الموضوع: اقالة مدير امن البحيرة ظهر الحق والله اكبر

المشاركة الأصلية كتبت بواسطة mr_vampire

حبيبي كان فيه ناس بتدافع عن الظابط وقالت احنا حطينا الجزء اللي يدينه بس واهملنا الجزء اللي يبرءه حتي لو كان الجزء ده اتقال بالذات بعد مالظابط اللي جنبه ( كلمه في ودنه ) ومش هجزم انه لفت نظر انه بيتصور لان اكيد التصوير كانه واضح مع اني ( متأكد انه لو كان عارف انه بيتصور مكنش قال اللفظ اللي قاله ومقولة الجزمة ) عموما حاجة بسيطة منعلقش عليها ( انه واخد باله انه بيتصور ولا لاء ).

وانا مقولتش اني عايز ازبح كل ظباط الشرطة ( واراهنك ان كل الشباب اللي هنا مش عايز كدة ) انما اقل واجب يتم ازالة العناصر اللي مفيش فيها شك انها تسوء لجهاز الشرطة ( لاننا مش هنقدر نعيش من غير شرطة بس برده لازم الاول يتطهر ويتنظف من الاشكال اللي تسيء ليه ).

واخر حاجة اراهنك ان وزير الداخلية اقاله بسسسسسسسس عشان الفيديو اتنشر واتذاع وكانت الاقالة نوعا من تهدئة الرأي العام انما لو مكنش الفيديو اتنشر مكنتش هتطلع منه كنوع من القناعة الشخصية انه لازم يقاوم الفئة اللي تسيء لجهاز الشرطة.

وبخصوص ظابط المعادي قاري كل التعليقات ومهما كانت التعليقات مش هتبقي بحجم الخطأ اللي ارتكبه الظابط انه يضرب نار عالسائق حتي لو السائق تعدي عليه والا هتبقي غابة اللي معاه سلاح هو الاقوي.

1) اقدر اقولك بكل ثقة ان اللى دافع كان عشان حالة الغليان فى الشارع ضد كل ماهو شرطى ... مكنش عايز يزود النار يعنى زيادة ... لأن كان خلاص الفيديو نزل وكان فى ناس اعرفهم شخصيا بيقولوا رايحيين نهد امن الدولة عليهم

بالذمة دة يرضى حد ... حتى لو مديرها زبالة ؟؟؟؟

2) بخصوص ظابط المعادى اكيد انت مقرتش التعليقات كلها كويس ... لأ دة معظم اللى ردوا قاللوا حلال فى الضابط القتل

ودى اهم نقطة يعنى اية حكم الشارع هو اللى يمشى؟؟؟؟؟ حتى لو كان الغلط راكبة من ساسة لراسة وقتل السواق متعمد ميبقاش الحكم لشريعة الغاب فى حاجة اسمها قانون ويتحاكم بالقانون

لكن شوف بقى حكم الشارع ادى الى اية ؟ بعد ماخلصوا علية اتلموا و حرقوا عربيات شرطة و راحو يحرقوا القسم لأ وكمان راحوا على البيت بتاعوا عشان يحرقوة بأمة والدتة يعنى اللى قاعدة فية .... شفت حكم الشارع

عرفت لية بنهدى ونقول ياجماعة مش كدة

بالطريقة دى اى حد يعور نفسة ويشاور على ضابط مش عاجبة والناس تتلم وتروح تقتلة

يبقى بيتى و بيتك ومصر كلها تحت حكم مييييييييييين = البلطجية و قانون الغاب

لازم يكون فى وقفة بالعقل

يعنى نطالب ذى مالثورة كلها طالبت (سلمية سلمية) ان يقال كذا وكذا و وزير كذا وتغير القيادات الامنية كلها ال 22

ونشوف حيحصل اية من رد من الحكومة ولو منفعش نكمل و نعتصم


لكن حكم الغابة دة ... لأ لأ لأ

مينفعش عشان حالة غليان فالشارع ( وبتأكيد هي هي صواب من ناحية الشرطة بسبب اللي طلع منهم ) يدخل ناس تدافع عنهم وبالذات علي فيديو يبين اد الاصرار عالاسلوب القديم المعروف عنهم

خلى بالك اللى دافع ... دافع على وجهة نظرة اللى شايفها من الفيديو لكن مش دفاع على اعمال الشرطة بصفة عامة ... لأ هم قاللوا اللى شايفينة ودة حقهم تعترض علية او تتفق معاة دة بناء على وجهة نظرك

انا معاك ان ده مينفعش بس احنا عرفنا واتاكدنا ان الحسني مبتنفعش ولازم المطالبة بتظاهر وثورة عشان اللي بيطلبه الشعب يتحقق . ولو مديرها زبالة يبقي يتشال اسهل ( انما الاصرار علي بقاء فاسدين لمصلحة مين ؟؟؟؟؟؟؟؟؟؟؟؟؟

ياباشا مفيش حد اصر على بقاء فاسدين دة كان بس تحليل فيديو... وخلاص رأى الاغلبية اتنفذ وهو نقل مدير الامن ...لكن هل انت تضمن ان كل مرة التظاهر يبقى سلمى وان محدش يخش (من عناصر امن الدولة) ويرمى مثلا ازازة مولوتوف لافساد البقية الباقية من الشرطة والشعب

لا حضرتك تابعت وقريت كل التعليقات وقولت ان حتي مهما كانت قسوة التعليقات ده برده ميديش الحق ليه انه يضرب نار علي السائق. بس الاهم من الفعل ورد الفعل ( لو انا ظابط شرطة وعارف ان الناس كرهاني لله في لله واليومين دل بزيدة يبقي اتلم بقي انما استفذ الناس زيادة ( فبعد كدة قابل بقي رد فعل رهييييييييييييييييب ضد اي تصرف ولو بسيط من اي شخص لابس لبس شرطة).

شوفت بقى انت حكمت على الموقف وكأنك كنت واقف فية مع ان كتيير على النت قالوا ان الموقف كالأتى:

سواق الميكروباص واقف فى نص الطريق بيحمل و وراة عربيتين الملاكى بتاعت الضابط و ملاكى تانى .. الضابط طلع من الشباك وقال بصوت عالى حمل على جنب (يابنى) --(طبعا كلمة عبيطة)-- المهم سواق الميكروباص شاف البارية (برنيطة) الضابط على التابلوة قام نازل ومذعق الزمن دة مش زمنكم ياباشا وفاتح سنجة او سيف على حسب الروايات ... نزل الضابط ومعاة الطبنجة وضرب فى الهوا الشواق مخفش وهجم على الضابط ومسك ماسورة المسدس ومع الشد والجذب انطلقت رصاصة فى كتف السواق وبعدين حصل اللى حصل

دى الرواية على حسب شاهد واقف والله اعلم صحيحة ولا لأ
يبقى فى كلتا الحالتين منقدرش نحكم لاننا محضرناش الموقف يبقى نترك القضية للقضاء يشوفها مش نصدر احكام بناء على النتائج بس.. لو عكسنا الموقف والضابط اتقتل والسواق عاش كنت تفتكر اية اللى ممكن يتكتب ؟؟؟

انا طبعا معاك في عدم قبول قانون الغابة بس لو عايز تنفذ قانون يتنفذ عالكل والقانون ميدلوش حق بضرب سائق بطبنجته ( هنقول يتمسك ويتحاكم ) من خبرات الشعب السابقة مع البلاغات ضد ظباط الشرطة وخصوصا مع الاوضاع الحالية محدش فيه دماغ لسسسسسسسسسة يعمل بلاغ ويشوف اللي هيحصل.

اديك انت قلت خبرات سابقة فى عصر بائد راح واذاى محدش فية دماااااغ يبقى انت لو اتخانقت مع سواق ومثلا انت عورتة فى وشة ...يبقى عشان محدش فية دماغ ياخد حقة بالقانون او يسلكم مثلا للقانون يفتح عليك مطوة مثلا ويموتك ؟؟؟ ساعتها حتقول اية ؟؟ حقة اصل انا اللى عورتة الأول !!طب افرض كان الحق معاك وانت دافعت عن نفسك بس رد فعلة طلع همجى تعمل اية ؟؟؟

شوفت انتا بقي زي ماقولتلك علي ابسط المشاكل ( اسبقية المرور ) وصلت لايه وحرق عربيته وعربيات شرطة وقسم شرطة ( تفتكر ده لو شخص عادي مدني او ظابط جيش كان هيبقي رد فعل الناس بالشكل ده ؟؟؟؟؟؟؟؟؟؟ اكيد لاء بس الناس في قلوبها معزة خاصة لجهاز الشرطة بزيادة اوي اليومين دول

هى دى الكارثة بجد ... ذى مافى وحشين فى كويسين محدش يقدر ينكر اننا محتاجين الشرطة تنزل تأمن تانى ...بس مش عشان الوحشيين كتير نقتل فى الكويسين اللى بيضحوا بحياتهم دلوقتى خلى بالك و واقفين فى الشارع .... المستفيد الوحيد من عدم الأمان هم سواقين الميكروباص صباحا و البلطجية مساء و اذيال النظام البائد مستقبلا من حالة الفوضى المنتشرة

مش هتوصل للدرجادي ان شاء الله لان الشعب المصري اثبت ان قادر عالتمييز. واراهنك ان لو كان السواق هو اللي غلطان والظابط نزل كلمه باحترام كان فيه ناس هتظهر تقف جنب الظابط انما رد الظابط اخدته العزة والجلالة والعظمة المتعود عليها قبل كدة وبالتالي شال من قلب اي حد نية للوقوف جنبه.

لو حنتكلم على موقف الضابط فأنا رديت على حضرتك فوق..انا عايز افهمك بس ان اة الشعب المصرى واع بس مش كلة
حتلاقى اى حد مستفيد من قتل شرطى مثلا دخل ورمى كلمة ولع الموقف ... صايع بلطجى .... والاهم عناصر امن الدولة السابقين و الحاليين و اذيال النظام القديم مستفدين جدا بحالة الفوضى عشان الناس تلعن اليوم اللى جت فى الثورة.

لحاجة اللي مبتخدهاش في وقتها بتتنسي ومتهيالي لو مكنتش الثورة استمرت لحد دلوقتي مكناش حصلنا علي اللي وصلناله لحد النهاردة.

فمتهيالي تغيير وزير داخلية او مديرين امن وقيادات شرطة مش محتاجة جداول زمنية ده نشرات تطلع وتتنفذ وقتي.


متفق معاك .... بس هل البدائل النظيفة متاحة وقتى كدة ؟؟
انت كدة بتتنفذ وقتى عايز تحل جهاز الشرطة كلة و تعيد بناؤة من جديد ... دة مش حياخد اقل من 6شهور عايشين من غير امن ..!! لية متبقاش تغيير المديرين بس وبعدين القيادات بشويش فى حركة التغيرات عشان نحافظ على وجود الامن فى الشارع ولو بنسبة بسيطة حتى لو كفائتهم ذفت ومعاملتهم اذفت بس كلها مرحلة وقتية فى وقت الحركة الشرطية

وانا ازود معاك لأ لأ لأ لأ لأ لأ لأ لأ بس نضفها الاول وبعد كدة نقول حكم الغابة لاء مينفعش نقولها وهي علي قديمها وبقيادتها القديمة اللي واخدة علي حكم الغابة وتفكيرهم ( انهم اسيادنا واننا نستاهل ضرب الجزم )

معاك بس احنا الشعب بنواجة
3 اعداء

الاول : البلطجية والهاربين من السجون وقطاع الطرق
التانى: اغلبية الشرطيين المعقدين نفسيا اللى عايزين يطلعوة على الشعب
التالت: بواقى النظام القديم و عناصر امن الدولة المستفيدة تماما و بتحاول بشتى الطرق نشر الفوضى فى الشوارع عشان الناس تدريجيا تقول ومالة النظام القديم على الاقل كنا منظمين و حلوين

يبقى بالعقل نحكم بالعقل نحافظ على القلة القليلة من الشرطة النضيفة اللى فى الشارع وناخد بالنا ان فى وسطينا ناس عايزة تولعها لاغراض اخرى

انا كمان مستمتع بالنقاش :))

حنهى بقصة قصيرة حصلت النهاردة:

مجموعة مسلحة كانت بتسرق محل وبتهرب وكان فى ضابط مرور واقف بنقولة مضربتش نار لية ومسكتهم ... قاللى تضمنلى ان محدش يقول اهو الضابط قتلوا والشارع كلة اللى مش شاهد الموقف ميجيش يتقلب عليا انا ؟؟؟؟؟؟؟؟؟؟؟؟؟؟

المشاركة الأصلية كتبت بواسطة ashouhdy

حنهى بقصة قصيرة حصلت النهاردة:

مجموعة مسلحة كانت بتسرق محل وبتهرب وكان فى ضابط مرور واقف بنقولة مضربتش نار لية ومسكتهم ... قاللى تضمنلى ان محدش يقول اهو الضابط قتلوا والشارع كلة اللى مش شاهد الموقف ميجيش يتقلب عليا انا ؟؟؟؟؟؟؟؟؟؟؟؟؟؟

ريحتني يا شهدي من الرد ومهما تفهم في الناس ان مش دفاع عن بتاع دمنهور ده توضيح لكيفية وضع معلومة بطريقة معينة مما يؤديلتكوين اراء في اتجاه محدد واخفاءباقي المعلومة او وجود معلومة تثير الغضب برغم كذبها زياشاعة ان شفيق منع استيراد قطع السيارات المستعملة يقولك لا انت بتدافع عن ظابط شرطة فاسد طيب ما تقراوا باقي المشاركات وكلها بتقول ان ايظابط فاسديمشي واللى ارتكب جريمة يتحاكم لكن لا يجوز التعميم يقولك لا بردو انت بتدافع

المهم ان القصة اللى حضرتك قلتها حصلت بالحرف في الجيزة لكن من كام يوم وظابط الشرطة تصرفه اتغير شوية هو اتحرك فعلا ناحية الحرامية لكن اول ما لمحوه ضربوا عليه بالنار فبعد عن المكان فورا قلت له ليه انا عارف انك مش جبان حلف الف يمين انه مش جبن وانه يقدر يصيبهم كل واحد طلقة في رجله ويقبض عليهم طيب ليه معملتش كدة كان رده ايه يضمن لي انى لو ضربتهم الناس في الشارع ماتجيش تقتلني او تحاول تقتلني وايه يضمن لي انى متحولش محاكمة عسكرية وقتها لو فلت من الموت وايه يضمن لي انى لو مت الناس متقولش عليا كنت بقتل مواطن برئ وسمعتي تتلوث بعد ما اموت وحتي المعاش ولادي يتحرموا منه
وعرضت المشكلة هنا في اكتر من موضوع علشان حد يقولي كان يتصرف ازاي ومفيش حد بيرد