نقاش ايجابي : تعالوا نتخيل الحكم و الحكومة اللي نفسنا فيهم في مصر بالتفصيل

سلام عليكم , عايزين نبدأ نعمل حاجة ايجابية , و لو بالخيال , اللي هو اول خطوة في خطوات الانجازات الكبيرة
كل واحد فينا يبقى نفسه يبقى شكله ايه ؟ و بالتفصيل على قد ما يقدر

هانفتح كذا مجال ,ما يخص الشرطة و الداخلية (حديث المدينة طبعا) , موضوع يخص العلاقات الخارجية (مع الدول و الحركات و القوى و حتى في السفارات) , موضوع يخص الاقتصاد ( عايزين نشوف ايه في الصناعة و ده ممكن يحصل ازاي , و في الزراعة و ده يحصل ازاي ؟ , و هكذا ) , و هكذا تبعا لاقتراحات الاخوة

و يا ريت كل واحد يقول اللي هو عايزه بالتفصيل مش باختصار

يعني مثلا ما يقولش:
- الشرطة تحترم الشعب

لأ يقول
في موضوع الشرطة و الداخلية:
-- يبقى كل رجل داخلية بيتعامل مع المواطنين زي ما بيتعامل معاهم موظفين الاستقبال بتوع الشركات الكبيرة , بأدب و ود , و في نفس الوقت حسم


ما يقولش :
يبقى مسئوليننا محترمين

لأ احنا نحط تفاصيل الاحترام بنفسنا و نقول مثلا

اقتراحات عامة :
-- احب اني ما اشوفش ابدا مسئول في بلدي بيكذب
-- احب اني ما اشوفش في بلدي مسئول عقليته انه ولي أمر الشعب و عارف مصلحته اكتر منه

الاقتصاد
-- نقطة عامة شوية بس لازم يكون فيه هدف استراتيجي في تحقيق الاكتفاء الذاتي في كل حاجة تقريبا (دي كانت من سياسات محمد علي بالمناسبة)ـ
-- عامة برده (معلش انا باخالف كلامي بس اكتشفت ان العام لازم يتقال ولو مرة على الاقل ) الاهتمام بالصناعة و الزراعة , عدم وجودهم هو احد اسباب البطالة الكتير


داخليا
-- عدد الشرطة الكبير اوي ده لابد من توجيهه لأمن المجتمع , يعني لابد من تواجد رجال الشرطة في كل مكان , ما ينفعش لما حد تحصل له مشكلة ينتظر لحد ما حد يجي له من القسم لأن ده معناه ان اللي حصل هايكون حصل خلاص , لابد من الشرطة في كل شارع , كل دول هاييجوا منين , من الأمن المركزي طبعا

مبدئيا
انا محتاج ان كل مسؤل يطلع فى مجلس الشعب المنتخب و يقول خطته السنوية ايه و كل 3 شهور يطلع و يقول لينا اخبار خطته ايه و جدول التنفيذ ماشى صح و لا فيه تأخير و ايه سبب التأخير و تكون الحلقات دى مذاعة تليفزيونيا

و اخر السنة نحاسبه فى مجلس شعب على ما تم تنفيذه و هل ما لم يتم تنفيذه لسبب قاهر ام بسبب تقاعس منه و اللى يأكد الكلام دا الجهاز المركزى للمحاسبات

اقتباس:

---

المشاركة الأصلية كتبت بواسطة sharky

مبدئيا
انا محتاج ان كل مسؤل يطلع فى مجلس الشعب المنتخب و يقول خطته السنوية ايه و كل 3 شهور يطلع و يقول لينا اخبار خطته ايه و جدول التنفيذ ماشى صح و لا فيه تأخير و ايه سبب التأخير و تكون الحلقات دى مذاعة تليفزيونيا

و اخر السنة نحاسبه فى مجلس شعب على ما تم تنفيذه و هل ما لم يتم تنفيذه لسبب قاهر ام بسبب تقاعس منه و اللى يأكد الكلام دا الجهاز المركزى للمحاسبات

---

++++111

بعد ما اكتشفناه من نهب وفساد
اتمنى يبقى في
شفافية مالية
يعني
يتعرض سنويا او نص سنوي كم هو حجم الدخل المادي للدوله من بترول وقناة السويس وتصدير الخ الخ
وكم الانفاق كل وزارة على حده وبالتفصيل
وتتعرض الارقام وتتناقش في مجلس الشعب كل فتفوته دخلت وخرجت

ممكن أحلم ؟؟؟؟؟