الحمد لله يا جماعه....تم بحمد الله عمل صيانة الالف كيلو للسيارة الياريس...

انا زي ما كتير من الاخوة في المنتدي عارفين كنت عايز اروح العبور او ابو رواش....

وبعدين حسيت اني مكسل ...حيث اني من سكان مدينة المنصورة الجميلة والمزدحمة جداااا حاليا...وما عنديش اي مشاوير في القاهرة حاليا غير الصيانة...
قلت اجرب واروح المركز الجديد بتاع النصر ايلي في المنصورة علي طريق المحلة....

واليكم التقرير الفني عن الرحلة الصغيرة...(هو برة المنصورة علي الطريق المؤدي للمحلة الكبري بحوالي 3 كم من المنصورة)

الاتصال بشركة النصر علشان حجز الصيانة...(قالولي حضرتك ممكن تعدي علينا نبلغهم انك رايح النهاردة او تروح علي طول من البيت)
انا فضلت اني اروح اعدي علي الشركة الاول...واستفسر بالمرة عن مكان المركز بالضبط..
الساعه 10:30 كنت في الشركة وفعلا كلمو المركز بتاعهم وقالولي الناس في انتظارك....
الساعه حوالي 10:42 كنت في المركز...
المركز من برة مميز من علي الطريق وفي لوح ارشادية كتير علي الطريق السريع بتشير لمكانة...يعني الوصول سهل..
الشكل العام ..حاجة محترمة جدااا...المكان نضيف والناس محترمة وتعاملهم ممتاز ومرتبين ومنظمين...
مهندس الاستقبال قابلني وكان عارف فعلا اني جاي ...وسألني عن العربية ولو في اي ملاحظات...
قلتلهم علي حكاية الصوت ايلي بيجي من العجل...وعلي حكاية الكاسيت...
خرج معايا علشان يستلم مني العربية ...ومعاة زي ريبورت ماليان خانات بكل ايلي ممكن يتوجد في العربية ..
وبعدين فحص السيارة من الهيكل علشان يسجل اي حكات او خبطات ....
المهم اداني ايصال باستلام العربية ...بعد طبعا انا ما وقعت علي التقرير ايلي كان بيملاة...
جة واحد من الصيانة واخد العربية...وقالولي ممكن حضرتك تطلع الاستراحة تشرب اي شاي او قهوة وتتفرج علي العربية من فوق...
انا بصراحة كنت مستني الحكاية دي....علشان انا باخاف علي العربية من عبث الفنيين والخبراء المصريين ...المهم طلعت وفعلا المكان فوق كويس قوي..مكيف ...انتريهات انتظار كتير...مكان للاطفال علشان يلعبوا...وبوفية مشروبات ساخنة متهيالي انها مجانية....(اصل انا ما حسابتش علي المشاريب ...يبقي اكيد مجانية!!)...

دون الدخول في تفاصيل الصيانة...الاجهزة ايلي هناك يبدو عليها انها جديدة ...(المركز مفتوح من حوالي 3 شهور بس)..والناس تم تدريبهم في تويوتا ايجيبت علي ما قيل لي...

المهم العربية اترفعت واتعلقت ...وقاموا بكل شيء بما فيها تشحيم الابواب والشنطة وظبط الاطارات وتربيط العفشة وخلافة...

بعد حوالي ساعه ونص بالظبط....قالولي تعالي استلم العربية...
خرجت لاقيت العربية واقفة في موقف انتظار السيارات برة...ومغسولة وكلة تمام...افتكرت ان في واحد صاحبي كان بيعمل صيانة في العباسية...وقالي ان الموتور بيتغسل بالفوم مش بالمية....

قلت ابص بصة علي الموتور....المشكلة اني موسوس....
قمت فاتح الكبوت....اوبببببببببببة..... لدنيا غرقانة مية...هي مش غرقانة قوي برضة...بس في مية كتير...
قمت رايح لمهندس الاستقبال....اية يا باشمهندس دة ...انتوا بتغسلوا الموتور والكهرباء بالمية...مش المفروض انة بالفوم....(انا الحق اسمع عن الفوم دة بس عمري ما شفتوش بصراحة ...)
قالي طبعا ....بس بنشيل الفوم بالمية ...والا هايجير...ويعمل بودرة علي البلوك بتاع الموتور...
قلتلة بس مش بالمنظر دة ...دة المية في كل مكان....
قالي ما تخافش احنا المسؤلين عن اي شيء يحصل للعربية....وبعدين قام منادي علي واحد قالة نشف المية دي بسرعه...

الوقتي انا مش عارف هل فعلا غسيل الفوم لازم يزال بمية ....ولا بيتمسح ازاي...ولو الفوم جة علي اماكن صعب الوصول ليها ....بيزال ازاي...!؟

ٌٌ