لماذا تريد اقالة وزير الداخلية

**mrwho1982** · 25-02-2011 10:05 AM

2-الشرطه لم تتعمد اطلاق النار على المتظاهرين وقد يكونوا اطلقوا النار في حالة الدفاع عن النفس فقط
3-القناصه اللي كانوا موجودين في ميدان عبد المنعم رياض فوق العمارات يوم الأربعاء أجانب
ويتحدثون بلهجه غير مصريه!!!!

معلش هتكلم في النقطتين دول
اولا يعني هو ماكنش يقصد يضرب النار عالمواطنين يعني كان بيضرب نار في الهواء والناس كانت بتتظاهر في الهواء فاخدت طلقة

ابقي عبيط لو صدقتة لان الحداية مابتحتفش كتاكيت وديل ال ........ عمرو مايتعدل

ثانيا : القناصة اللي كانو موجودين بيقول ان هم بيتكلمو لغة اجنبية طيب بيتكلمو ايه ( عبري - انجليزي - الماني - فرنساوي )
هو البعيد اهبل
كل الناس عارفة ان القناصة امن مركزي وامن دولة ودول كلاب النظام

مافيش فايدة لازم ده يتشال ويتجاب حد من الجيش يطلع عين ابوهم

لاااااااااااااازم
الراجل ده لوقعد هيخربها لان شكلو مش سهل
اكبر دليل مدير الامن بتاع البحيرة وادي عينة وزير الداخلية
مدير امن شبحطجي

وزير الداخلية التركي أستاذ في علم الاجتماع !!! ووزير الداخلية المصري الحالي رئيس مصلحة سجون سابق

وعجبي

**nour_nrc** · 25-02-2011 10:19 AM

انتي كده جبتي الزتونة

**enas75** · 25-02-2011 10:36 AM

طب ياجماعه بدل ما كل واحد عمال يفرد رايه نشيل مين ....وكل ما حيجيبو واحد حنقعد نفصص فيه ونقول لا ده تبع النظام
ما كل واحد يقول علي اسم حد نعينه وزير داخليه....علي الاقل نمارس حقنا في الديوقراطيه الصح
نرشح اسامي لهذا الجهاز الخربان تماما........بس لازم ناخد بالنا من حاجه اي حد حييجي دلوقتي حيبقي تربيه نظام مبارك(30 سنه)
..............................
محمود وجدي كان من الاشخاص المعروفه بشدتها وقوتها وتطبيقها للقانون ( رئيس مباحث القاهره)...ووقف كتيير لحبيب العادلي
فما كان من العادلي الا انه رقاه ونفاه وعينه مدير امن المنيا ....الناس هناك حبته جدا لانه كان محافظ علي الامن كويس جدا ....ده معجبش العادلي ...قام حوله مدير مصلحه السجون
برده اتقن عمله جدا ومحصلش انه عذب حد ...بل بالعكس كان بيتاعامل مع الناس بالاحترام والشده
وبعدين احاله العادلي للمعاش...علشان كان من الرجال المحترمين
.................
حسني لما جابه لانه عارف انه نضيف اليد وظابط محترم ...وافتكر بكده انه حيكسب الثوار
الكلام ده انا جبته لما سالت ناس موثوق في نزاهتهم عن هذا الرجل .....وقالولي لو حد حينضف الزباله اللي اسمها الداخليه يبقي محمود وجدي
بالنسبه للحوار ماهو ده كلام كل الظباط اللي كانو في الميدان ساعتها وفي التحقيقات اللي شغاله ..يتقدمو اثباتات علي ان كلامهم غلط ...وان القناصه عناصر شرطه.......لو قدمتم بلاغ للنائب العام حد يقدر يثبت ان قناصه يوم الاربعاء شرطه..
مش بكدبكو بس للاسف محدش انكر ان في قناصه لكن محدش قدر يثبتلهم انهم شرطه
لكن لازم تراعو ان الراجل تحت ايده فساد ليس له حصر وعلشان ينضف الداخليه قدامه كتيييير
اه الظباط اللي رجعهم كانو كلهم ضد العادلي واستقالو او اترفدو اداريا
....................................
رجاء من الاعضاء اللي يعمل موضوع دلوقتي يتحري الدقه وصحه معلوماته ومصدرها مش اي كلام وخلاص
بقايا النظام بتستغل كره الناس للشرطه وبتسخنهم عليهم بحوادث فرديه بس كتيره علشان تفضل البلد متوتره
ياجماعه للاسف احنا محتاجيين الجهاز الامني الوضع في بعض مناطق مصر زي الزفت امنيا
لازم ندي فرصه .....اللي يراعي ربنا منهم ماشي والي يقل ادبه منسكتلوش بس بالقانون والا حتبقي غابه وكل واحد فينا يمشي بسلاح
ادو الداخليه فرصه .....لاحظو الراجل حيجيب ناس منين
وانسو الجيش مش من مهمته يسلفك رجالته عندك....دي مش شغلته شغلته حمايه البلد خارجيا
ولا ساعتها حيطلعلنا حد يقولنا ايه ده الجيش حيحكمنا

**Xander2010_Evo** · 25-02-2011 11:04 AM

المشاركة الأصلية كتبت بواسطة baskota

لماذا تريد اقالة وزير الداخلية

دى اسبابى ياريت كل من يوافقنى الرأى يقولنا اسبابه

محمود وجدى
محمود وجدى تسلم الوزارة يوم الثلاثاء فكانت موقعة الجمل فجر الاربعاء بعد توليه منصبه بساعات

من رأيي ده مش مبرر وفكس صراحة وكل الناس عرفت إن الناس دي كانوا متأجرين من الحزب الوطني
الإعضاء إللي فيه بعد ما خلاص حسوا إنهم خلاص هايفقدوا الكرسي بتاعهم فالمجلس
وبفرض وزير مسك وزارة خلاص
هل هيعرف يحكم البلد 50% حتي في ظرف يوم واحد؟؟
ده زييه زينا يعني مش سوبر مان

محمود وجدى لم يقيل رئيس قطاع الامن المركزى الذى اعطى الاوامر للامن المركزى بالضرب وقتل المتظاهرين

تمااااام في دي عند حضرتك حق كان لازم يتشال

واكتفى بمحاسبة الظباط الذين لم يتخلوا عن مواقعهم ولا عن اقسامهم عقابلا لهم عن مخالفة اوامر الفاسد السابق ليكونوا عبرة لمن يفكر فى مخالفته الامر

أنا ماسمعتش عن دي صراحة
هوا ولا عاقب إللي مشي ولا إللي قعد وعمل فيها عنتر

محمود وجدى مع علمه ويقينه بفساد مدراء الامن بدل من اقالتهم بدل مواقعهم ده مالوش معنى غير انه فاسد ومش هيتخلى عن رؤوس الفساد مساعديه

مش شرط التلميذ يطلع زي معلمه...ليه مايكونش أحسن منه؟؟ بالعكس أنا مش بدافع عنه بالطريقة دي
لكن ده رأيي
وحكاية تبديل مدراء الأمن دي حاجة ضرورية إنها تتم علشان الناس تهدأ
ومفيش وقت أصلآ علشان يدور مين الكويس ومين الوحش
هوا تقريبآ معتمد علي إن الناس هيا إللي تقدم بلاغات

محمود وجدى اعاد الكثير من الظباط لمناصبهم ممن تم اقالتهم مسبقا لتورطهم فى جرائم اخلاقية ومخدرات وغيرها

زي؟؟؟؟

محمود وجدى صاحب تاريخ ملوث بتعذيب المعتقلين السياسين وغيرهم من المساجين

مثاااااااال؟؟

والتابع الامين لزكريا عزمى

إيه العلاقة بينهم؟؟؟

هل تستقيم الداخلية ويستقر الامن فى الدولة ويعاد الاحترام للشعب والثقة بين الشرطة والشعب فى ظل قيادة مثل هذا الرجل

نريد وزيرا للداخلية من خارج الجهاز الفاسد اون كان منهم فليبحثوا عن احد القلة المحترمين

طيب ماهوا لازم وزير الداخلية يبقي لواء مثلآ القانون المصري بيقول كده
والناس هاتقول إشمعني تركيا الوزير بتاعها كان حاجة كده إجتماعية تقريبآ
وبفرض إن الوزير إتشال مثلآ هوا وأحمد شفيق إنهاردة
هايجيبوا مين يمسك وزير داخلية؟؟؟
مش لواء بردو؟؟ ومن نفس الجهاااز ده بردو؟؟؟؟ ونفس الكلام هايطلع تاني؟؟؟
وفين القلة المحترمين؟؟؟ زي مين مثلآ؟؟؟
من رأيي الشخصي "ودي من مزايا الديمقراطية "حرية الرأي" "
الوزير محمود وجدي هوا والفريق أحمد شفيق بردو الرجال المناسبين بس فالوقت الغير مناسب خااااالص
وحكاية الأجانب إللي فوق السطح بتوع المولوتوف دوول
كذا واحد شافوهم ع الجزيرة وأووه تي في. الراجل تحت إيده بلااااوي بس مش قادر يتكلم قبل ما يتأكد.
وإتصلوا بالناس إللي كانوا ساكنيين فالعمارة أصلآ وأكدوا الكلام ده
وبعدين الناس فاكرين التحقيقات هاتخلص بالحكم بين يوم وليلة ولا في ظرف إسبوع؟؟
الناس إللي شافت وزير الداخلية في حلقة مصر إنهاردة
الوزير مرضيش يجاوب علي كذا سؤال ليه؟؟ لأنه ببساطة من وجهة نظري لسه مش عارف الحقيقة فين
التحقيقات لسه شغالة وكل يوم بنسمع عن تحفظ أموال ناس جديدة وناس بيتقبض عليها
وبفرض الوزير إتشال هوا ورئيس مجلس الوزراء
الناس إللي تحتيهم لسه قاعدين زي ماهما وهما دوول رؤؤس الفساد أصلآ
دوول إللي لازم يتشالوا
والموضوع مش بالبساطة دي إن قائد القوات المسلحة هايقول للناس دي خلاص كده أمن الدولة يروحوا بيتهم
معلش ده رأيي وأنا عارف ناس كتير هاتعارضني
بس أنا حر في رأيي....دي ديمقراطية.
وآسف للإطالة.