الموضوع: النهاردة عملت موقفين مع الناس الاتنيين فى منتهى الغرابة ..أنا فى قمة الحزن والنكد بجد

النهاردة ياجماعة

الموقف الأول:

نازل من البيت وقلت لازم ابقى ايجابى دة مصرنا

وانا ماشى بالعربية كنت بحييى الشباب اللى بيظبطوا و يكنسوا الشارع وسلمت على كام ضابط مرور معرفهمش وردوا التحية بكل ادب و مودة وكنت مبسوط جدا

رحت اول مشوار.... كنت رايح البنك الاهلى المصرى ادفع الفيزا بكرة 25 ميعاد الدفع واجازة

الساعة كانت 1 وربع و متعلق ورقة مكتوب مواعيد العمل من 8ونص ل 2

ركنت العربية ورايح على الباب لقيت زحمة والباب مقفول .... ناس كبيرة بتاع 50 سنة كلهم واقفين ساكتين فى اية ياجماعة ...الرد البنك قافل الباب وبيدخلوا 25 فى كل مرة وبقالهم بتاع 45 دقيقة قافلين

استعجبت جدا للسلبية

سألت دة قرار نزل يعنى ولا بمذاجهم ... قاللوا لأ بمذاجهم

طبعا عديت من الصفوف وخبط على الباب فتح الأمن ... بقولة انت قافل الباب لية يرد يقول البنك زحمة

قلتلة يعنى انت رامى الناس برة فى الشمس عشان البنك زحمة راح قايل تعليمات !!

قلتلة التعليمات دى ماتنشرتش لية مش معلق ورقى برة لية دلوقتى البنك بيقفل الساعة 2 يبقى الباب يتفتح ..قعد يزقنى من كتفى وعايز يقفل الباب برضة صوتى عالى طبعا واتنرفزت وذعقت والامن اتلم ونزل ايدك راح بيزقنى برة قمت زقة وحصلت خناقة والناس قامت اخيرا طلعوا من صمتهم وساندونى وذعقوا فيهم حرام عليكم وحاشوا عنى وانا بذعق امال الثورة قامت لية عشان الهبل والتخلف دة يخلص وتحترموا الناس دول عملاء عندكم مش حرامية
الناس الكبيرة اللى برة فرحوا قوى وقعدوا يقولولى الله يباركلك ويبارك فيكم انت الشباب انتم المستقبل وأضطر المن تحت ضغط الناس يفتح الباب

طبعا

البنك كان فى 3 !!

الامن ومدير الامن ومدير البنك نزلوا يتأسفوا ليا واحنا اسفين وحقك عليا وقال للموظفين خلصولوا حاجتة اول واحد

طبعا انا رديت بصوت عالى ... لأ وانا حقف فى الدور بتاعى ومش حاخد حق حد

الناس فرحت وصقفتلى وهم اللى صمموا انى اخلص انا الاول ومحدش رضى يروح للشباك

ولحد ماخلصت والناس الكبيرة على لسانهم كلمة واحدة

ربنا يبارك فيكم ربنا يبارك فيكم :))


دة الموقف الأول الجميل اللى لازم نبقى كلنا ايجابيين

الموقف التانى المحزن


راجع بالعربية فى منطقى المنشية بأسكندرية

واذا بميكروباص جى عكسى ومش هامة حاجة

عكسى فى شارع رئيسى وكان حيلبس فيا

المهم على اول الشارع ملازم اول وقفة وانا وقفت

الملازم بمنتهى الادب بقولوة ... انت جى عكسى وكدة مخالف ولو سمحت اعدل العربية وامشى فى اتجاة الشارع الصح

تخيلوا الرد كان اية ؟؟؟

السواق : بمنتهى القذارة انا ماشى بكيفى و بمذاجى والمرة الجاية لو لقيتك واقف حاخدك تحت العربية ونزل هو التباع

انا لسة حفتح بقى لقيت الصيع اتلموا والضابط للأسف راح الموتوسيكل وراح ماشى

حسبى الله ونعم الوكيل

انا بجد فى منتهى الحزن

حسبى الله ونعم الوكيل