إستفسار بخصوص الفرامل!

**shakshak2011** · 28-02-2011 02:40 AM

السلام عليكم

إخوانى الكرام .. بسمع صوت صفاره بصفه دائمه تقريباً على السرعات القليله مع الضغط على الفرامل

فى صيانة ال 20000 المهندس فى التوكيل قالى إن التيل الخلفى قل بس يمشيك كمان 10000 كم و حرام نغيره لأنه الأصلى

دلوقتى أنا مقلق .. الصوت بسمعه تقريباً من التيل الأمامى .. و التيل ده متغير من حوالى5000 كم

لا ألحظ أى مشاكل مع كبح الفارمل .. يعنى الفرامل تعمل بصوره ممتازة و لا أشعر إنها بتهرب منى

تفتكروا أكبر دماغى .. و الصفاره ما دام على السرعات الهاديه مفيهاش مشاكل .. ولا إيه الحل ؟؟؟

ولو هشترى تيل أمامى .. ماهو النوع المفضل ل برسونا ؟

بارك الله فيكم

**shakshak2011** · 01-03-2011 12:04 PM

يا مسهل .. فى إنتظار ردودكم

**eng_Amr** · 01-03-2011 12:35 PM

حاول تنضف التيل كويس بالهوا او باى حاجة . حصل معايا الصوت دة قبل كدة وكان بيروح لما ادوس على الفرامل جامد. لما نضفتها الصوت راح تماما.

**MEGAREKAB** · 01-03-2011 11:53 PM

أولا حاول تحدد مصدر الصوت
ورا ولا قدام
يمين ولا شمال

فك الكاوتش اللى الصوت طالع منه

هات جردل صغير وحط فيه كيس بريل وشويه مياه صغيره

حط المياه بالبريل على الطنابير اذا كان الكاوتش الخلفى وحاول على قد ماتقدر تخلى المياه تدخل جوا

لو تقدر تفك وش الطنابير بإستخدام مفتاح 13 يكون ممتاز وأضمن مليون فى الميه....

إستخدم فرشاه بياض صغيرة فى التنظيف بالماء والصابون كأنك بتدهن جزء جذء وزاويه زاويه فى الطنابير من جوه وتخلى المياه بالصابون تتخلل كل فراغ فى الطنابير

إغسل كذلك وش الطنبور من جوه اللى هو أنت خلعته وإنفصل عن العجل الخلفى...

لو لاقيت داخل الوش المخلوع ده تراب أسود شبه الهباب يبقى هو مصدر الصوت 100%

تأكد من أن وش الطنبور من الداخل ناعم جدا جدا ومفيش عليه أى أثر تدريج أو حفر أو تجريح غويط

أترك الماء بالصابون لمده خمسه دقائق على الطنابير

أشطف الطنابير بالماء فقط مستخدما الفرشاه ايضا ولابد من التأكد من نزول كل الصابون

أعد تركيب وش الطنبور مره أخرى زى ما فكيته بالظبط.

أترك السيارة لمدة عشر دقائق بدون تركيب الكاوتش نفسه للتأكد من جفاف المياه تماما

أعد تركيب الكاوتش وتوكل على الله وجرب وإدعيلى

نفس الكلام بالنسبة للأمامى مع فرق عدم وجود طنابير فى الامام او اى وش بيتشال

تحياتى

**Ayman_52** · 02-03-2011 12:00 AM

المشاركة الأصلية كتبت بواسطة eng_Amr

حاول تنضف التيل كويس بالهوا او باى حاجة . حصل معايا الصوت دة قبل كدة وكان بيروح لما ادوس على الفرامل جامد. لما نضفتها الصوت راح تماما.

+1

**shakshak2011** · 02-03-2011 12:54 AM

ألف ألف شكر يا جماعه على تعاونكم و على ردكم الرائع
شكر خاص للأخ الغالى MEGAREKAB على رده الكافى الوافى .. إن شاء الله الجمعه القادمه بعد الصلاة ناوى أنظفها و أنظف العربيه بالكامل من تحت بجاز فى بنزينه
شكراً جزيلاً و يارب إجعله فى ميزان حسناتكم إن شاء الله