولوكوا الراجل كان بيتعامل معانا على اننا ها نشيل والله ما فاهم حاجة ) بس منعني اني اصور المحرك بحجة انه دي ملكية فكرة وميصحش تتنشر ......ولكن بصراحة في المجمل العربية !!!!!!!!!!!!!! مش ها انطق ها اسيبكم انتم تتكلموا على التجربة المنيلة اللي انا عشتها ...
كفاية اني كنت مأجر عربية هوندا اكورد هناك انا بركبها وانا قرفان من نفسي !!!!!!!!!!!!!!!!!!!!!!!!!! بعد دي بركب دي !!!!!!!!!!!! ومع ان الأكورد دي كانت حلم عندي برضوا ولكن دي قصة تانية خالــــــــــــــــــــــ ــــــــص

وبالمرة بقى انا ها افقع مرارتكوا شوية عشان انا عمال ها اجنن نفسي بشوية الأسئلة دي لأني حاسس اني انا اللي مش طبيعي ...


انا من وجهة نظري في شوية حاجات انا مش قادر ابلعها نهائيا ... دلوقتي العربية دي راكب واحد بس !!!!!!!!!!!!!!
يعني مفيش كائن تاني ها يركب معايا !!!!!!!!!!!!!!! ؟؟؟؟؟؟
بالنسبة للحج اللي ها يركب العربية دي مكتوب عليها يبقى منوا للهواء على طول ... واذا كانت العربية اصلا مش بتنزل غير كده وملهاش سقف بيتقفل ... ايه الحكمة اذا من وجود فتحات للتكيف ؟؟؟؟؟؟؟؟؟؟؟؟
صيانة الـ 1000 بتاعت الصاروخ ده بكام ؟
ودي يتحطلها بنزين من بتاعنا ولا منين !!!!!!!!!!!!!!!!!!!!!!!!!!!!!!!!! ده يعمل عقد مع مصر للطيران لتزويده بالوقود ...
والله انا ما كنت ناوب اعمل الموضوع ده ولكن قلت يعني اشمعنا الناس كلها تبقى محبطة لازم اكمل عليهم :D
ولو حد شايف عيوب تانية فيها يقول .. لأني بصراحة مش عارف اعتقد انها مش مقامنا في مصر عشان كده احنا من اساسوا منعرفش عنها حاجة :D
بس انا حاسس انه فيها شبه كبير جدا من الماكلارين في طريقة فتح الباب ولكن فكرة الكبوت ده والكراسي بالطريقة دي !! لأ بصراحة جديدة دي عليا بصراحة :D
والله ولي التوفيق ...
ملاحظة:- اللي عايز يشتم او يضرب نمرة وسائل الإتصال متوافرة والحمد لله بلاش تقلوا قيمتي على العام كده يعني بينا وبين بعضينا ها تبقى ميسرة :D

ههههههههههههههه بجد بارك الله فيك ضحكتني
بس ايه الصاروخ الفظيع ده

تحت امر حضرتك :D

و عارف تركب عربيات تاني؟!!!!

ربنا يكون في عونك, انا اتعقدت من الصور بس.

انا عايز اقول لحضرتك اني من ساعة ما نزلت مصر تاني وكل ما ااشوف عربية مرسيدس واللي راكبها متفشخر قوي بيها عايز انزل ..... عليه عشان يعرف القيمة اللي هوة فيها دي..يا عالم احنا لو شالوا من علنا الجمرك والله ها نركب المرسيدس زي ما الكتاب بيقول ..

حرام عليك يعني احنا ناقصين ذل
تصدق ان حلال فيك وائل

والله يا دكتور محمد انا ما قصدي غير اني احبط المستوى العام من المعنويات عشان نعرف احنا فين بالزبط هههه وبالنسبة لوائل في سفرية للهند قريب بفكر آخدوا تاني معايا ساعتها ها تبقى القاضية هههه..

ياااااااه ستيرلنج موس والله انا كنت حعيط بدالاك
العربيه ديه اسطوره و ستيرلنج زات نفسه راجل اسطوره
انا من اول ما مرسيدس نزلت الستيرلنج موس ديه وانا نفسي اشوف لها فيديو و هي بتتحرك و مش عارف
بجد عربيه بسم الله ما شاء الله والله العربيه ديه اسطوريه جدااا جدااا و بجد ستيرلج موس اسطوره جداا برضو
و يا رب ربنا يوفقني و اركب واحده انا كمان :)

مهي الفكرة اني اكتشفت انه الموديل ده مفيش منه غير 75 عربية بــــــــــــــــــــــــ ـــــس والحج سترلينج موس زات نفسوا لو عايش مكنش ها يعجبوا الوضع ده قالك 75 .... دي وش الواحد ها يتسوح في قطع غيارها .. بس اكيد الإستيراد ها يحل القصة دي .. :D

روح يا شيخ



ربنا يسامحك

كده انا فهمت انتا عايز تقول ايه يا فيلكش من غير ما تشتم انا حاسس بيك ...هه

موضوع جميل, و هدفك في كسر الحاله العامه رائع جدااا و تشكر عليه فعلاً...

اسلوبك في سرد الاحداث دمه خفيف جدااا و يشد, و هضم صوتي لصوتك و هسأل...

يا ترى صيانة الـ1000 للصااااروخ ده بكاااااام..؟؟؟ ههههههههههه

شكرااا يا باشا على الموضوع...

تحياتي الشديد لك اخي محمد وتحت امر حضرتك ولي الشرف ان اكون من راسمي البهجة على محياك واعتقد التوكيل بتاع مرسيدس ذات نفسوا انا لو رحتلوا بالصاروخ ده همة نفسهم ها يقفوا يتصورا جنبه ... بس ما زالت قطع الغيار تؤرقنا جميعا ها نجيبها منين وازاي ..
هههه تحياتي لك يا استاذ محمد ..

برضه الله يخربيتك يا حسنى انت السبب :)

هههههههههههه طارق انتا احلى رد مضحك والله لحد دلوقتي هههههه يا حبيبي خلاص النظام سقط وبقينا صيع ملناش كبير خلاص يا حبيبي العفريت اللي كان لابسنا طلع اهدا اومال انتا من ساعة نا نزلت يوم 25 يناير وانتا مش عاجبني كده حاسس انه الروح الثورية لسة موجودة جواك ... اتمتع بقى بمكاسب الثورة والإنفتاح .. بس والله يا طارق لو حسني ها يركبنا العربية دي يبقى ابيع نفسي وافقئ عيني واضع مكانها حجرين ... انتا مش متخيلها كمان على الواقع شكلها عامل ازاي يا طارق ...