دعوة للإشتراك فى حملة الالتزام بأبواب الصعود والنزول فى المترو

السلام عليكم يا شباب

يا جماعة انا عامل حملة للإلتزام بأبواب الصعود والنزول فى المترو ..... عاوزين نروح ننظم الناس هناك فى المحطات علشان الناس تتعلم النظام وكمان هنعيد على الدهانات والخطوط الممسوحة فى المترو إن شاء الله

انا النهاردة روحت إدارة المترو والناس هناك كانت فى غاية التفهم واللطف ورحبوا بالفكرة ووافقوا عليها وبننسق مع مهندس من المترو هيكون معانا علشان لو احتجنا حاجة او كده

ياريت الكل يدخل على اللينك ويعمل اينفيت لاصحابه ومعارفه وياريت الكل ينزل ..... باقى التفاصيل موجودة على الصفحة

Login | Facebook

بالتوفيق ان شاء الله

ممتاز جدا
بارك الله فيك
بس في مشكلة
مش عارفة نظام سائقي المترو
بييجوا في المحطات الزحمة اللي في ناس كتير طالعين ونازلين فيها ولما المترو بيبقى زحمة
بيشغلوا السارينة بتاعة غلق الابواب بسرعة جدا ويقفلوا الابواب بسرعة جدا في ناس ساعات المترو بتنزل والمترو بيقفل على هدومها وشنطها
اما يقى المطة الرايقة والمترو بيبقى رايق
بيقف في كل محطة براحته وينزل يجيب كباية الشاي ويهزر مع زمايله شوية
حاجة تنقط

اقتباس:

---

المشاركة الأصلية كتبت بواسطة nonetta

ممتاز جدا
بارك الله فيك
بس في مشكلة
مش عارفة نظام سائقي المترو
بييجوا في المحطات الزحمة اللي في ناس كتير طالعين ونازلين فيها ولما المترو بيبقى زحمة
بيشغلوا السارينة بتاعة غلق الابواب بسرعة جدا ويقفلوا الابواب بسرعة جدا في ناس ساعات المترو بتنزل والمترو بيقفل على هدومها وشنطها
اما يقى المطة الرايقة والمترو بيبقى رايق
بيقف في كل محطة براحته وينزل يجيب كباية الشاي ويهزر مع زمايله شوية
حاجة تنقط

---

على فكرة انا روحت ادارة المرور وخدت موافقة ونازل معانا بكرة مهندس من المترو علشان يبقى معانا ان شاء الله

وكمان هيتم اذاعة ان الناس تلتزم بالابواب وتتعاون معانا فى الاذاعة الداخلية بتاعة المترو

بالتوفيق ان شاء الله

ربنا يبارك فيك
ايوة كده ايدينيا في ايدين بعض

إزيكم يا شباب .....

الحمد لله جمعنا نفسنا ونزلنا النهاردة انا وأصدقائى وكنا حوالى 22 واحد واتقابلنا فى محطة انور السادات الخط الثانى ونسقنا مع المهندس فى المترو علشان يذيع للناس التعاون معنا والالتزام .... وعرفنا برضه ان فيه مجموعة شباب تانية راحة محطة حسنى مبارك
وقفنا ننظم الناس ونرشدهم لابواب الصعود والنزول وكنا ماسكين لوحات كتبناها علشان الناس تقراها وتتعاون معانا ..... طبعا الحمد لله كان نسبة 80% من الناس متعاونة وعلى الرغم من اننا وقفنا كتير وتعبنا بس الدعوات اللى خدناها والتحميس من الناس كان بينسينا التعب ..... نسبة ال 20% من الناس الباقية تنقسم إلى ناس اصلا مش قابلة فكرة الطلوع والنزول على اساس ان فيه ناس كتير بتركب محطة واحدة فإزاى يعنى يركبوا من باب ويتحركوا داخل المترو للباب المخصص للنزول وكل ده علشان محطة واحدة .... وفيه ناس تانية بقى ربنا يسامحهم كانوا بيطنشوا او يزعقوا او يعاندوا بس الحمد لله محصلش اى خلاف كبير لاننا كنا بنسكت واللى مكنش عاوز يلتزم كنا بنحرجه بالزوق يمكن يحس

كمان القناة الثالثة المصرية صورت معانا ... وفيه اكتر من صحفية عملت حوارات معانا برضه .....

اللى عاوز اقوله ياريت الناس ياجماعة تتبنى نشر النظام فى المجتمع ... بجد والله الناس بقت بشوشة عن الاول خالص وتحس كده ان الروح المصرية بتاعتنا رجعت تانى .... روح ثورة 25 يناير لسة موجودة والله فى الناس واحنا كطبقة مثقفة لازم ننشر الوعى بين الناس ....

بما ان الدراسة بالجامعات اتأجلت تانى .... فبإذن الله هيكون لينا مرة كمان هننزل فيها على الاسبوع اللى جاى .... ياريت الناس تشارك على البادج على الفايس اللى احنا عملنها او حتى بنشر الوعى بين الناس

صورة اخيرة عاوز اوريهالكوا علشان تعرفوا قد ايه احنا بدأنا تتغير

http://i55.tinypic.com/ivg1no.jpg

ده صورة لموقف ميكروباصات الناس منظمة نفسها فيه وواقفة طابور ....... حد كان يتخيل ان ده يحصل فى مصر ؟؟؟ ..... ياريت بقى الكل يستغل الروح الجميلة الموجودة عند الناس دلوقتى ويقوم باى حاجة مفيدة لبلدة ولشعبه

معلش طولت عليكما ..... تقبلوا تحياتى

انا ان شاء الله معاكم الأسبوع القادم بس اعملو قبليها ايفينت كدة وممكن اجيب معايا 4
وربنا معانا ان شاء الله

والله برافو عليكو وربنا يبارك فيكو
بس انتوا نزلتو الساعة كام
على فكرة الاهم في اوقات الذروة علشان الناس تتعود على النظام
وكمان في المحطات المزدحمة صباحا من المرج حتى سعد زغلول بعد كدة المترو بيروق
ومن حلوان حتى رمسيس بردو صباحا
وبعد الظهر بيبقى العكس

فكرة ابواب للصعود و ابواب للهبوط فكرة مش عملية خالص فى الزحام
و مافيش فى اى مترو فى العالم ابواب للصعود وابواب للهبوط ..

انت بتركب من الباب القريب منك و تنزل كذلك من اقرب باب منك


اللى محتاج يتنظم هو كيفية الصعود و الهبوط ..يعنى مثلا الاولوية للهبوط من المترو اولا ثم الصعود من المحطة و هكاذا

انما فكرة صعود من باب و هبوط من باب تانى ..فكرة مش عملية خالص و لا تصلح على الطلاق