تقيمى لسيراتو كوبيه 6 سرعات بعد 5000 كيلو

**hazem_zem** · 26-02-2011 03:32 PM

السلام عليكم ورحمه الله
ازيكم ياشباب السيراتو؛؛ قولت أقولكم رأيى بصراحه مطلقة بعد ما اشترت سيراتو كوبيه خليجى وعملت بيها 5000 كيلو
المميزات
الشكل الخارجى تحفة ما شاء الله وكلنا عارفين
الشكل الداخلى جميل برده بحس انى راكب عربيه تفوق سعر 130 ألف
الأوبشنز روعه انا جايب فئه من أعلى الفئات ينقصها البلوتوث و ABD
الشيفت سواء اللى فى الطاره او الفتيس جميل
اللى فى الطاره أسهل ومفيد لو انت على سرعات عاليه وعايز تلعب بايديك الأتنين
اللى فى الفتيس روعه وتحس ان راكب راللى
الثبات جميل جدا جربته على 170 لحد دلوقتى
مقلقتش خالص زى ما كنت ببقى قلقان مع النيو اكسنت
العفشة نشفه بس بتنعم مع الوقت وبدأت اتعود عليها مش عامله مشكله أوى
الصيانه لسه معملتهاش

العيوب
بالرغم انها فى مأمن من الحراميه لأن الحرامى مش هيعرف يسرقها لأنها استارت انيجن ولا هيعرف يسرق كاسيت لأنه بيلت إن لكن الواحد نفسه يركب جهاز انذار عشان امنع البلى قبل وقوعه وربنا يستر علينا جميعا

السحب بصراحه انا كان معايا نيو أكسنت ودى شيطان فى الجرى وكنت عارف ان السيراتو مش هتبقى زى الأكسنت فى الشد
بس بصراحه العربيه كانت لازم تبقى أكتر من كدا باور هورس زى الهوندا مثلا 140
انا كنت بشد امبارح مع نيو أكسنت والانترا القديمة والجديده
مكنتش بعرف اعديهم بس كنت ماشى معاهم
بالرغم انى مشغل المانيوال وبجيب أخر الموتور بس ثباتها كان كويس

تقيمى عاما هى عربيه ركوب أكتر من انها شد وبالرغم من كدا هى مش من النوع الرخم فى السحب

عاما عايز رأيكم فى التقييم وكمان خبرتكم فى العيوب
نفسى أركب جهاز انذار كويس ولو حد عنده حاجه عشان العربيه تسحب أكتر
ولو حد عنده اسئله يقول وانا هاجاوب عليه ان شاء الله

**rammar** · 26-02-2011 03:46 PM

ألف مبروك ربنا يكفيك خيرها ويبعد عنك شرها
وعقبال صيانة 500000

**Mshawky** · 26-02-2011 04:23 PM

فتح العربيه كويس هتجيب معاك سحب اكتر من كده

انا عن نفسى معايا سيدان واهى اتقل م نالكوبيه وفرجت الشارع على زميلى بالنيو اكسنت وجديد وموتور لسه بحالتها ولما قرص وجابنى لقيته عن شنطه العربيه ورا فموتور السيراتو محترم وحلو بس عيبه مينفعش تجرى بيه وهو استوك لازم شويه شقاوه عليه علشان يفتح معاك واكمبيوتر العربيه ياخد على كده هتحس ان الاوتو والمانويال مش فارق كتير وبتجرى معاك اوى

وربنا يباركلك فيها يابوب انا ناس كتير قالتلى ليه مجبتش كوبيه بس ساعت ماشتريت كانت الكوبيه ب 148 الف خليجى فطبعا مينفعش هههههه فجبت سيدان هاى لاين والحمد لله مبسوط يبها كل يوم بشوفها كانى اول مره اركبها

اسف لو طولت عليك

**amgomaa** · 26-02-2011 10:19 PM

السلام عليكم...
كنت عاوز اسال حضرتك لو سمحت هو الشيفت اللى فى الطاره بيشتغل على وضع الاوتو العادى ولا الوضع الرياضى ولا بيشتغل فى الحالتين سواء الفتيس على الd او + - و شكرا.

**temo85** · 26-02-2011 11:44 PM

[b][/bالف مبوك على العربيه وربنا يديك خيرها و يكفيك شرها , انا عاوز اجيب خليجى لاكن قلقان من قصه الضمان فى بعض الناس قالتلى ان فى شركات بتضمن الخليجى و البعض الاخر قال ان كل ده ضحك على الناس و مش بيضمن حاجة , بما انك معاك خليجى ياريت تقولى رأيك و شكرا

**A.Lotfy** · 02-03-2011 01:54 PM

ألف مبروك وربنا يرزقك خيرها ويكفيك شرها
بس أنا عندي سؤال ... انا عاجباني اوي العربية بس خايف من موضوع الكنبة اللي ورا
هل الدخول والخروج والمساحة عملية ولا مش عملية

يعني ممكن 3 يركبو ورا مرتاحين ولا اضيق شوية من السيدان

**hazem_zem** · 13-03-2011 03:56 PM

شكرا ليكم كلكم واسف على التأخير فى الرد
بالنسبه للشيفت اللى فى الطاره لازم تكون على الوضع المانيوال مش الأوتو
بالنسبه للتفتيح انا فتحتها فعلا بس تفتكر لازم افتح الأوتوماتيك والمانيوال ولا عادى اى واحد
بالنسبه للضمان سمعت عن أمان الشرق وتربيل ايه والسعر مش كبير بس انا بصراحه لما مأمنتش بس ناوى ان شاء الله
بص انا الحمد لله محصلش حاجه تستدعى الضمان وكدا كدا الضمان هيرخم عليك لو فيه حاجه ظهرت بس على الأقل بالخناق هتقدر تاخد حقك لكن لو من غير ضمان مش هتقدر تفتح بؤقك

**hazem_zem** · 13-03-2011 03:59 PM

بالنسبه لموضوع الكنبه
الاقعده وراه مريحه جدا فى الوسع
لكن طبعا مش عمليه اوى وانا كنت عارف كدا قبل ما أجيب
هما حاولوا يسهلوها عن طريق ميل الكرسى وحركته لقدام بشكل مباشر
لكن فى أوقات كتير لازم اللى قدام ينزل عشان اللى وراه ينزل
فيه نقطه كمان السقف فى الكوبيه بيبقى واطى شويه مش هينفع مع الناس الطويله
بس انا مش متجوز ومش فى احتياج للمكان اللى وراه
بالرغم ان لما كان معايا السيدان كنت بستخدم الكنبه اللى وراه فى حاجات كتير
زى انى احط شنط او اعلق جاكيت البدله ودا مش سهل فى الكوبيه

**hazem_zem** · 13-03-2011 04:01 PM

نيجى على الموضوع المهم محدش رد عليا فى جهاز الأنذار تفتكروا اركبه فين وايه افضل حاجه ومش هيأثر على المفتاح خصوصا ان المفتاح استارت انيجن

على فكره بدأ يظهر معايا عيب لسه مش عارف ايه سببه
صوت تزييق وراه خصوصا فى المطبات
انا متوقع يأما تربيط او لقوه الفرامل
بس هاشوف وابقى اقولكم
شكرا على ردكم

**amrsabet** · 29-03-2011 12:24 AM

المشاركة الأصلية كتبت بواسطة hazem_zem

نيجى على الموضوع المهم محدش رد عليا فى جهاز الأنذار تفتكروا اركبه فين وايه افضل حاجه ومش هيأثر على المفتاح خصوصا ان المفتاح استارت انيجن

على فكره بدأ يظهر معايا عيب لسه مش عارف ايه سببه
صوت تزييق وراه خصوصا فى المطبات
انا متوقع يأما تربيط او لقوه الفرامل
بس هاشوف وابقى اقولكم
شكرا على ردكم

ممكن حضرتك تطمنا على صوت التزييق ده وهل ظهرت معاك اى مشاكل لحد دلوقتى وياترى صوت العربية عالى على السرعات ولا عادى

سؤال اخر واسف للاطالة هل لورجع بيك الزمن كنت هتشتريها ولا كنت هتجيب حاجة تانية