السلام عليكم ورحمة الله وبركاته

من شهور كنت معدي بلليل متأخر على الاشارة اللي عند تقاطع كلية الفنون التطبيقية وكانت العربيات سايحة براحتها في التقاطع وكانت هتحصل كذا حادثة مع ان في 6 عساكر قاعدين على الرصيف بيتساهرو وسايبينها كدة
ساعتها اتنرفزت وركنت على جنب ورحت كلمتهم بكل أدب وقلتلهم لازم تشوفو شغلكم لاني لو اتخبطت انت مش هتجيبلي حقي بس ربنا هيحاسبك......... ،وكان الرد فوري وصادم وعنيف من الامين يتلخص في جملة "انت مالك انت هتعرفنا شغلنا" وساعتها ركبت العربية وكتمت في نفسي وقلت هما يومين وهسيب البلد دي يكش تولع

النهاردة في نفس الإشارة مع وقوف نفس الأمين والعساكر ،داخل الاشارة وفوجئت بميكروباص طاير كان هيشيلو كام عربية وهما بيتفرجو
نزلت وقلت المرادي مش هسكت وفوجئت بالأمين اللي كان بيتكلم بمنتهى العجرفة والتكبر من كام شهر بيذرف الدموع!! وبيقولي بكل احترام "يا فندم سيادتك على عيني وعلى راسي بس سواقين الميكروباص بلطجية وبنسمع شتيمتنا بودانا واحنا نفسنا نشتغل بس حالتنا النفسية..."
المهم فضلت اتكلم معاه شوية كلام تشجيعي وفهمته انه يبقى هو اللي على راسي وينال احترام الكل لما يقوم بشغله وقلتله ان الجيش لما اتهزم في 67 كانو بيتعرضو للشتيمة والاهانة بس مستسلموش.......

طبعاً محدش ينكر ان الامين دا كان مش امين وكان هو اللي بلطجي وبيبلطج على خلق الله بس في نفس الوقت لو مقاموش بدورهم الدنيا هتخرب خاصة مع نزول التكاتك في الشوارع الرئيسية

اللي بفكر فيه حالياً اني هلم شوية من اصحابي وهننزل موقف الجيزة ونتكلم مع السواقين على أساس انهم لازم يحترمو دور الناس دي ولازم يحافظو على البلد وفي نفس الوقت لو طلب منه رشوة بعد كدة ميسكتش
ولو طلبت اننا نجيب الامناء والعساكر يتكلمو مع السواقين دول ويتواصلو شوية

بصراحة مش عارف النتيجة هتكون ايه لان التعامل مع الفئة دي صعب جداً بس اهي محاولة ولو كان الواحد فاضي كنت نزلت مع الناس انظم المرور

طبعاً كل ده مع افتراض حسن النية من المرور اللي انا اشك فيه بصراحة بس مقدمناش غير كدة
يا ريت اقتراحاتكم مع شوية شغل عملي منكم في تشجيع الناس دي على الرجوع لشغلهم الأصلي