الموضوع: الله يخرب بيت كده

المشاركة الأصلية كتبت بواسطة aminibrahim

الله يخربيت الي بيتعدوا علي ارض الدوله

ويخرب بيت الي يعمل مظاهره فئويه

ويحرب بيت الجهل

وبتوع الميكروباص والي مش عايز يحترم القانون

شوهوا الثوره انا كرهت نفسي وكرهت الحريه والديمقراطيه

انا اعتقد انه مستحيل نبقي زي بلاد بره

يا جماعه دا كل حد ما يتكلم مع حد يقولو ان كان عاجبك وضرب وختاقات

أنا برده بدأت أقتنع ان مفيش فايدة و كل يوم اللي أشوفه و أسمعه يأكدلي ان البلد هاتفضل في النازل

من ساعة ما شفت بتوع المظاهرات الفئوية الي مش بينزلوا يوم الجمعة ولا بعد الشغل و مصريين يعطلوا مصالح الناس
من ساعة ما شفت بعيني ظابط بيوقف ميكروباص ماشي عكسي راح السواق شتمه و الناش في الشارع جريت ورا الظابط لحد ما هرب منهم
من ساعة ما شفت ناس بتطالب برد عنيف علي الجيش عشان أخلي الميدان امبارح بالقوة الساعة 1 بعد نص الليل

من ساعة ما شفت ناس مجرد ما تبدا الحوار معاهم و يلاقوا وجهة نظرك مختلفة يتم اتهامك بأنك حزب وطني و خائن و اعداء ثورة و في عضو هنا طالب ان الناس دي (اعداء الثورة اللي اكيد حزب وطني متنكريين) ما ينفعش معاهم غير الابادة الجماعية!!!
من ساعة ما شفت شباب كتير مغطي نمر العربية بنمرة 25 يناير و لو كلمته يشتمك! دول شباب راكبين ملاكي مش بتوع ميكروباص!

المشاركة الأصلية كتبت بواسطة misoalex

للاسف دول البلطجيه الى ربوهم الشرطه والفساد وقله التعليم
ويارب البلطجيه دول يتلمو ويتكسر عينهم عشان ده حلهم الوحيد يتكسر عنهم مش يتحبسو

المشكلة مش من البلطجية بس
الي بيبقي راكب ملاكي و مغطي النمر او شايلها ده مش بلطجي
الموظفين و العمال اللي بيعملوا مظاهرات فئوية مش بلطجية
الناس العادية اللي في الشارع الي مستعدة تقتل و تسحل اي ظابط لو سمعت حد بيقول...الحقوني ظابط ضربني
الناس اللي ولعت في كذا عربية بوكس بتاعة الشرطة رغم انهم ضربوا الظابط لحد ما افتكروا انه مات وولعوا في عربيته و رغم كده مش كفايه...ولعوا في عربيات شرطة تانية مالهاش علاقة بالموضوع و كانوا بيوقفوا الناس في الشارع و يشوفوا بطايقهم عشان يمسكوا اي واحد شرطة و أكيد لو مسكوا واحد كانوا اقتلوه...حد يقولي الكلام ده بيحصل فين. سمعنا عنه في انهي دولة في العالم؟ و بعدين تلاقي ناس بتدافع عن الموقف و تقولك اصل الناس تاثرت بمنظر السواق اللي اتقتل قدامهم...و كان ده بقي مبرر للعنف و التخريب و التدمير و الاعتداء علي اي شخص لمجرد الاشتباه...هي دي الصورة السيئة لنا الي بنحاول نتجاهلها و نعمل نفسنا مش شايفينها و نركز علي الجانب المضئ الي هو الثورة و نضحك علي نفسنا و نبرر كل حاجة و نقول العالم فخور بينا و بيتفرج علينا و أوباما قال للامريكين يا ريت تتعلموا من الشباب المصري....بس المفروض اوباما كان يحدد يتعلموا ايه من الشباب المصري...التظاهر السلمي و الاصرار علي المطالبة بالحرية...و لا تغطية نمر العربيات و الاصرار علي الفوضي و سيادة شريع الغاب

المشاركة الأصلية كتبت بواسطة م.احمد زكريا

اسمحولي ... الموضوع ملهوش اي علاقة بالكان بيحصل قبل كدة (مش في كل الاحوال طبعا)

لما عمال وموظفين في شركة محترمة ليها مصنع من احدث المصانع في الشرق الاوسط بمرتبات جيدة وتعتبر الاعلى في نفس المجال يعملوا اعتصام ويوقفوا العمل في المصنع لطلبات ليس لها معنى ( مش هاندفع الضرايب - عايزين ضعف الاوفر تايم - مش عاجبنا الماسك hr - عايزين السبت اجازة - وخد من الكلام ده كتيير)

وشركة تانية من اكبر شركات المقاولات التخصصية في مصر والناس المهندسين المحترمين بيطلبوا طلبات لو اتحققت الشركة هاتقع زي نظام الاجازات في المواقع عايزين اسبوع واسبوع في شركة مقاولات تشتغل بالطريقة دي ؟؟؟



الأنا حاسه ان كله بيهيص في الهيصة

حضرتك ما سمعتش عن اعتصام موظفين البنوك و كان في واحد منهم كل اعتراضه ان مرتبه 8000 جنيه بس و ده ربع مرتب المدير

المشاركة الأصلية كتبت بواسطة م.احمد زكريا

صدقني احنا لسة بدري علينا لما نعرف ازاي نطلب حقوق ونلتزم بواجبات

واجبات؟؟؟؟ حضرتك بتتكلم في ايه...واجبات ايه بس
الموضه دلوقتي مطالبة بحقوق بس...حقي في ال 70 مليار...حقي اني اقطع طريق و اوقف مصالح الناس...حقي ان اطالب بتغيير اي حكومة و اي وزير و مطالبي تتحقق حالا حتي لو الحكومة دي عمرها الافتراضي شهور..حقي اني اضرب اي ظابط عشان انا شايل منهم من زمان و كلهم داخلين شرطة بالواسطة و فاسدين
و حضرتك بتقولي نلتزم بواجبات...واجبات ايه بس....هو حضرتك حزب وطني و اعداء ثورة ولا ايه!