حقيقة اللى حصل أمبارح فى ميدان التحرير - شاهد عيان ومشاهد من الميدان

**cheetos_892005** · 26-02-2011 09:46 AM

قبل أن أبدأ فى الإجابة على بعض الأسئة التى احتار فيها الكثيرون عن حقيقة ماحدث بالأمس فى ميدان التحرير خلينا نفتكر حديث النبى صلى الله عليه وسلم الذى يقول فيه "كفى بالمرء كذباً أن يحدث بكل ماسمع " أوعى تكون من مروجى الشائعات والأحداث بلا دليل ، البلد فى وضع حساس جدا ولاتتحمل كترت الكلام أرجوك أبوس إيدك أتأكد من كل كلمة قبل متكتب لإن الكملة بتفرق دلوقتى كتير جدا والله
كنت فى الميدان وشايف بعنيه محدش قاللى وتلاقى حد واقف بيحكى فى التليفون لواحد حكاية غير اللى بتحصل قدام عنيه تماماً فما بالك لما توصلك الحكاية وأنت قاعد على الفيس بوك ممكن تكون اتغيرت أد أيه؟
مش هطول عليكم خلينا ندخل على ماحدث فى الميدان مباشرة
هل فعلا قام الجيش بإخلاء الميدان بالقوة ؟
نعم
هل كان استخدام القوة مفرطاً تجاه المعتصمين ؟
لا

ماهى أشكال القوة التى استخدمها الجيش ؟

- القوات الخاصة كانت هيئتهم مخيفه إلى حد كبير وفكوا بعض خيام المعتصمين وقاموا بضرب البعض "ويشتبه وفقاً لبعض المصابين "كلام محتمل ولكن ليس عليه دليل" أن هؤلاء ينتمون للداخلية وليس للقوات المسلحة
- تعدى بالسب من بعض الضباط الصغار "فقط"
- ركض خلف المعتصمين فى صفوف من قبل عساكر الجيش فى الشوارع الجانبيه لإخلاء الميدان
- سقوط بعض المعتصمين من أثار ذلك الركض وضرب بعضهم
- تم احتجاز بعض المعتصمين لدقائق لم يسألوا فيها عن اى شىء ثم انصرفوا
- صواعق كهربائية معظمها كان للتخويف
- أصيب بعض المعتصمين بإصابات معظمها طفيفه جدا

ماذا كان رد فعل "بعض المعتصمين؟
- بعضهم قام برشق الجيش بالحجارة واصيب فرد من افراد الجيش "لاأعرف مدى أصابته"
- قام الكثير من المعتصمين باعتراض من يريد القاء الحجارة أو استخدام العنف تجاه الجيش

هل أخطأ الجيش فى طريقة فض الأعتصام؟

نعم

هل ماحدث من الجيش يرتقى إلى تخوينه وجعله فى موقف ضد الثورة؟
بالتأكيد لالالالالالالالالالالالال الالالالالالالاا

مشاهد هامة جدا ًمن الميدان
1- فى الساعة الثالثة صباحا كان المعتصمين يتبادلون الحوار بشكل رائع جدا مع الشرطة العسكرية وقوات الجيش الأخرى وكأن شىء لم يكن "وأنا اقسم بالله على ذلك"
2- سمعت ورأيت والله بنفسى "صف ضابط" يقول لنا ( هنيونى واشتمونى واعملوا اللى انتو عايزينه والله ماهكلمكم لأنى معاكم ولو حد غلط صوابعك مش زى بعض ومفيش أوامر بضرب أى حد )
3- فى حديث مع فرد من الشرطة العسكرية اقسم لى بالله أن الأوامر عند نزولهم إلى الميدان أنه فى حالة تعدى اى من المعتصمين عليهم بالسب أو بالضرب حتى أن لايردوا ذلك التعدى بأى شكل من الأشكال
4- هناك الكثير من مثيرى الفتن وغير المدركين لخظورة الأمر الذين يروجون الشائعات
5- أحد المصابين فى قدمه قال لى : إن الناس كانوا بيرجعوا للوراء فعلقت رجله فى حديده فكاد الجنود يدهسونه إلا أن ضابط برتبة مقدم أمرهم بالتوقف وقام بحمله واخرج قدمه بمساعدة الجنود ثم تركه ينصرف"
6- الشباب فى ميدان طلعت حرب يشعلون النار للتدفئة ويغنون أغانى الشيخ إمام رحمه الله
7- ونقلا عن ضابط فى الميدان من المتوقع إصدار بيان من الجيش بخصوص هذه الأحداث صباحاً
باختصار وأنا شاهد عيان على ماحدث فى ميدان التحرير ومعي كثير من الشباب الثقات المحترمين الموجودين فى مداخل مختلفة للميدان إن ماحدث من الجيش هو تجاوز بلاشك يحتاج إلى تفسير لكنه لايرتقى إلى مرحلة استخدام العنف المفرط أو تخوين الجيش أو الشائعات التى روجها الكثيرون
أرجوك انشر هذا الكلام فى أسرع وقت قبل أن تنتشر الأخبار الكاذبة والمبالغ فيها فى الصباح ويحدث ملايحمد عقباه دعونا لانخسر الشىء الوحيد المحترم فى البلد "وفى حالة ثبت لنا العكس لاقدر الله فلن نصمت أبداً"

"هذه المقالة ليس الغرض منها بالتأكيد الأعتراض على الأعتصام وإنما أنا مع كل المطالب الموجوده فيه ودليل ذلك أنى كنت فى الميدان لكن الغرض منها هو توضيح ماحدث بالأمس "

منقول من الفيس بوك

**hossaam** · 26-02-2011 09:51 AM

ربنا يطمنك...خير الحمد لله

**Ralliart** · 26-02-2011 09:56 AM

**cayman69300** · 26-02-2011 10:12 AM

يا رب الناس تفهم
كفاية تربسة دماغ

**nour_nrc** · 26-02-2011 10:34 AM

مشكوووووور والله يعطيك الف عافيه

**human** · 26-02-2011 10:40 AM

مش فاهم
يعنى الكلام ده مثلا يطمن؟؟؟

دلوقتى فيه مجلس وزرا سيئ جدا و ده بان فى العيينات الاخيره
فى الاول كنت اشجعه و الان اره لعنه

الكبار لم يحاسبوا

لم يحاسب احد على اخطاء سياسيه او جنائيه و الحساب كله على قشور

و الاربعه الكبار خارج المنافسه و مش بيتكلموا عليهم بكلمه واحده

فيه حاجه غلط

و تانى انا مش واثق فى حد و شايف ان التجليل و التكبير للجيش هييجى على دماغنا

الثورة ليها شرعيه تحترم و تنفذ

ليه شفيق يا راجل لسه موجود؟؟؟؟؟!!!!!! و لو هو عند اه بقى هو عند
عشان اللى عايزه الناس لازم يصير و ماحدش يقول بقيت الناس عايزاه عشان اللى عايزينه لم يعملوا عشان ييجى اصلا او عشان يفضل

انا هنزل التحرير تانى

**_Ahmed_casper_** · 26-02-2011 10:52 AM

السلام عليكم و رحمه الله و بركاته
احب احيى كاتب الموضوع على صراحته
ثانيا احب اوضح ان الجيش لم و لن و اأكد تانى (لم و لن ) تصدر منه اى اوامر بالتعدى على اى متظاهر
..كلام اكيد:طبعا قبل المظاهرات كل القاده بيجمعو مرئوسيهم علشان يديهم تعليماتهم و اول حاجه فى التعليمات (ممنوع التعرض لأى مواطن مهما كان الا اذا حاول التعدى على شخص او فرد من افراد الجيش بشرط انك تكون متأكد مليون فى الميه و برضه مش بعنف و لكن يكفى انه يتمسك و يعزل عن باقى المتظاهرين حتى لا يثير الشغب)
ارجوكم فكرو فى الكلام ده كويس
...‏ موقف من المواقف...
فى مظاهره من المظاهرات قبل التنحى كانت جت معلومات للجيش كتير بأن هيكون فيه وسط المتظاهرين بعض القله المندسه هدفهم انهم يضربو فى الجيش من وسط المظاهرات علشان طبعا الجيش يرد و طبعا وقتها كله هيقول الجيش بيضرب الشعب و تبقا فوضى و نعمل زى ليبيا .. تخيلو لما المعلومات وصلت للجيش كان ايه الكلام
..كان القاده بيقولو النهارده هيتم التعدى علينا انسو انكم معاكم سلاح و خدو ساتر مش اكتر الا اذا كان التعدى من فرد واقف لوحده مش وسط المظاهرات (مفيش ضبط نفس اكتر من كده)
عايز اقولكم ان كان فى جماعات قناصه كانو عايزين يطلعو فوق المبانى و يضربو بس الحمد لله كانت كل دى محاولات فاشله و الجيش كان بيسيطر عليها قبل وصولهم للميدان و ممكن للقاهره اصلا علشان كده كان فى ايام فيها التفتيش زياده فى مداخل الميدان و الناس كانو بيتضايقو مع ان كل ده لحمايتهم و جمايه الجيش
اما بخصوص ما حدث و اللى مكنتش عارفه غير دلوقتى فا اكيد اخطاء فرديه و يا جماعه اعذرو الضباط اللى فى الميدان دول واللهى من يوم مانزلو متبهدلين و سورى فى اللفظ نتنو وواقفين من غير ميغيرو لبسهم حتى من يوميها واللهى فى حين انهم بيشوفو ناس قدامهم داخلين خارجين وبلا شك فيه ان بقا فى ناس دلوقتى بالنسبلهم المظاهرات موضه او خروجه و مش حاسين ولا بالجيش ولا بمطالب المظاهرات دى
اللى حصل اكيد اكيد غصب عن الظباط .. يا جماعه والله والله فعلا اتبهدلو جامد ده غير انهم ملهمش فى التعامل المدنى قد كده و غير كمان ان كل واحد وراه شغل متلتل فى وحدته وخدو بالكم ان الجيش وراه حاجات تانيه كتير كتير كتير و بقت خطيره و ياريت كل واحد يفهم بس فضل انه يحمى الثوره و ابطالها اهم
الغرض من كلامى ... ارجوكم راعو ظروف الجيش و سامحو الاخطاء الفرديه اللى هى من اسباب الضغط الفظييييع
ارجو كل واحد ينقل الكلام ده لأصدقائه

**wawoo** · 26-02-2011 11:06 AM

المشاركة الأصلية كتبت بواسطة human12

مش فاهم
يعنى الكلام ده مثلا يطمن؟؟؟

دلوقتى فيه مجلس وزرا سيئ جدا و ده بان فى العيينات الاخيره
فى الاول كنت اشجعه و الان اره لعنه

الكبار لم يحاسبوا

لم يحاسب احد على اخطاء سياسيه او جنائيه و الحساب كله على قشور

و الاربعه الكبار خارج المنافسه و مش بيتكلموا عليهم بكلمه واحده

فيه حاجه غلط

فعلا الوضع كدة لا يطمئن على الاطلاق و اللى بيحصل على الارض مختلف عما يقال فى البيانات ...
اعداء الثورة مازالو احرار و يقدر يعملو حاجات كتير ...المجلس العسكرى لا يوضح بشكل كبير كيف يفكر و ماذا يخطط
اللى حصل امبارح دة محتاج تفسير اكتر من مجرد اعتذار كدة

فى حلقة مفقودة فى ما يحدث الان

**epnmasr** · 26-02-2011 11:07 AM

إن الله لا يغير ما بقومٍ حتى يغيروا مابأنفسهم
والله لو غير كلاً منّا من نفسه للأفضل لتغيرت مصر كلها للأفضل إن شاء الله
وأنتم شايفين الناس في الشوارع لم تحاول أن تستجيب للتغيير للأفضل ولو من قريب
فوضا في الشوارع وإنتظار صف ثاني وثالث في الطرق ودخول عكسي في الشوارع
وعدم الأحترام لحرمة الشوارع والطرقات وما أفزعني الباعه الجائلين في وسط البلد والفوضى التي أحدثوها
وهذا غير من إستغل الظروف وبنى على أرض زراعيه أو أملاك دوله أو أوقاف
وغير الأستغلال وزيادة الأسعار
فهذه الفئات هي أسوأ أو لا تقل سوأً عن المفسدين والمرتشين والنصابين والحرميه الموجودين في كل مكان ومجال في مصر
فلو حكمنا ملاك من السماء في وجود هذه الفئات في المجتمع فلن تنصلح البلد

**زهير فكري** · 26-02-2011 11:10 AM

بصراحه الواحد مش عارف يقول ايه , لازم الناس تحكم عقلها شويه , الجيش ما اعترضش ان الناس لو عايزه تروح ميدان التحرير و تتجمع في اي وقت كنوع من الاحتفال , لكن نجيب خيم تاني و نعسكر و نشل الدنيا اعتقد دا الموضوع بقي over , لان في حاجه اسمها حظر تجول من ناحيه ومن الناحيه التانيه عايزيين البلد ترجع تمشي تاني لمصلحه الكل و البورصه ترجع تشتغل و الناس تستثمر فلوسها , انتو ناسيين ان في آلاف المساجين لسه هربانين ؟؟؟؟ و المدارس و الجامعه لسه ما رجعتش ؟؟؟؟ و ناسيين ان في قطاع طرق مسلحيين بيقطعوا الطرق الزراعيه ليلا ؟؟؟؟ و ان الشرطه عندها مشاكل كبيره لسه لم تحل ؟؟؟؟ده معناه ان البلد لسه ما استقرتش و الوضع ما زال حرج .

اعتقد اللي بيروح اما حاجه من اثنين يا اما مش فاهم تبعات عمله , يا اما مدفوع من ناس وراه عايزه تلوي ذراع الجيش و خلاص و مصلحتها تمشي و خلاص , المشكله مش في شفيق او غيره المشكله ان الناس لازم تصدق و تحس ان الشعب بقي هو ليه السياده دلوقتي , يعني ما فيش حد يقدر يقف ضده دلوقتي مهما بلغت قوته و يفرض عليه حاجه.

بلاش يا جماعه نشوه الانتصار تنسينا نفسنا و نرجع نندم , الجيش عليه ضغوط كبيره في هذه المرحله و ما ننساش المعارك التي في ليبيا و احتمال فرض حظر جوي و دي بلد علي حدودنا , و تأمين الجبهه الداخليه كل دي ضغوط كبيره عليه . اتقوا شر الحليم اذاغضب .