الموضوع شكله عاوز ثوره تانيه

**misoalex** · 27-02-2011 09:48 PM

الموضوع بتاع الشرطه ده زاد عن حده اوى

يعنى ايه الشرطه خايفه تنزل الشارع
يعنى ايه الشرطه خايفه من البلطجيه

سؤال هو مين الى مخوف الشرطه وبيضرب ضباط الشرطه دلوقتى هل انا ولا انت ولا الشعب المحترم العادى ؟

الحجه بتاعه الشرطه دلوقتى البلطجه
تتصل بيهم يقولك انا حعمل ايه لو جيت حيموتونى
تروحلهم عشان تبلغ عن جريمه قتل يقولك اعملك ايه الى تقدر تعمله روح اعمله
بيشوف المصايب والبلاوى ادام عينه فى الشارع وواقف يتفرج ويقولك مليش دعوه

ده اسمه ايه

لما البشوات خايفين من البلطجيه امال كانو بيحمونا منهم ازاى ولما هما خايفين على نفسيهم كده دخلو كليه الشرطه ازاى

هو لو حصل حرب الجيش حيرفض يواجه العدو عشان خايف يضربوه او يقتلوه

هل ده كلام يدخل العقل

انا شايف ان كل دى حجج فارغه الغرض منها نشر الرعب فى قلوب الناس المحترمه وتخويف الشعب وتربيته

لاحظو جرائم القتل والسرقه بالاكراه وصلت لحد فين

كل يوم ناس بتتقتل وتتخطف وتتسرق وهما ساكتين والجيش بقى بيسكت هو كمان دلوقتى
عارفين الجيش بيقول ايه بيقولك الى يتقتل بعد الساعه 12 احنا غير مسؤلين عنه (يعنى اهدرو دمه ) على اساس انه الى بيتقتل قبل الساعه 12 هما بيدورو على الى قتله
افرض ان اى حد من اهل بيتك تعب باليل وعاوز تلحقه ونزلت الشارع وقابلك بلطجى وقتلك ملكش ديه ؟!!!!!
حد بيسمع عن العصابات الى بتطلع فى القطارات فى اسكندريه وتسرق الى فيها بالاكراه تحت تهديد السلاح ؟
حد بيسمع كل يوم عن الناس الى بتتقتل
حد شايف البلطجيه ماشين فى الشارع ازاى بالسلاح
السلاح موجود من الاول والبلطجيه موجودين من الاول بس هما اخدو الضوء الاخضر لاطلاقهم على الشعب

افتكر الحلول سهل لارجاع الامان تانى والبلطجيه اجبن مما يكون واضرب المربوط يخاف السايب يعنى لو نزلو كام حمله ولمو حبه بلطجيه حلوين كله حيخاف ويلم ويرجع جحوره تانى

اه والى حيقول البلطجيه قلبهم جمد واخدو انهم يضربو الظباط اقوله انسى الظباط زمان كانو بيتضربو ويتقتلو برضه وقسم المنتزه واقسام تانيه اتكسرت قبل كده برضه والحياه رجعت تانى عادى بعديها بأيام

اظن الموضوع اكبر من خوف الشرطه الموضوع وراه حجات تانيه ولازم ناخد موقف ولو الشرطه خايفه تبقى تستقيل
احنا مش عاوزين كلام احنا عاوزين حلول
مش عاوزين واحد يطلع فى التلفزيون مش عارف يتكلم ويقول كلمتين ومفيش افعال والوضع كما هو عليه
لازم احنا نتحرك بس نعمل ايه هو ده السؤال ؟؟؟؟؟؟؟؟

**mostafa3000** · 27-02-2011 09:51 PM

واللة معاك حق في كل اللي قلتة

**A7MED_PHARMA** · 27-02-2011 10:02 PM

والله ياأبو نور
النهاردة كنت عند الحلاق..ناس كتيررر قاعدة
واحدة بيقول للتاني""البلد النهاردة نزلها 24 طلقة""
يقصد بلدنا يعني ..مش مصر
المهم
عرفت إن مصطلح طلقة إلي يقصدوها ..يعني 24 كيلو بانجو
وعرفت إن قرية جمبنا
بقا فيها حاجات زي نظام المطاريد كده..يعني عصابة كبيرة ...ورجالتها واقفين بسلاح..ومعاهم بوكس مسروق وعربية إسعاف مسروقة
وبيتاجروا في المخدرات والبانجو عيني عينك
وبيسرقوا الناس إلي بتقع تحت إيدها..

ده كله
والبهوات خايفين ينزلوااا...أمال هما وظيفتهم إيه زي مانت قولت إن الجيش مهمته الحرب مهما كانت التضحيات
ولاهما ظباط الداخلية مايعرفوش غير يفيموا عربياتهم ..ويفتروا على خلق الله

**wesam_salom** · 27-02-2011 10:07 PM

لو مش عاوزين ينزلوا

ممكن يتفضلوا يستقيلوا وبناقصهم

وساعتها ممكن يتشكل جهاز شرطه جديد من خريجى الجامعات بعد تدريبهم لفتره قصيره (6 شهور مثلا)

وفتح باب التطوع للجنود

وفتح باب العمل التطوعى فى تنظيم المرور والاعمال الخدميه لفتره مؤقته لحين تنظيم الجهاز من جديد (بمقابل مناسب للشباب العاطلين وما اكثرهم)

وفى خلال 3 سنين ممكن يكون عندنا جهاز كفء

**enas75** · 27-02-2011 10:13 PM

الظباط نوعين ...نوع محترم وده كان قليل ...رافضين النزول بسبب معامله الشارع ليهم واخدهم بذنب الفئه التانيه
ونوع كان قليل الادب ...وده خايف من تصفيه الحسابات من ناس اذاهم قبل كده

المشكله بالنسبه ليهم مش البلطجيه .....المشكله هي الناس
دلوقتي اي بلطجي حاول ظابط يوقفه او يساله اي حاجه..يقعد يزعق ويصوت تقوم الناس تتلم وكله يطلع غله في الظابط
وحصلت كتيير للاسف
او ناس عاديه ومش طايقه تتعامل معاهم
......................
ومتقولوش الناس مش حتعمل كده .....معايا زمايل في الشغل يجو كل يوم ويقولنا انا شتمت ظابط ومسحت بيه الارض ووقفت ازعقله ولميت عليه الناس ....وبيتكلم وهو فرحان ...مش مدرك ابعاد الموضوع
ادينا اهو نصنا خايف ينزل ولاده المدرسه بسبب قله الامن
علي فكره الموضوع ده لازم يتشافله حل سريع...

**misoalex** · 27-02-2011 10:22 PM

المشاركة الأصلية كتبت بواسطة a7med_pharma

والله ياأبو نور
النهاردة كنت عند الحلاق..ناس كتيررر قاعدة
واحدة بيقول للتاني""البلد النهاردة نزلها 24 طلقة""
يقصد بلدنا يعني ..مش مصر
المهم
عرفت إن مصطلح طلقة إلي يقصدوها ..يعني 24 كيلو بانجو
وعرفت إن قرية جمبنا
بقا فيها حاجات زي نظام المطاريد كده..يعني عصابة كبيرة ...ورجالتها واقفين بسلاح..ومعاهم بوكس مسروق وعربية إسعاف مسروقة
وبيتاجروا في المخدرات والبانجو عيني عينك
وبيسرقوا الناس إلي بتقع تحت إيدها..

ده كله
والبهوات خايفين ينزلوااا...أمال هما وظيفتهم إيه زي مانت قولت إن الجيش مهمته الحرب مهما كانت التضحيات
ولاهما ظباط الداخلية مايعرفوش غير يفيموا عربياتهم ..ويفتروا على خلق الله

هو ده الى انا بتكلم عليه يا دكتور فيه عصابات بتتكون والموضوع بيكبر

واضح ان وقت الازمه بيبان الرجال
وطلع الى عندنا فى الشرطه اغلبهم مش رجال ولا حاجه

انا مش فاهم يعنى ايه ظابط شرطه خايف من واحد صايع او بلطجى مش داخله عقلى خااااااااااالص
امال زمان كان ايه الى بيحصل مع البلطجيه والى شايلين سلاح
زى مقولت يا دكتور لو حصل حرب والجيش خاف يحارب بالظبط زى الى بتعمله الشرطه دلوقت

والقادم اسوأ

**Nile Heart** · 27-02-2011 10:31 PM

النهارده قدامى عربيه فيرنا..ملزق على النمره اللى ورا الاستيكر الشهير 25-ى ن ا ى ر

ملزوق على النمره مباشرة!!
والازاز كله متفيم
وطبعا فى ايه ملزوق على الركن العلوى من الازاز؟؟؟!!!
النسر الشهير
جيت جنبه وبصيت لقيت 3السواق وواحد جنبه خلقتهم زى الكتاب مابيقول عن الظباط...النضاره السوده والبصه المتعجرفه والسيجاره الللى ف ركن البق

والله كنت عايز انزل الم عليهم الخلق...المنحط لازق شعار الثوره على النمره ولا همه !!!!!

**misoalex** · 27-02-2011 10:32 PM

المشاركة الأصلية كتبت بواسطة enas75

الظباط نوعين ...نوع محترم وده كان قليل ...رافضين النزول بسبب معامله الشارع ليهم واخدهم بذنب الفئه التانيه
ونوع كان قليل الادب ...وده خايف من تصفيه الحسابات من ناس اذاهم قبل كده

المشكله بالنسبه ليهم مش البلطجيه .....المشكله هي الناس
دلوقتي اي بلطجي حاول ظابط يوقفه او يساله اي حاجه..يقعد يزعق ويصوت تقوم الناس تتلم وكله يطلع غله في الظابط
وحصلت كتيير للاسف
او ناس عاديه ومش طايقه تتعامل معاهم
......................
ومتقولوش الناس مش حتعمل كده .....معايا زمايل في الشغل يجو كل يوم ويقولنا انا شتمت ظابط ومسحت بيه الارض ووقفت ازعقله ولميت عليه الناس ....وبيتكلم وهو فرحان ...مش مدرك ابعاد الموضوع
ادينا اهو نصنا خايف ينزل ولاده المدرسه بسبب قله الامن
علي فكره الموضوع ده لازم يتشافله حل سريع...

حلها بسيط يا باشا اللجان بتاعه الشرطه ترجع تانى اكتر من الاول والى يغلط يتعمله محضر سب

مينفعش ظابط لوحده بطوله يوقف بلطجى لوحده فى الوقت الحالى لازم يبقى فيه مجموعه ظباط فى الشوارع مش ظابط ماشى بطوله يعمل فيها عنتر زى زمان ويدخل على منطقه ومعاه كام عسكرى

لازم يبقى فيه حاجه اسمها حملات زى زمان وينزلو ينضفو الشوارع من البلطجيه
ويتنظر فى المحاضر الى بتتعمل
يعنى لازم الشرطه ترجع بكل قوه مش واحد ولا اتنين واقفين لوحدهم فى كمين زى زمان

صدقنى اول ما البلطجيه حيلاقو كده حيتلمو زى زمان واضرب المربوط يخاف السايب
لكن الى بيحصل دلوقتى ده هبل فى هبل
وده الى هما عاوزينه عشان يقولك بص الظباط بيتشتمو ويتضربو طب مش لاعبين
طب ده كلام ؟
انا مش بقول اختراع القيادات فى الشرطه عارفه ازاى ترجع وتوقف المهزله دى

بس فيه حاجه بتتطبخ احنا مش عارفنها

**A.Saad** · 27-02-2011 10:34 PM

زمان كان فيه تنظيم واللى كان بيتأذى فيهم كان زمايله بيجيبوا اللى اتعدى عليه
دلوقت لا خلاص مفيش كدة
كمان الشعب نفسه زى ما enas75 قالت هو اللى بيتعدى عليهم
يعنى واقعة تانية اكتبت فى المنتدى
ظابط بيكلم سواق ميكروباص بادب انه ميقفش فى نص الشارع
الركاب نزلت ضربت الظابط
انا لو مكانه
هانزل ليه ؟؟؟؟؟؟؟؟

الموضوع: الموضوع شكله عاوز ثوره تانيه

LinkBack

أدوات الموضوع

عرض

الموضوع شكله عاوز ثوره تانيه - انشر الموضوع فى :

-

-

-

-

-

المواضيع المتشابهه

عاوز اغير عدادات التابلوه بتاعة كورولا 78 بعدادات تانيه

جبت شكمانين ديفل و عاوز اركب الاتنين .. محتاج توصيلات تانيه ؟؟

موتور السفنتينا (127)... شكله عاوز عمرة

الكلمات الدلالية لهذا الموضوع

المفضلات

المفضلات

ضوابط المشاركة