قلق!!!

**waelfarid** · 25-02-2011 06:51 PM

هو الشرطة بتشتغل 8ساعات بس في اليوم وما زاد عن ذلك overtimeولا ايه
حد يعرف
وهل هما نازلين علي قديمه لسة محصلهمش format للمنهج بتاع حماية الاسرة الحاكمة ومصالحها
ولا فيه كام bad sector عندهم
الهارد اللي عندهم mechanical ولا غيرو وبقو solid stateههههههه
حصل اي تغيير ولا جايين -بعضهم- يسترجع الهيبة بالعافية للي مش عارفين يفرقو بين التعامل باحترام عن التعامل بخوف
بندعي ان ربنا يهديهم لاننا محتاجين لهم وهما محتاجين لنا ونتفاءل خير ان شاء الله

**osoliman88** · 25-02-2011 07:55 PM

على فكرة انا عندي مخاوف أكتر من اللى حضرتك قولتها ... وبحاول أعمل زي النعامة وأدفن رأسي في الرمال ... لأن البديل أنا خايف جدا. ويكفي أن أقول منذ تنحي مبارك وأنا أشعر بالخوف الشديد من سماع الأخبار لدرجة أني توقفت بدرجة كبيرة عن مشاهدة القنوات المصرية وقنوات الأخبار ... لأنني فعلا أشعر بخوف بل برعب شديد، أدعو الله أن تنجو مصر وننجو معها .... اللهم سلم مصر اللهم سلم شباب مصر اللهم سلم شعبها

**wawoo** · 25-02-2011 08:38 PM

المشاركة الأصلية كتبت بواسطة a7med_pharma

ثامنا:-
وجود بعض وزراء العهد القديم

تاسعا:-
فين الشباب الي في المعتقلات لحد دلوقتي ..وماحدش ليه بيجيب سيرة المعتقلين السياسين

ده كله جايبلي حموضة في بطني ..
ومش مستريحش

الحقيقية اسباب منطقية جدا للقلق و هناك اسباب اخرى كمان ..

من كلام بعض اعضاء المجلس العسكر فى العاشرة مساء ..انا شخصا اطمنت الى حد ما بخصوص بعض الامور
طبعا هناك ضغط كبير على المجلس فى المرحلة دى و صعب نحدد لان هو المجلس ناوى على اية بالضبط

انما تاكد ان مع الوقت حتبان مواقف الجميع بالضبط و فى الحالة دى لازم يكون فى وعى كافى بالمطالب الاساسية للثورة الى لو لم تتحقق يبقى التظاهر مستمر الى ان تتحقق

المجلس العسكرى نفسة اكد ان فى اعداء للثورة و دة طبيعى و الكل يتفق معاة ..انما السؤال ماذا سيفعل الاعداء الان بعد ما حدث اكيد تحركاتهم معظمها حتكون مستخبية و الخطورة الحقيقية فى ما يحكى من مؤمرات قد تكون الان محل تخطيط من جانب المنتفعين او المستفدين من النظام السابق باى شكل كان

هى مرحلة حرجة و ولادة متعسرة و فترة نقاهة صعبة كما وصفها ابراهيم عيسى و القلق و تواخى الحذر مطلوب انما على الجانب الاخر اعتقد انة حان الوقت انة يكون فى توعية شعبية للمرحلة السياسية الجديدة عشان يكون فى استجابة قوية فى حالة وجود انتخابات او استفتائات على دستور او غيرة

انا عموما متفائل برغم صعوبة المرحلة دى و اعتقد اننا حنخرج منها قريبا ...القلق الوحيد يكمن فى حالة تحرك المجلس العسكرى فى اتجاة لا يعكس الطلبات الشعبية لجموع الشعب المصرى

**mazagngi2010** · 25-02-2011 08:49 PM

المشاركة الأصلية كتبت بواسطة mertahgedan

كله جاي بالصبر . الجيش دلوقتي معانا مش ممكن يدي فرصة لمبارك وأدواته بالعودة مرة آخري .المطلوب دلوقتي اننا نكون في ظهر الجيش نساند الجيش الضغط الجماهيري يعطي للجيش قوة في موقفه . المهم منع المظاهرات الفئوية

احنا لسه هنقف ورا الجيش اكتر من كده
امال اللى فات بيننا وبينه كان ايه
اللى هيدى قوه للجيش دلوقتى هو قراراته الحاسمه الصحيحه مش اللكاعه والتنفيض لمطالب الناس

**م.احمد زكريا** · 26-02-2011 09:27 AM

المشاركة الأصلية كتبت بواسطة a7med_pharma

السلام عليكم

شوية حاجات كده متجمعة على بعض .. حاسس إنها بتقلقني
أولا:-
مبارك مامشيش من البلد .. وفضل قاعد في شرم الشيخ
وإحنا هنطرده ليه مادام تم الحجز على امواله وده يعني ان في تحقيقات غير معلنة حتى الان وهايتم محاكمته هو وعائلته لو ثبت عليه حاجة .... الافضل يفضل في مصر

ثانيا:-
الحاكم العسكري دلوقتي ..طنطاوي
كان معروف عنه دايما إنه (الراجل) بتاع مبارك .

في مواقف محدش بيبقى راجل حد وبيكون نفسه لان الحدث اكبر منه ومن مبارك (عايزين شوية ثقة)

ثالثا:-
ومع الاحترام للمجلس العسكري

ماشوفناش خطوات قوية(قـــــــــوية) ضد رموز الفساد الحقيقية..والرؤس الكبيرة
يعني ماشوفناش محاكمات أو إتهامات على الأقل ضد أشخاص بعينهم بخصوص مئات الشهداء

يا دكتور الثورة بقالها شهر (العربية بتعمل الحادثة في ثواني وبتتشد وتتصلح في شهرين)
يعني انت عايز احكام عشوائية وخلاص بالراحة يا اخوانا والحق مش هايضيع ان شاء الله

رابعا:-
إستمرار التشويش على الجزيرة ...وبدأ التشويش على العربية على قمر النايل سات

دي اكيد ليبيا (الحاج معمر عامل شغل عالي)

خامسا:-
الشرطة لسه مارجعتش تقريبا .. وإستمرار حالة إنعدام الأمـــــــــن في مصر

ده طبيعي اصحابي ضباط .... الناس بتستفذهم وتشتمهم في الشارع ... وبعديم ما تقارينش وضع الشرطة بالجيش سنة 67 انهم رجعوا الجبهة بعد 4 ايام ... الجيش في الوحدات او على الجبهة بيكونوا مع قوادهم بيحمسوهم ويشجعوهم لكن الشرطة في الشارع في وش الشعب ليل ونهار ومش كل الشعب محترم وبيقدر ظروف الشرطة او نفسيتهم بالذات في الوقت الحالي

سابعا:-
الحالة النفشية المرتفعة للأربعة الكبار لما كانوا رايحين السجن
يعني وكأنهم رايحين ..وهما عارفين إنهم خارجين خارجين
وكان الأجدر بيهم لو خايفين من مصيرهم الإسود..كانوا هربوا بره
لكن ماهربوش ..وفضلوا قاعدين عادي جدا .
وراحوا السجن عادي جدا ..وكأنهم رايحين رحلة كام يوم وراجعين تاني

مش عايز احبطك ..... المليارات الناس بتحلم بيها لو رجع عشرها يبقى الثورة نجحت

ثامنا:-
وجود بعض وزراء العهد القديم

الوزارة مؤقتة اخرها 6 شهور ؟؟؟؟؟؟؟

في دولة جديدة بعد 6 شهور

تاسعا:-
فين الشباب الي في المعتقلات لحد دلوقتي ..وماحدش ليه بيجيب سيرة المعتقلين السياسين

ده كله جايبلي حموضة في بطني ..
ومش مستريحش

أمال العدد التم الإفراج عنه والداخلية اعلنت عنه ده مين؟؟؟؟؟

شوف يا ابو حميد أنا مقدر انفعالك ومخاوفك بس صعب نطلب كل حاجة وننفذ كل حاجة في وقت واحد

وارجع اقولك مثال العربية العاملة حادثة تاني ( المثال ده عشان احنا في منتدى عربيات بس)
روق يادكتور كلنا متوترين خلقة