الموضوع: فيديو لام ضابط المعادي وهي تصرخ عليه ..دعوه لمناقشة اوضاعنا

[youtube]http://www.youtube.com/watch?v=hQpXlZG2M50[/youtube]

ده فيديو لأم الضابط بتاع المعادي وهي بتصرخ عليه ..فيديو محزن جدا ..بس ياترى مين السبب في اللي حصل ..وهل هناك مبرر ان ضابط يرفع سلاحه في وجه مواطن ويضربه بالنار ..

حتى ولو كان المواطن ده بلطجي وسوابق ؟؟

ياترى ايه شعور ام السائق وهو في غرفة العمليات ؟؟

ليه الضابط بيستهين بحياة المواطنين ؟؟ وليه اسهل حاجه عنده انه يطلع سلاحه ويضرب بيه ..علشنا يحل اي خلاف ؟؟

وليه احنا بقينا عاملين زي الحيوانات في الغابه ..نتلم بالعشرات على واحد ونحاول نموته ..حتى ولو كان ضابط مجرم
زي مابيكون مابنصدق حاجه تحصل وندي لنفسنا مبررات ونبقى همجيين ؟؟ زي اللي كان بيحصل في بعض اللجان الشعبيه لما كانوا بيقبضوا على مجرم ويشرحوه واحيانا يموتوه..بحجة انه مجرم

للاسف مرض الساديه بقى منتشر جدا فينا ..من اول الضابط اللي بيعذب في القسم ..للناس اللي بتتلم على حد غلط ويقطعهوه ..للميكانيكي اللي بيعذب الصبي بتاعه.. للمدرس اللي بيضرب الطلبه في الفصول وبيقطع ايديهم ..للراجل اللي بيضرب مراته على اي سبب ..او الاخ اللي بيضرب اخته بحجة تاديبها ....والمثالين الاخيرين منتشرين جدا في الاحياء الشعبيه.............الخ

لازم نعالج انفسنا كشعب ..ومنرميش التهم كلها على الضباط ..لان الضباط مننا ونسبه منهم اهلهم ناس عاديين مش ضباط ..يعني اللي رباهم راجل وست عاديين ..
ومع ان سلك الشرطه في مصر معروف بفساده

ومعظم الناس بتكرهم وفي نفس الوقت بيتمنوا ان اولادهم يدخلو شرطه او يناسبو حد من الشرطه ..علشان يتمتعو بجزء من نفوذ الضباط... وعدد المتقدمين لكلية الشرطه بيعدي ال20 الف متقدم ..

يبقى العيب فينا احنا ان كل واحد بيتمنى انه يبقى ليه سلطه ونفوذ وانه يبقى اعلى من الاخرين
يعني مرض الساديه منتشر فينا كشعب ..مش شرطه بس ..

المشاركة الأصلية كتبت بواسطة mohamedbook

انا مش عارف معدمهوش ليه في ميدان الجزائر
اولا القاتل يقتل وهو خرج سلحة مش هذار
القصاص
يقول الله تعالي ( ومن يقتل مؤمنا متعمدا فجزاؤه جهنم خالدا فيها وغضب الله عليه ولعنه وأعد له عذابا عظيما

هل حضرتك عرفت الحقائق كلها ؟؟؟ وحتى لو كان مجرما ..هل ديننا يأمرنا بقتله دون محاكمته ؟؟ هي ده قانون ربنا ولا قانون الغابه ؟؟ وهل الايه اللي حضرتك حاططها بتقول اننا كأهالي نعاقبه ونموته ؟؟ اظن ان تفسيرها بعيد عن كده تماما ..واشمعنى زعلنا من الاهالي في لبنان لما علقو المواطن المصري في وسط ميدان بعد لما عذبوه وقتلوه؟؟؟ طيب مش ده كانوا بيقولوا عليه مجرم برضه ؟؟ ..طالما فيه سلطه قضائيه في البلد ..وجهه حاكمه يبقى هما اللي يحكمو ..مش احنا

المشاركة الأصلية كتبت بواسطة nfs

لا طبعاً يا ريت تفرق, الضرب الى كان فى اللجان الشعبية انا شايف انه مفيش اى غلط فيه, لما واحد يسرق و يبلطج و يرعب الناس فى وقت زى الى كنا فيه يستاهل اكتر من كده كمان.

وهل حضرتك شفت كل اللجان الشعبيه اللي في البلد ؟؟؟ وهل انا اقصد كل اللجان الشعبيه اللي في البلد ؟؟ وهل حضرتك تضمن ان كل اللي اتمسكو حراميه بجد ولا فيه نسبه منهم مظلومين؟؟
وهل دينا الاسلامي الحنيف بيقول اننا نشرح ونقتله او نعذبه ؟؟

انا شخصيا هحكيلك موقفين اخواتي كانوا شاهدين عليه ..في المريوطيه في الهرم ...اولهم واد عنده 17 سنه سواق تك تك كان ماشي يوم سبت الرعب ..ومكانش معاه حاجه والواد كان بيعدي على 5 -6 لجان في الشارع واخر مازهق حب يخرم في شارع جانبي والناس شافوه وطلعو يجرو وراه وبيندهو حرامي حرامي ..وطبعا مسكوه وطحنوه ضرب وشوهوه وجه واحد جارنا شاب متعلم زينا ومن غير لما يسأل او يستفسر راح ضاربه بالشومه على رجله وكسرهم ..
ده غير شاب من شباب اللجنه دلق عليه بنزين ومسك الكبريت ومستعد انه يولع فيه زعمالي يسألهم ..اولع دلوقت ..اولع دلوقت

ولما اخواتي شافو المنظر جريو هما وكام واحد من المنطقه ..وخلصوه من بين ايديهم ودخلوه مدخل العماره وقفلو عليه لحد ما جابو اهله علشان ياخدوه ..والولد طلع ممعهوش حاجه ..وحتى لو كان معاه ..هل كان يستحق الحرق بالنار ؟؟؟

وتاني حكايه ..برضه في نفس المنطقه في شارع اسمه العمده ..عربيه نوبيرا سايقها ضابط في الجيش ومعاه العسكري بتاعه ..وخبطو ولد صغير كان بيلعب في الشارع ..الضابط نزل علشان يشوفه هو والعسكري بتاعه لقى الاهالي بتهجم عليه بالسيوف والسكاكين حاول يهرب لكن واتضرب هوا والعسكري بتاعه واتقطعو

وفي بنها صاحب صاحبي ..شاف اتنين بيضربوا في بعض افتكر واحد فيهم حرامي ونزل بالشومه على راسه ...وفي الاخر طلعو اتنين اصحاب وبيتخانقو مع بعض !!!!

هل قانون الغابه اللي بنطبقه ..يضمن ان البني ادم ده مجرم بنسبة 100 %
وهل لو مجرم يبقى حلال اننا نعمل فيه مالا يرضاه ديننا الحنيف ؟؟

طالما كان فيه سلطه حاكمه وهي الجيش ..يبقى احنا مهمتنا الوحيده هي القبض على المشتبه فيهم وتسليمهم ..وليس الحكم عليهم