النور معلق و اللمبة الزرقا فى التابلوه منورانى عالطول : )

السلام عليكم ...
امبارح كنت ماشى و مشغل النور العادى و الدنيا زى الفل بس ضلمة شويتيين على طريق السويس فقلت اشغل العالى .. مفيش بعدها ب دقيقة شميت ريحة شياط و لقيت اللمبة الزرقا فى التابلوة مش بتطفى حتى لو رجعت ذراع النور للوراء على النور العادى ...
طفيت و فتحت كل حاجة من الاول .. اللمبة منورة و مش بتطفى و النور مش بيقلب ... اعدت اجرب كذا مرة لقيت اللمبة اتطفت و النور العادى ظبط .. شويه اديت اشارة يمين فالدنيا علقت تانى ...
قلت اتتبع ريحة الشياط و ركنت و نزلت تحت التابلوه عند دواسة الدبرياج لقيت فى سخونة جامدة عند علبه الفيوزات ..

مكدبش عليكو مفهمتش حاجة و كملت الدنيا من غير النور العادى لحد البيت يدوبك النور السهارى ...

ياريت يا اخوانا لو حد عنده خلفية عن القصة دى ممكن يقولى ...

مش عارف دى مشكلة فيوز و لا مشكلة كتاوت ولا ايه ...

نيو اكسنت 2009 مانيوال عاملة 35000 ... تشترى على العيب ده : )))
دمتم بخير و سعادة

السلام عليكم ...
مفيش أى حاجة مشابهة حصلت مع حد أو تفسير منطقى للى حصل ؟

انا دخلت الموضوع الصبح ومريدتش ارد عشان معرفش حاجة ودلوقتي دخلته ملقيتش جديد
فمش عارف بصراحة اقلك ايه بس معنديش علم !

اقتباس:

---

المشاركة الأصلية كتبت بواسطة ranger

انا دخلت الموضوع الصبح ومريدتش ارد عشان معرفش حاجة ودلوقتي دخلته ملقيتش جديد
فمش عارف بصراحة اقلك ايه بس معنديش علم !

---

جزاك الله خيراً .. ربنا يكرمك .. يكفينى مرورك و اهتمامك : )

انت مركب حاجة زيادة(فوجات_لمض اعلى من الفابريقة بكتاوت او من غير-موصل حاجة زيادة على دراع النور).؟

انا العربية علقت معايا مرة واحدة.ارعش مبيشتغلش والواطى مش شغال والعالى بس اللى شغال.قفلت النور خالص وجربت تانى اشتغل وخبط خبطتين على التابلوه عند العدادات.

ولما سالت الكهربائى قاللى نبص على الفيوزات وفعلا لقى فيوز بايظ وغيرته والحمد لله.

للاسف ده دراع النور باظ ولازم يتغير لانه بالظبط عمل كده معايه الدراع سعره 130 اصلى حتلاقيه عند جورج سليمان شارع رمسيس اساله على بتاع الكيا وتركبه عند كهربائى نضيف مصنعيه 25 ج ارجو ان اكون افدتك ومتستعملش القلاب العالى كتير

بالوضع الي حكيت عليه كده واضح ان ذراع النور باظ ومحتاج يتغير ..
قدر الله وما شاء فعل

بس قبل تغييره يجب ان تتأكد ان مفيش احمال زيادة على المفتاح (لمبات تسحب تيار عالى راكبه بدون كتاوت) فوجات راكبة بدون تأمين للمفتاح او بدون مفتاح إضافي. مع مراجعة الفيوزات كلها ومطابقة الأمبير الخاص بكل منها بالأمبير المكتوب في كتيب التشغيل.

اقتباس:

---

المشاركة الأصلية كتبت بواسطة emo_ayman

انت مركب حاجة زيادة(فوجات_لمض اعلى من الفابريقة بكتاوت او من غير-موصل حاجة زيادة على دراع النور).؟

انا العربية علقت معايا مرة واحدة.ارعش مبيشتغلش والواطى مش شغال والعالى بس اللى شغال.قفلت النور خالص وجربت تانى اشتغل وخبط خبطتين على التابلوه عند العدادات.

ولما سالت الكهربائى قاللى نبص على الفيوزات وفعلا لقى فيوز بايظ وغيرته والحمد لله.

---

ربنا يكرمك على تعبك .. انا مش مركب اى حاجة اضافية .. هاروح ان شاء بكرة قليوب و هاشوف هيعملو معايا ايه ..

اقتباس:

---

المشاركة الأصلية كتبت بواسطة megaman

للاسف ده دراع النور باظ ولازم يتغير لانه بالظبط عمل كده معايه الدراع سعره 130 اصلى حتلاقيه عند جورج سليمان شارع رمسيس اساله على بتاع الكيا وتركبه عند كهربائى نضيف مصنعيه 25 ج ارجو ان اكون افدتك ومتستعملش القلاب العالى كتير

---

ازيك يا حسام ؟ يارب تكون بخير : )

ربنا يكرمك ... هاروح التوكيل الاول و بعد كده هاشوف هاعمل ايه ؟
معلش هوا جورج سليمان ده فين بالظبط فى شارع رمسيس ... متشكر جداً على تعبك : )

كنت بفكر اروح لنافع فى دمشق اسأله برده ..

اقتباس:

---

المشاركة الأصلية كتبت بواسطة أحمد علاء

بالوضع الي حكيت عليه كده واضح ان ذراع النور باظ ومحتاج يتغير ..
قدر الله وما شاء فعل

بس قبل تغييره يجب ان تتأكد ان مفيش احمال زيادة على المفتاح (لمبات تسحب تيار عالى راكبه بدون كتاوت) فوجات راكبة بدون تأمين للمفتاح او بدون مفتاح إضافي. مع مراجعة الفيوزات كلها ومطابقة الأمبير الخاص بكل منها بالأمبير المكتوب في كتيب التشغيل.

---

الحمد لله : )

محتاج فعلاً اراجع على الفيوزات علشان مافيش حاجة راكبة زيادة ...

شكرأ جزيلاً على تعبك يا أحمد ..ربنا يكرمك ..

انا حصل كدة معايا بعد ما غسلت العربية فى البنزينة بدون غسيل الموتور طبعا بس الواد شكله حب يتوصى فضرب مسدس الميه فى الشبكة و الهوايات اول ما طلعت من البنزينة بشغل النور لقيت الدراع شاط و اما غيرته لقيته سايح نصيحة بلاش غسيل المسدسات ده و لو لازم يبقي تنبه على الواد يبقى حريص