الجيش يستخدم القوة لتفريق المظاهرات فى التحرير !!!

**Mahmoud Saloum** · 26-02-2011 05:24 AM

تم نشر خبر فى مصراوى عن قيام الجيش بتفريق المتظاهرين من التحرير بالقوة و باستخدام العصى الكهربية مما أدى الى حدوث اصابات. والسؤال هل بدأ الجيش يكشر عن أنيابه؟ ولماذا ؟ هل لأنه زهق من طول مدة بقائه فى المدن؟ أم أنه أصبح غير قادر على السيطرة على كم الاحمال الملقاة على عاتقه؟ أم أنه يرى أطراف تحرك الأحداث فى غير مصلحة البلد؟ أم أنه متواطئ مع مبارك والحفنة الفاسدة السابقة؟

**أحمد كمال** · 26-02-2011 05:33 AM

واضح ان شهر العسل بين الجيش و الشعب خلص :(

**yoko** · 26-02-2011 05:46 AM

من كتر الي مطلوب منه خصوصا الطلبات الفئويه
لإن لازم يصلح الأهم فالمهم لكن يبقى هو في الاهم وإنت بتطلب منه حاجات أقل أهميه وبتزن كمان!!!

**heshamzaky** · 26-02-2011 05:48 AM

لأنه شايف أيادى تحرك الأحداث ضد مصلحة الدولة . و بعدين الجيش لا يعرف الياس و لا يتخلى عن مواقعة و لا مسؤلياتة و الناس زودتها و العملية يقت فوضى فى كل حتة و كل مكان دة خراب و دمار للبلد و الناس للاسف لسة بعضهم مش حاسس و لا فاهم و لا فى دماغة و كل فكرة ان الحرية أنة يعمل الى هوة عاوزة و حسب فكرة و منطقة هوة و لا ينظر للصالح العام .
و الجيش عمرة ما يمد ايدة على الانسان المحترم الى بيلتزم بالقانون و لكن لما يكون فية حظر تجول من الساعة 12 مساء الى 6 صباحا و برضو سايبن الناس و مش كاتمين على نفسهم و الناس طماعة و بتستغل كل فرصة لمطلب جديد و معتمدين أن الجيش طيب و سايبهم يبقى يحترمو قراراتة لان لولا نزول الجيش و حمايتة للمواطنين كان زمان الشرطة نهت القصة من بدرى بس لولا تدخل الجيش و تصرفة بحكمة كان بقى فى الامور أمور و لكن الناس بتتجرأ يوم بعد يوم و لكن الجيش برضو متحملهم . أنا لا أعرف من الذى ضرب فيهم لان الروايات مختلفة و الكلام كتير ز بس الجيش لو تعامل مع المدنين لفض اعتصامات بيدى تحذير أول و ثانى و لو ضرب بعد كدة برضو حا يضرب بطريقة ادمية و مش بطريقة همجية

**abdalah_hashem** · 26-02-2011 06:04 AM

لان كدة المظاهرات دية بقت ضد مصلحة البلد
لازم نسيب الناس تشتغل وبعد فترة نشوف عملوا اية من اللى وعدو بية
ولازم الناس تفهم ان مش كل المطالب تنفع تتنفذ وقتى لازم تاخد فترة على مايتم تنفيذها
بعدين الناس بتطلب طلبات بحجج فى نظرى مش مقنعة يعنى غيروا شفيق عشان اللى معينو مبارك طب شفيق مشهودلة بالنزاهة والامانة وراجل خبرة مدنية وعسكرية
طب سؤالى دلوقتى الناس دية عاوزة كفاءة عملية وللا عاوزة كلام معسول تسمعة ؟؟؟

**د.أبونضال** · 26-02-2011 06:29 AM

ولا خيار من هذه الخيارات
الجيش يعني الأمر والطاعة... وقادته لا يفهمون دلع المتظاهرين وإصرارهم على مطالبهم رغم إعلان الجيش تحمل المسئولية عن البلاد. وخطورة هذا الأمر أن يتصور الجيش أن الشعب منحه توقيعا على بياض للتصرف كما يشاء، فتحدث كارثة مارس 1954 ثانية وتعود البلاد إلى الديكتاتورية مرة ثانية.
في رأيي كان الإصرار على الاعتصام من قبل المتظاهرين خطأ ... لقد ذهبت إلى هناك في الصباح وكانت الصورة غاية في الروعة إذ كان الجيش يقوم بما كانت تقوم به لجان النظام من تفتيش وتنظيم للدخول، حتى أنني ولأول مرة أرى جنديات القوات المسلحة في حياتي، إذ كانت هناك جنديتان على كل مدخل ترتديان الملابس المموهة لتفتيش البنات والسيدات، كما أقفل الجيش كل مداخل الميدان استعدادا للمظاهرات، الخطأ من جانب اللجنة المنظمة هو الدعوة للاعتصام مرة ثانية، وهي مبالغة في رأيي، وهي السبب في قيام الجيش بفض الاعتصام خوفا من عودة الشلل إلى اقتصاد البلد ثانية. المظاهرات كل جمعه معقولة ومقبولة أما الاعتصام فلا داعي له.
لذلك أنا أختار أن الجيش قرر فض الاعتصام خوفا من عودة الشلل لاقتصاد البلاد لكنه كان مرحبا بالمظاهرات بدليل ما رأيته في الصباح.

**Ralliart** · 26-02-2011 06:41 AM

الجيش حالياً فتح الميدان وقال اللي عايز يخش يتفضل
اللي حصل محاولة لاثارة الناس ضد الجيش واكيد هيصدر بيان لتوضيح الموضوع

**haroun707** · 26-02-2011 06:53 AM

المشاركة الأصلية كتبت بواسطة moe86

طلبات الشعب كتير قوى علشان دة فساد 30 سنة, و الجيش برضو بطىء فى التنفيذ, أنا بطلت أنزل مظاهرات دلوقتى بس أى حركة نص كم من الجيش بعد كدة هيبقى الرد عليها عنيف

استاذى انا بس عندى تعليق صغير

حضرتك بتقول انه فساد 30 سنه والجيش بطيء وانا مش بخالفك بس لما صبرت 30 سنه مش قادر تصبر كام يوم وبعدين دا ربنا خلق الدنيا فى 6 ايام واكيد ده لحكمه ورساله ودرس عاوز يعلمهولنا وكان قادر يخلقها فى طرفه عين
وححاول اوضحهالك بشكل تانى
لو عند حضرتك طفل طلب منك كم طلبات كثير وحاجات عاوزك تشتريهاله حينفع تجيبهاله مرة واحده ولا واحده واحده

ثانياً عاوز حضرتك تفهمنى وتوضحلى يعنى ايه الرد حيكون عنيف ؟؟؟؟