السلام عليكم
حد يعرف يا جماعة منين أقدر اطلع رخصة دولية في اسكندرية ؟ وإيه الورق المطلوب والاجراءات وباستلمها بعد قد إيه ؟
شكرا
عرض للطباعة
السلام عليكم
حد يعرف يا جماعة منين أقدر اطلع رخصة دولية في اسكندرية ؟ وإيه الورق المطلوب والاجراءات وباستلمها بعد قد إيه ؟
شكرا
نادى السيارات اللى فى ميامى على البحر والاوراق بتكون مكتوبه على جدار النادى بره وهى اوراق سهله جدا والاجراءات سلسه ومفييش مشاكل خالص بس روح ميامى على البحر واسائل على نادى السيارات
طب ممكن طلب بسيط
ممكن لو أي حد صاحب الموضوع مثلآ أو أي حد طلع الرخصة دي يقوللنا الخطوات والإجراءات هنا
علشان كلنا نستفيد
وشكرآآ
السلام عليكم و رحمة الله و بركاته
أنا كنت طلعتها من حوالى 7 شهور, بس كانت من القاهرة , مش من اسكندرية و يومها , كانوا مشترطين فى نادى السيارات اللى فى وسط البلد فى القاهرة, أنى لازم أجيب, براءة ذمة من الادارة العامة للمرور اللى فى مدينة نصر جمب مسجد رابعة العدوية .
أنا مش عارف, اذا كان فيه مكان فى الاسكندرية, ممكن ييجى منه براءة الذمة دى و لا لأ, على أساس أنه هيوفر مشوار الى مدينة نصر - القاهرة.
السلام عليكم
طبت تكلفة الرخصه كام ؟
وما هى احتياجتها؟
انا كنت طلعتها من زمان فى اسكندرية
من نادى السيارات الى شارع صلاح سالم
واحتاجو ورقة فعلا بتطلع من مكتب مرور جنب جامع تقريبا اسمه ابو الدردار ناحية محطة مصر والمنشية كده
والحوار كله بيخلص فى نفس اليوم
السلام عليكم و رحمة الله و بركاته
هى كانت كلفتنى حوالى 40 جنيه تقريبا و كانوا محتاجين معاها:
صورة من اثبات الشخصية, جواز السفر أو الرقم القومى و لو أنهم بيفضلوا جواز السفر السارى و الغير منتهى.
صورة من رخصة القيادة المصرية السارية و أهم حاجة أنها تكون سارية.
براءة الذمة و دى اللى أنا كنت طلعتها من الادارة العامة للمرور اللى فى مدينة نصر-القاهرة بجوار مسجد رابعة العدوية.
4 صور شخصية حديثة.
طلب بيتملى و ده موجود عندهم و هما هيديهولك تملاه و أنت هناك.
ده كل اللى هتحتاجه, أنا مش فاكر حاجة تانية, لو كان فيه أى حاجة تانية أنا ناسيها, ممكن حد من الأخوة الأفاضل يقولنا عليها.
السلام عليكم
مشكورين على الردود يا شباب ; أنا خلاص رحت انهاردة طلعت الرخصة الدولية وكان المشوار عموما سهل الحمد لله
المطلوب كالاتي من ادارة المرور اولا :
* شهادة تحري عن الرخصة ; بتطلع من مرور ابيس
* بتحتاج صورة الرقم القومي وصورة رخصة القيادة بـشرط انها تكون سارية لمدة سنة على الاقل
* بتملى طلب بسيط اوي في مكتب ادارة المعلومات في المبنى بتاع التراخيص الخاصة
* بتاخد الطلب تختمو من ظابط في المرور وخلاص على كده
* مفيش فلوس بتدفعها في المرور ; تصوير الورق بس
بعد كده اخدت الطلب ده ورحت نادي السيارات في ميامي على البحر ; بيحتاجوا الآتي :
* الرقم القومي أصل وصورة واحدة
* الرخصة أصل وصورة واحدة
* جواز السفر أصل وصورة واحدة
* الطلب بتاع المرور
* 2 صورة شخصية
* مصاريف 43 جنيه
المكتب بتاع نادي السيارات سريع جدا بصراحة واخدتها وأنا قاعد على المكتب قدام الموظف ; وناس مؤدبة بصراحة مش زي المرور اللي واضح إن عمره ما حيتغير للأسف
مشكورين مرة تانية
السلام عليكم و رحمة الله و بركاته
أنا كنت عاوز أنبهك لحاجة:
فيه على ظهر الرخصة, حته كده, المفروض يتكتب فيها رقم الرخصة المصرية بتاعتك و تاريخ اصدارها و تاريخ انتهائها بالانجليزى طبعا, هو الموظف كتبهالك و لا لأ, المفروض يكتبها بالانجليزى و يختم, لأنك لو دورت فى كووووووووووووووووووول الصفح بتاع الرخصة الدولية, مش هتلاقى مكان يكتب فيه البيانات دى الا فى المكان ده و ده اللى بيثبت أن الرخصة الدولية دى طالعة بناء على رخصتك المصرية, اللى كل البيانات مكتوبة فيها بالعربى, مش بالانجليزى, يعنى لو سافرت دولة أوروبية و لا حاجة, هيبقوا محتاجين يعرفوا أن الرخصة دى صدرت بناء على أنك معاك رخصة مصرية سارية اللى هى رقمها ..... و تاريخ اصدارها....... و انتهائها..... اللى المفروض تتكتب بالانجليزى على ظهر الرخصة الدولية .
ألف مبروك و بالتوفيق يا باشا .