الموضوع: حد شاف حلقة الحياة اليوم مع مدير مكتب الرئيس 18 سنة !!

المشاركة الأصلية كتبت بواسطة dr-mohamed

ولماذا لا تقوم بعكس الوضع
ان اي حد بيقول اي كلمتين يعجبوكم تاخدوها حتي لو من عزبة الورد توداي
على فكرة انا لما وجهت الكلام ما وجهتوهوش ليك وجته لكل واحد تنطبق فيه الصفة وطالما انت رديت يبقى انت ادرى بنفسك وبعدين في جزئية ان انت وجهتلى الكلام بصفة الجمع وقولت يعجبوكم رغم انى نادرا لما بجيب خبر عن جريدة او لسان اي حد وهاتلى مشاركة واحدة فيها كدة تثبت عكس كلامي رغم ان المفروض ان انا او انت او اى حد لما يتعرض لخبر او راي لاي حد يناقش ويختلف الحجة بالحجة مش يسيب المناقشة الموضوعية ويمسك اللي كاتب الخبر ويشرده ودي مش موضوعية يعنى لما الجزيرة تجيب صورة لناس بيضربو على الكوبري نسيب الصورة ونتكلم انها عميلة وصهيونية وووراها اجندة وكان منظر الكوبري فيلم سينمائي ولما حد يجيب خبر مش نتفق مع توجهاتك بدل ما تناقش الخبر وهل هو صح ولا غلط لا تدخلنا فى انها بتاعة نجيب ساويرس ومينفعش ناخد منها خبر والتنقاض الغريب انك لما تلاقي خبر عاجبك لنفس الجريدة تجيبه مع ان بنفس النطق ما ينفعش تجيب اى خبر ليها وبعدين فيه مشاركة ليك جايب حوالى 8 سطور من اليوم السابع مع اننا كلنا عارفين رئيس تحريريها وفضيحته المشهور مش شايف ان ده تناقض غريب فى اراءك وبعدين في حتة التهكم اننا بناخد اخبارنا من جزيرة الورد مش هاقولك غير بص على توقيعك
واللى مش عاجبكم تشككوا فيه وفي اللى كاتبه وانو وانو
برضوا مش عارف انت بتجمعنى على اساس ايه على اساس انى برفض اخبار لمصادر معينة بحجج معينة وبنقاض نفسي وبنقل اخبار لنفس المصادر لو وافقت هوايا
الوضع عام مش قاصر على فئة بعينها
وفكر فيها بعقلك دقيقة واحدة بغض النظر عن اللي قاله
واحد فضل مدير مكتب مبارك 18 سنة هل هايبقي الملاك البرئ وسط شلة الفاسدين ؟
ولا اول ما اكتشفوا انه شريف بعد 18 سنة رفدوه

لالا مش اسلوبى ولا طريقتى انى افكر بالطريقة دي انا مليش دعوة بالراجل فاسد ولا صالح
انا اللي يهمنى هل هو بيتكلم في حقائق ولالا

المشاركة الأصلية كتبت بواسطة abf-nassar

ايوة فاسد هو كمان
وده مش من منطلق الاختلاف وخلاص
لا ده من منطلق ان مؤسسة الرئاسة كانت كلها فاسدة من اصغر رأس لاكبر رأس
واذا كان دلوقت طالع يركب علي كتاف الثورة ويعمل فيها انه الشريف العفيف اللي قعد 18 سنة وسط الفساد من غير ما يستفيد ولو بمجرد توصية لاي مصالح يبقي كداب
ناس كتير مننا كانت بتنكش عن الواسطة وبتدور عليها في اي حاجة حتي ولو كانت استخراج رخصة عربية
زكريا عزمي كان عاملها عزبة ايوة دي حقيقة والناس كلها تعرفها من سنين واللي ميعرفش يبقي مش متابع من زمان البلد فيها ايه
ايه الجديد اللي هو قاله ؟؟؟؟؟؟؟؟؟؟؟؟ مفيش
فساد في كل حته جوة مؤسسة الرئاسة اللي هو كان جزء منها يبقي يخرص مش يطلع دلوقت يعمل فيها وطني

على فكرة انا متفق معاك في كل اللي قولتلة ما عدا حاجة واحدة
انو مش لازم يخرص بالعكس كل دول هايجيبو بعض وهيفتنو على بعض سكوتهم مش مصلحة

المشاركة الأصلية كتبت بواسطة tarek gen 2

يا شباب الراجل ده مش من المناصب اللى تستقيل !!
ده معاه اسرار الدولة ده لو استقال يتقتل
و احنا كلنا متفقين ان مش كل اللى فنظام سى زفت خونة فيهم الكويس و فيهم الوحش و فيهم الساكت عن الحق يعنى يحسب كويس عشان مبيشاركش و وحش عشان ساكت
هو اكيد واحد من التلت انواع دول ملهمش رابع

سواء فاسد او مش فاسد بقى هو ده اللى لازم نحلل كلامه ! و نشوف و نسمع منه كويس و نطبق على كلامه العقل و المنطق
منتا متقوليش اصل حسنى مكانش يعرف اصل جمال مش طمعان فى الثورة اصل سوزان كانت كويسة و القراءة للجميع و شلل الاطفال اصل زكريا عزمى غامض اصل اصل اصل
لا انا عندى مخ هشغله
ممكن يقول 10 جمل اصدق منهم 8 و 2 لا عادى جدا مش لازم اخد منه الموضوع لكشة واحدة !! فاسد او نظيف لازم اسمع منه و اسمع من غيره و احلل
و الراجل مقالش حاجة غلط خالص !
وكلامه كله موازى للمنطق وفقا للاحداث الماضية
وأل مبارك كان عايشيين فى عزبة
والقعدة 30 سنة تحولك من موظف لصاحب ملكية !
و القعدة 30 سنة من اصل اربعين سنة كابن رئيس جمهورية تحول شخص من شاب عادى الى شاب سياسى يريد اقتحام الحياة السلطوية
و عشان الدخول ده يتم لازم يسلك سبيل على حساب مين مش مهم !!

حسنى اتظلم اوك بس مين اللى ظلمه غير نفسه !! مين اللى شال كمال الجنزورى عشان معارض لصفوت الشريف القواد اللى خرج من المخابرات مدان فى قضيه تجسس على نساء و تجنيدهم !
مين اللى ساب مراته تعين وزراء على شعب !
مين اللى ساب ابنه يبرطع فى بلد و يختار مجلس شعب ينوب عن 85 مليون !
مين ساب ابنه (زمان) يجيب زبحة صدرية لاباظة بتاع بيجو ؟ و يخش شريك فى اى شركة تفتح فى بلد
مين رئيس جهاز شرطة !
مين اللى كان امن دولته بتعين رؤساء الصحف و ائمة المساجد و كل ما هو يخاطب الناس ! و طبعا معروف ليه
انا اصدق هذا الرجل و اصدق اسامة الباز ليس فى كل الكلام و لكن فى اللى يتفق و عقلى

بالظبط كده
والناس اللي خلت الراجل فاسد واضح جدا انها مش عاوزه تشوف الفيديو لا مش عاوزه تركز شويه صغيرين علشان تعرف ان محمود صبرة ده كان شغلته ايه
كان نظام معلوماتي
يجيبوا الأخبار للباشا المهمة ويعملوا فيها تقارير
ايه اللي دخل فساد دلوقتي
ايه علاقتهم بالفساد بالله عليكم
دول كانوا بيعملوا تقارير
يعني مالهومشي اي علاقة بالقرارت او اي حاجه فيها فساد
ياريت حد يفهمني بس اصل انا فهمي على ادي شويه
واحد بيعمل تقارير بحاجات محدده له مسبقا وهيا الاخبار اللي هيعتمد عليها قرارات رئاسية
لا هيقدر يزود عليها ولا هيقلل ولازود او قلل فده برضه ايه علاقته بالفساد هو هو اليي كان بياخد القرارات
ايه علاقته بالفساد
يارب اهدنا وفهمنا