الموضوع: تركيب عدد 4 مساعدين و 4 كاوتش تراب في التوكيل بالتفاصيل

تم اليوم الحمد لله تركيب عدد 4 مساعدين و 4 كاوتش تراب في التوكيل و اليكم التفاصيل

توجهت اليوم للتوكيل علي حسب الموعد المحدد مسبقا في الحجز
كنت هناك الساعه 10 صباحا بالظبط و دخلت علي الاستقبال و قابلت المهندس احمد ناجي راجل زوق الصراحه و اخد البيانات و طلع معايا يستلم العربيه الموضوع ماخدتش 10 دقائق بالكتير و كانت العربيه مرفوعه علي الونش و بيفكوا ف اول عجله فعلا حسيت ان موضوع الحجز دا مهم جدا
كانت ملاحظاتي في العربيه
انها و هيا دايره علي السلانسيه تلاقيها برجلت مره واحده كده و رجعت طبيعيه تاني
طبعا تغير المساعدين بكاوتش التراب و هما براحه كشفوا علي بقيت العفشه من غير ماقول
الساعه 1 كانت العربيه خلصت و ركبوا المساعدين و كله تمام و ظبطوا المحرك
نزلت قعدت تحت لحين الانتهاء من الفاتوره و حاسبت و اخدت الكشف و رجعت تاني لمهندس الاستقبال لمعرفة ايه اللي حصل بالظبط في العربيه من الملاحظات اللي قولتها
1- تم وضع العربيه علي الجهاز و الكشف علي جميع الحساسات و النتيجه انه فك حساس ال TPS و نظفه تمام و
2- و اعاد برمجة IDeal بتاع العربيه
3- تم فك البوجيهات و ظبط مستوي الشمعه بالفيلر علي اساس اني ركبتهم علطول لاني قايله جيبتهم من التوكيل و ركبتهم قالي طيب هانفك نشوفهم علشان بيتظبطوا
4- تم تركيب المساعدين و الكشف علي العفشه و قالي علي المقصات اللي عايزه تتغير قولتلوا خاليها المره الجايه
5- الفاتوره بقي و امادراك مالفاتوره

(1500) 2 مساعدين امامي
(750) 2 مساعد خلفي (رخصوا علي فكره كانوا ب 1000)
(360) 2 كاوتشة تراب امامي
(130) 2 كاوتشة تراب خلفي
470 أجمالي المصنعيات
481.2 الخصم 15%
3021.48 أجمالي


طبعا مش هاقولكوا علي الاحساس بقي كاني كنت راكب توك توك الصبح

اه نسيت اقولكوا علي حاجه مهمه اوي بقي

الكابوت عندي لما كنت باجي اخد مطب بلاقي الكبوت بيلعب مع المطب و بعدين لما كنت بجري بالعربيه 160 -170 كنت بحس انه هايطير مني المهم حاولت معاه كذا محاوله عند السمكري فشلت الغريب اني مكنتش لاقي سيلكون بين العضم بتاع الكبوت و الصاج فقولت يمكن دا عادي يعني و لما الكبوت اتخبط في اول شهر ليا يمكن اختلف في حاجه كده ولا كده فالعضم فرق
المهم ماختش في بالي لحد انهارده بقي قفلت معايا لازم يجبولي حد من السمركه يشوف الموضوع ايه
فعلا و قد كانت قالي ان مافيش سيلكون بين العضم و الصاج و ازاي العربيه كده قولتلوا دا علي اساس ان انا اللي مقفلها مثلا في التوكيل قالي لأ طبعا بس عموما كده كده مش هانعملوا علي حسابنا علشان الكبوت اتخبط و تقريبا و الله اعلم لو مكنش مخبوط كانوا هايعملوه علي حسابهم ياريت كل الاعضاء يتاكدوا من الموضوع ده بردوا
المهم قولتلوا ماعلينا علي حساب مين انا عايز اعمله قالي 150 جنيه لو مش هاترش الكبوت و 450 جنيه لو هاترشه رديت طبعا المره الجايه ان شاء الله علشان انا معييش فلوس البنزين وانا راجع اصلا

و انا راجع بقي قولت بالمره يعني اروح اعمل زوايا و اتزان لاني كنت شاكك ان العجل مقفول قبل ماركب المساعدين فقولت بالمره و فعلا كان مقفول شويه نتيجه لمطب لولبي لبسته وانا راجع مره علي الطريق قبل الساعدين طبعا

اي استفسار بقي تاني انا في الخدمه

معلومه كده علي جنب

موضوع التقسيط انا كنت قريب في اعلان حاطينه في الاستقبال انهم عاملينها فئات مش سايبنها كده مفتوحه

من 1 جنيه الي 2500 جنيه تقسيط علي 3 شهور
من 2501 جنيه الي 5000 جنيه تقسيط علي 6 شهور
من 5001 جنيه الي 7500 جنيه تقسيط علي 9 شهور
من 7501 جنيه الي 10000 جنيه او اكثر تقسيط علي 12 شهر

و بعدين و الله اعلم بالنسبه للفيزا هاتبقي عامله زي فيزة شمس بتاع زمان دا بتاع الاجهزه الكهربائيه لو حد يفتكر و علي اساس الضمانات هايديك الفيزا بالحد الائتماني التابع للضمانات بتاعتك يعني هيا مقسمه شرائح يعني و الله اعلم بس ان شاء الله هابقي اسال عن الموضوع ده و احطه هنا للعايز يشترك فيه
و هو مطبق علي اعمال السمكره و الاكسسوارات و الصانات و قطع الغيار كمان